Австралија денеска објави воведување нови санкции за 67 руски функционери, така што вкупниот број „поединци и субјекти” на австралиската листа санкционирани достигна речиси 600.
Австралиското МНР соопшти дека најновите санкции се насочени кон истакнати руски бизнисмени, како и високи воени и владини функционери, вклучително и вицепремиерот Дмитриј Григоренко, министерот за економија, Максим Решетников и политичарот, Александар Бабаков.
На листата се додадени и генерал-полковникот Михаил Мизинцев, посочен како одговорен за нападите врз „невини цивили“, како и за „бомбардирањето на театарот” во Мариупол.
Последната рунда санкции следува по појавата докази за воени злосторства извршени од Русија во Буча и другите градови околу Киев, се вели во соопштението.
„Австралија на најсилен можен начин ги осудива таквите ѕверства. Ужасот е речиси неискажлив и го гледаме секој ден. Но, мислам дека Австралијците можат да бидат горди на напорите што нашата земја ги прави за поддршка на Украина“, изјави министерката за надворешни работи, Марис Пејн за локалната радио станица „2 Џи-Би“.