Вицепремиерот за економски прашања Фатмир Битиќи порачува дека е неопходно македонската економија да се реструктира. Со сегашната структура на економијата, во која две третини од БДП се потпира на приватна потрошувачка, 15 проценти на јавната потрошувачка, а само мал дел на извозот и производство, според Битиќи, ние сме многу ранливи.
– Ако сакаме одржливо да се развиваме, оваа структура мора да се промени во насока на поголемо учество на производството со поголема додадена вредност, зголемување на конкурентноста на компаниите и раст на извозот. Треба да се поддржуваат сектори кои создаваат додадена вредност во економијата и кои на долг рок придонесуваат кон економски развој и подобрување на структурата на БДП, посочува Битиќи во интервју за порталот izvoz.mk
Воедно, тој нагласува дека за да се поттикне конкурентноста на компаниите, да се зголеми производството на производи со додадена вредност и да се стимулира раст на извозот, една од мерките за поддршка е Гарантниот фонд за извозни компании, кој веќе е ставен во функција, а кој ќе се операционализира преку Развојната банка на Северна Македонија, која со тоа ќе ја добие развојната компонента која и недостасуваше во досегашното функционирање.
– Благодарение на пакетите за економска поддршка оваа година успеавме да спасиме 120 илјади работни места и да ја намалиме невработеноста и во време на криза. Очекувањата се 2021 година да заврши со стапка на невработеност од 15 проценти, со најмалку 15 илјади дополнително креирани работни места и раст на економијата од 4,1 процент, што ќе биде добра почетна основа за наредните години, кога се очекуваат стапки на раст на економијата од 5 проценти до 5,2 проценти, потенцира вицепремиерот за економски прашања Битиќи.
