Основното јавно обвинителство Скопје соопшти дека поднеле кривична пријава против четри лица кои се роднински поврзани за производство и продажба на 133,72 килограми марихуана. Тие марихуаната ја чувале во автосервис во Ѓорќе Петров, соопшти ОЈО Скопје.
Од ОЈО Скопје велат дека по спроведена истражна постапка, јавен обвинител поднесе обвинителен акт против четири лица за кривично дело – неовластено производство и пуштање во промет наркотични дроги, психотропни супстанции и прекурсори од член 215 став 1 во врска со член 22 од Кривичниот законик.
Еден од обвинетите се гони и за кривично дело – неовластено изработување, држење посредување и тргување со оружје или распрскувачки материи од член 396 став 1 од Кривичниот законик, соопшти Обвинителството.
„Четворицата обвинети, тројца мажи и една жена, роднински поврзани, во авто сервис во Ѓорче Петров, неовластено заради продажба држеле 133,72 килограми наркотична дрога – марихуана. Од нив, на 2 мај спакувале 99,6 килограми и ги подготвиле за неовластена продажба. Дрогата во кеси и картонски кутии ја ставиле во автомобил, а остатокот го оставиле во авто сервисот“, стои во соопштението од ОЈО Скопје.
Од обвинителството објаснуваат дека истиот ден тие заеднички организирале пренос на марихуаната, движејќи се со три автомобили еден зад друг – прво возило со цел да известува за полициски службеници и патроли, второ возило во кое била дрогата и трет автомобил за заштита.
„На издадена полициска наредба да запрат на улицата ‘Скупи’, првиот автомобил воопшто не застанал и обвинетиот се дал во бегство. Другите две возила биле веднаш сопрени и при извршен преглед биле пронајдени картонските кутии со дрогата. По извршен претрес во авто сервисот била пронајдена и останатата марихуана, но исто така биле пронајдени и четири куршуми муниција кои еден од обвинетите ги држел без дозвола“, соопшти Обвинителството.
Од ОЈО Скопје велат дека по лишување од слобода на сите четворица обвинети, по предлог на јавниот обвинител, им е определена мерка притвор.
„Со поднесувањето на обвинителниот акт, јавниот обвинител до Основниот кривичен суд Скопје достави и предлог за продолжување на притворските мерки, бидејќи се уште постојат законските основи – опасност од бегство и можност да го повторат делото“, велат од Обнвинителството.