Пратеникот Павле Богоевски, го постави своето прашање до кандидатот за претседател, Стево Пендаровски, од позиција на поранешен шарен револуционер. Откако Пендаровски прифати соочување со шарените револуционери, Богоевски со хаштаг „наМегдан“, го праша Пендаровски дали ќе дозволи да пропаднат неколку постапки на СЈО доколку Собранието во иднина го избрише член 353 од Кривичниот законик.
„Прашање за #НаМегдан со Стево Пендаровски: Доколку Собранието изгласа Измени во Кривичен Законик со кои се брише чл.353 (проблематичен член од време на претходната власт, за кој и ЕУ вели дека треба да го промениме – но кој ќе значи и пропаѓање на неколку постапки на СЈО), дали ќе примените Претседателско вето?“, прашува Богоевски.
Во декември минатата година во собраниска процедура влегоа измени во Кривичниот законик со кои се предвидуваше измена и на членот 353. Овој член се однесува на злоупотреба на службена положба при јавна набавка за сите службени лица кои со злоупотребата оствариле „некаква корист“.
Со измените „некаква корист“ требаше да биде преименувано во „имотна корист“ со што се намалуваше опсегот на кривичните дела за кои ќе се бара одговорност. Ова беше толкувано од правниците како пресудно за дел од постапките на СЈО, но измените беа повлечени.