Новите американски податоци покажуваат дека дури 80 отсто од децата веројатно имале инфекција на корона вирус – четири пати повеќе отколку што е официјално објавено, пренесува германската новинска агенција ДПА.
Со толку многу луѓе кои користат домашни тестови за Ковид-19, ако воопшто се тестираат, експертите одамна признаа дека вистинскиот број на случаи е поголем од она што е официјално пријавено.
Новите податоци од американскиот Центар за контрола и превенција на болести (ЦДЦ) сугерираат дека вистинската бројка кај децата е значително поголема.
Доказите доаѓаат од примероци од крв од деца чија крв била земена во лаборатории поради причини кои не се поврзани со Ковид, како што е мерење на нивото на холестерол или олово.
Меѓу 26.725 примероци на крв собрани во мај и јуни, скоро 80 проценти го содржеле типот на антитела што имунолошкиот систем го произведува само како одговор на инфекција – не како одговор на вакцините.
Претпоставувајќи дека тој процент е точен за сите деца во САД, ЦДЦ процени дека најмалку 57 милиони млади луѓе биле заразени со коронавирус до крајот на јуни, четири пати повеќе од вкупниот број пријавени случаи.
Дури и тој број можно е да е премногу низок, земајќи ги предвид сите случаи од почетокот на пандемијата, бидејќи нивоата на овие откриени антитела паѓаат на немерливи нивоа кај повеќето луѓе во рок од една година.
Споредливи податоци за возрасни достапни се дури од април, но дури и тоа покажува дека речиси 60 отсто од примероците на крв за возрасни содржат антитела кои укажуваат на инфекција.
Додека некои од овие заразени луѓе можеби тестирале дома и не ги пријавиле резултатите, други веројатно немале поим дека се заразени и никогаш не биле тестирани.
Нивниот имунолошки систем, во многу случаи зајакнат со вакцинација или претходна инфекција, можеби ја потиснувал инфекцијата пред да предизвика какви било симптоми.
– Многу луѓе, особено децата, нема да бидат изразито симптоматични, рече Крег Шапиро, специјалист за заразни болести во Nemours Children’s Health во Делавер.
– Добрата вест е што во последно време се помалку деца доживуваат серија тешки симптоми на Ковид наречени мултисистемски воспалителен синдром, рече Шапиро.
Ова е делумно затоа што варијантата омикрон се чини дека предизвикува поблага болест од нејзините претходници, а делумно затоа што вакцинациите и минатите инфекции им дадоа на децата одреден степен на имунитет.