Автомобил излета од патот и падна во Охридското езеро кај Струга

Автомобил излетал од патот и паднал во Охридското Езеро, на влезот во Струга. Инцидентот се случил рано утрово и повредени нема, потврди портпаролот на СВР Охрид, Стефан Димоски.

– Патничко возило „форд“ со охридски регистарски ознаки, управувано од Н.Е.(43) од скопското село Орланци, кое се движело по улицата „Партизанска“ во Струга, излетало од патот и паднало во водите на Охридското Езеро. Повредени лица нема, изјави Димоски.

По извршениот увид возилото е извлечено од екипи на Територијалната противпожарна единица од Струга. Се преземаат мерки за расчистување на настанот.