Бизарно – застрелале мечка качена на дрво, а таа паднала врз ловец и го убила

Човек од Вирџинија настрада откако мечка паднала врз него од дрво, кога била застрелана од еден од неговите партнери во лов, јавува Асошиетед прес.

Според информациите, инцидентот се случил на 9 декември во округот Луненбург, кој е помеѓу Ричмонд и Денвил, според соопштението на Одделот за диви животни во Вирџинија.

Група ловци следеле мечка која се качила на дрво. Додека ловците се оддалечувале од дрвото, едниот од нив ја застрелал мечката.

Животното паднало врз друг ловец кој стоел на оддалеченост од околу 3 метри од стеблото.

Жртвата е идентификувана како 58-годишниот Лестер Ц. Харви од Феникс. Еден од ловците укажал прва помош пред Харви да биде однесен во болница, каде што починал на 13 декември.