До крајот на денов во нашата држава ќе имаме претежно облачно време со повремени врнежи од дожд, локално и тоа особено во источната половина врнежите ќе бидат ПОИНТЕНЗИВНИ каде ќе има услови и за локална појава на грмежи. На некои места се очекува да наврнат над 20 л/м2 воден талог. На високите планини ќе има врнежи од снег а ќе дува умерен до засилен ветер од југоисточен правец. Најизразен ветерот ќе биде долж Повардарието и во источните предели од државава (над 70 км/час).
Доцна попладне и навечер ветерот ќе го промени правецот во северозападен. Максималните дневни температури ќе се искачуваат во интервалот од 8 до 17 степени. Во Скопје и околината времето ќе биде претежно облачно со повремени врнежи од дожд. Ќе дува умерен, повремено засилен ветер од југоисточен правец, особено претпладнево. Доцна попладне и навечер ветерот ќе го промени правецот во северозападен, максималната дневна температура на воздухот се очекува да се искачи до околу 14 степени.
И во текот на следниот период ќе имаме доста променливо време, ќе има и почести повремени врнежи од дожд и тоа особено за време на викендот кога локално врнежите повторно ќе бидат ПОИНТЕНЗИВНИ. Утре и во петок на повеќе места ќе имаме релативно суво време, иако локално се очекува појава на слаб локален дожд.
Што се однесува до температурите на воздухот, истите и понатаму ќе бидат над просекот за овој дел од годината и на многу места ќе се искачуваат над 10 степени. Во најтоплите предели од државава температурите на воздухот повторно се очекува да се искачат до околу 20 степени.
Подготви: Славчо Попоски