Австралиското министерството за внатрешни работи на вечерашното сослушување на тенисерот Новак Ѓоковиќ можно е да ја доведе во прашање веродостојноста на документот на кој се базира ослободувањето од вакцинација на светскиот рекет број еден. Тоа е потврдата дека Ѓоковиќ бил Ковид позитивен на 16 декември и го прележал корона вирусот.
Адвокатот Александар Тортевски во изјава за „Фокус“ вели дека една од причините што автралиската влада се обиде да го одложи рочиштето е тоа што нема доволно докази на своја страна, но другата причина се новите информации кои излегоа во јавноста.
Тоа е дека иако според потврдата Ѓоковиќ имал позитивен Ковид тест на 16 декември, тој следните денови не бил во изолација.
Мислам дека можеби сакаат да се подготват околу новите информации што излегоа во јавност вчера. Околу тоа дека влегол со потврда дека на 16.12. бил позитивен, а на 17.12. учествувал на настан со многу деца на затворено. Без овие околности, владата сигурно би го изгубила случајот. Поништувањето на визата беше по директен налог на премиерот кој па не смее да има влијание на поединечен случај. Новите информации ги објави и Гардијан, така што сигурно се стигнати до австралиската влада, вели Тортевски за „Фокус“.
Тортевски објаснува дека фактот што Ѓоковиќ слободно се движел и учестувал во низа јавни настани ќе ги засили сомневањата дали потврдата дека прележал корона е фалсификат.
Ако му утврдат дека документот е фалсификуван, тогаш ќе биде проблем, вели Тортевски.
Во соопштението објавено на 17 декември, Тенискиот сојуз на Белград на својата Фејсбук страница објави дека „најдобриот тенисер на планетата“ и „носител на 20 Грен слем титули“ им ги доделил пехарите и дипломите на младите тенисери во Белград. Ѓоковиќ на фотографиите не носи ниту маска.
Инаку, австралиската влада поднесе барање за одложување на рочиштетото за сослушување на Новак Ѓоковиќ во случајот со одбивањето виза, но Судот тоа го одби.
К.С.Б.