Еден од главните приоритети на владата се развојот и инвестициите во енергетскиот сектор за да се обезбеди одржливо снабдување со енергија и покрај енергетската криза што ја зафати не само Северна Македонија, туку и целиот свет, изјави министерот за економија Крешник Бектеши во своето обраќањена Конференцијата „Западен Балкан: Трансатлантска и регионална соработка – градење силни сојузи“, која што денес се одржа во Вашингтон.
„Во изминатите неколку години Владата направи неколку реформи во енергетскиот сектор со што започнавме процес на декарбонизација“, рече бектеши.
На панел дискусијата се ззборуваше за предизвиците со кои се соочуваат земјите од Западен Балкан во процесот на декарбонизација и промоција на обновливи извори на енергија.
“Северна Македонија е првата земја членка на Енергетската заедница, која изработи Национален план за енергија и клима, кој опфаќа декарбонизација, енергетска ефикасност, безбедност во снабдувањето со енергија, внатрешен пазар на енергија и истражување, иновации и конкурентност. Декарбонизацијата е и еден од главните столбови на националната Стратегија за развој на енергетиката до 2040 година.
Зависноста на земјата од увоз на природен гас, како и од повеќето горива, го прави сценариото за декарбонизација значително ранливо на превирањата на пазарите за јаглен, нафта, природен гас и електрична енергија, предизвикани од руската инвазија на Украина” , рече Бектеш.
Со обврските кои ги има превземено Северна Македонија во делот на декарбонизација се предвидува во наредниот период да за затворат термоелектраните и со тоа да се запре производството на електрична енергија од јаглен, да се зголеми учеството на обновливите извори во енергеткиот сектор, процес кој веќе е започнат со инвестиции во фотонапонски централи, како и намалување на зависноста од увоз на електрична енергија.
„Северна Македонија постигна значителен напредок во декарбонизацијата и климатските активности во националните стратешки и акциски документи за енергија и клима. Согласно Стратегијата за развој на енергетиката, учеството на ОИЕ во бруто-финалната потрошувачка на енергија се очекува да се зголеми, достигнувајќи во опсег од 35-45% во 2040 година“, изјави Бектеши.
Северна Македонија во делот на природниот гас во моментот е целосно зависна од рускиот гас, кажа Бектеши и додаде дека со поддршка на нашите партнери САД и ЕУ лани државата успеа да обезбеди дополнителни капацитети преку гасоводот со Бугарија. До крајот на годината ќе почне и изградбата на интерконекторот со Република Грција со што ќе се диверзифицираат изворите за снабдување со овој енергенс, рече министерот.
“Работиме на гасно поврзување со Србија и со Косово што би значело поголема енергетска независност на регионот” изјави Бектеши.
