Текстот е објавен на 26 септември 2024 година во неделникот „Фокус“, во бројот 1.512.
Села многу години е на политичката сцена, а пошироката јавност го запозна откако стана пратеник од редовите на ДПА по што беше избран и за градоначалник на Струга. Тој беше еден од основачите на коалицијата Алијанса за Албанците, која подоцна се трансформираше во политичка партија на чело со него. Сепак, по поразот на предвремените локални избори во Тетово одлучи да се повлече од лидерската позиција и да му отстапи место на Таравари. Но, двајцата се разидоа во пресрет на последните двојни избори и сѐ уште водат судска битка за партиските печати.
Разговараше: Влатко СТОЈАНОВСКИ
ФОКУС: На политичката сцена, моментално дејствувате како пратеник од Европскиот фронт, но дали настапувате и во својство на лидер на Алијанса за Албанците, со оглед дека сѐ уште трае судскиот процес за партискиот печат?
СЕЛА: Формално-правно, највисокиот орган што избира претседател на партија и кој се изјаснува за прашања од овој карактер од статутарен аспект во Алијансата за Албанците е конгресот на партијата.
Значи, ние имавме вонреден конгрес со потписи од над 600 делегати што се доставени до судот заедно со записникот од конгресот, каде што се точно наведени одлуките на конгресот, меѓу кои разрешување на поранешниот претседател, г-динот Арбен Таравари со над двотретинско мнозинство, и назначување нов претседател, т.е. мене како претседател на Алијанса за Албанците.
Тоа значи дека сѐ е кристално јасно кој ја претставува партијата и ова прашање не треба да биде прашање на надворешни политички фактори надвор од членството на АА, туку исклучиво право на членството изразено преку нивните делегати делегирани во конгресот на партијата. Повеќе од јасно е дека јас настапувам како лидер на Алијанса за Албанците и доказите се доставени пред Основниот суд во Тетово и во Апелацискиот суд во Гостивар.
ФОКУС: Ако е така, зошто второстепениот апелациски суд ја поништи одлуката на понискиот основен суд и предметот го врати на повторно одлучување?
СЕЛА: Според мои информации, имало една тајна средба на Таравари со еден од апелациските судии и сега предметот е вратен во основниот суд во Тетово.
ФОКУС: Меѓу другото, апелацискиот суд вели дека основниот суд не проверил дали конгресот на спротивниот табор бил уредно свикан и одржан. Како го коментирате тоа?
СЕЛА: Знаете што? Вистина е дека редовно свикување конгрес, како што налага статутот, врши централното собрание на Алијанса за Албанците, а во статутот стои дека најмалку една недела однапред треба да се свика конгрес. Ние свикавме конгрес 8-9 дена од денот кога имавме централно собрание и одлуката за свикување конгрес е одлука на централното собрание, како што и предвидува статутот.
За споредба, по оваа одлука на централното собрание на АА, Таравари, за да претходи на одлуките што би ги донел конгресот, свика конгрес во кој не беа присутни делегатите на конгресот во четврток навечер малку пред полноќ за во петок следниот ден.
ФОКУС: Исто така, и Таравари тврдеше дека има мнозинство и за свикување на конгресот и за донесените одлуки.
СЕЛА: Не, тоа е голема лага. Да имаше мнозинство потписи, тој немаше да избега од соочување во централното собрание, туку ќе беше присутен. Бил поканет, како и сите други членови. Сите членови на централното собрание се регистрирани во судот и таму се имињата и на членовите на централното собрание и на конгресот.
Ние сме доставиле докази и утврдено е тоа. Но, на ваков начин сакаат само да добијат повеќе на време, за да ми го отежнат политичкото дејствување мене лично како претседател на АА и на самата партија, онаа вистинската. А за профитерите што сме ги имале внатре во Алијанса, јас не можам да имам одговорност.
ТАРАВАРИ НАСТАПИ ПО НАРЕДБА НА МИЦКОСКИ
ФОКУС: Што очекувате во повторената судска постапка и дали сте ги чуле обвинувањата дека вашиот соработник и поранешен министер за правда Лога влијаел врз првостепената судска одлука?
СЕЛА: Од формален и правен аспект се знае дека конгресот избира и разрешува претседател на партија. Не е вистина дека министерот Лога влијаел, бидејќи ако било така, ќе влијаел и во апелација.
ФОКУС: Но, во меѓувреме се смени власта.
СЕЛА: Грешите! Не се смени власта, туку тогаш имавме избори, а не е забрането за време на избори судиите да донесат одлука. A дезинформации, лаги и обвинувања од страна на тие што направија сѐ за да ја снема Алијанса за Албанците од политичката сцена, за мене не се важни.
Сега, ова се одговори од правен аспект, а од морален аспект – кога се споменува Алијанса за Албанците, на кого Ве асоцира вас?
ФОКУС: Нема дилеми дека асоцира на Вас, но тука треба да се потсети дека тоа не е партија што ја создадовте и изградивте, туку вие како Движење за реформи на ДПА формиравте коалиција со уште 2 партии, која ја нарековте Алијанса за Албанците и практично го презедовте коалицискиот назив и бренд. Но, да го оставиме тоа во минатото. Како сега може да се измери кој ја има поддршката, не во органите, туку во членството на АА, бидејќи и Вие и Таравари не настапивте самостојно на избори, туку бевте дел од поголеми коалиции?
СЕЛА: Секогаш вистината е само една, а лагата има повеќе форми и варијанти. Следете ги внимателно изјавите на Таравари во тоа време и ќе потврдите дека мојот став беше ние да настапиме на избори сами како АА. Сега сме по избори, по формирање коалиции итн.
Без разлика кој какви желби имал, кога сме седнале со Таравари да зборуваме околу темите коалиција, мојот став бил еден и единствен – АА да настапи сама на овие избори. И, овој став не е само мој, туку сме гласале ваков став во централното претседателство на партијата, а за таков став гласал и Таравари.
Во меѓувреме се случи невиден преседан на политичката сцена, кога претседател на партија бега од неговите структури. Избега од партијата и направи коалиција преку Фејсбук, а не да донесе одлука во централното собрание каде што треба да се одлучи за вакви прашања. Да имал мнозинство, ќе дојдеше да го тера своето. Очигледно, имајќи предвид како настапувал, тој морал да изврши наредба.
ФОКУС: Чија наредба?
СЕЛА: Чекорите што ги презеде покажува на едно и единствено. Имајќи предвид дека Мицкоски излезе 2 недели пред да се случат збиднувањата во АА, со тврдење и гаранција дека партијата ќе се подели на две крила, значи дека тој (Таравари) имал директна наредба за да ја отцепи Алијанса за Албанците.
Кружеле информации во македонските медиуми (за кои јас лично немам доказ) дека целиот процес на поделба и пуч во АА чинел околу 5 милиони евра, а постапките и политичките чекори што Таравари ги направи во тоа време доведуваат само до еден и единствен заклучок, дека постапувал по наредба.
А, за мотивите кои биле, дали пари или некој друг вид уцена, не знам. Знам само едно, дека при секоја средба со мене некаде од декември, па сѐ до поделбата, кога седнувавме заедно да зборуваме околу партијата и политичката ситуација, страшно му се тресеа рацете.
Неговите постапки и политички чекори, изјавите на лидерот на ВМРО-ДПМНЕ, постизборните одлуки доведуваат до тој заклучок, односно дека настапувал по наредба.
АА НЕ Е КРЕИРАНА КАКО АНТИПОД НА ДУИ
ФОКУС: Тогаш се пласираше теза дека членството на АА е градено на анти-ДУИ основа, а потегот на Таравари беше здружување токму со цел уривање на ДУИ. Што мислите Вие за оваа теза?
СЕЛА: Тоа е теза што сум ја слушал од Таравари, но тоа е теза и на ВМРО-ДПМНЕ. Цело ова време ние слушаме дека сите политички чекори Мицкоски ги преземал зашто нели ДУИ била лошото на ова општество.
Но, знаете што? Кога укинуваш балансер и имаш обиди да укинеш Закон за јазици, не удираш врз ДУИ, туку удираш врз обичниот албански граѓанин.
ДУИ е само покритие, имајќи предвид дека над 20 години се на власт, а во суштина намерата е да се дискриминираат и да се скратат правата на Албанците.
По истата оваа логика, Таравари зборува дека АА била креирана исклучиво да биде антипод на ДУИ.
ФОКУС: Нема ли вистина во тоа?
СЕЛА: Не е вистина тоа. Никаде во нашата платформа и програма не стои дека сме формирани за да го урнеме ДУИ, туку таму стои дека се залагаме за правна држава, за еднаквост меѓу граѓаните и за постигнување на еднаквоста меѓу двата носители на стабилноста и на градење на мирот – Македонците и Албанците, како и на целосна рамноправност во Уставот и во законите, во политичките, економските и социјалните права.
Тоа стои во документите на Алијанса за Албанците и дали сега во овој политички пат ќе се сретнеш низ години и децении со политички опоненти? Да, нормално! Но, тоа не значи дека нема да има никаква комуникација или заеднички политики што треба да се поддржуваат без разлика што сте дел од некои различни блокови.
Ако е така, Таравари треба да одговори зошто влезе во коалиција и влада со ДУИ пред една година? Тој беше претседател на партијата и кога се носат такви одлуки, претседателот го има последното да или не.
ФОКУС: Како, всушност, се случи со Таравари од толку блиски соработници да станете толку големи противници?
СЕЛА: Ме враќате на политички збиднувања кои јас сум ги објаснил за времето кога се случија тие, кои беа нашите позиции итн.
ФОКУС: Јас дури сега слушам многу нови моменти од тој период, како на пример, кога пред некој ден рековте дека сте се сомневале дека Таравари ви работел зад грб. Зошто тогаш му отстапивте место да стане лидер?
СЕЛА: Не е толку значаен Таравари за да се занимавам со него и секој мој збор за него му прави услуга. Јас можам да објаснам, сум бил транспарентен.
Има една вистина – јас го избрав претседателот. Јас отидов во секој огранок, држев собири со нашето членство. Тој беше назначен како вршител на должност, иако тоа го немавме во статутот во тоа време.
Требаше јас да разговарам со сите членови на централното собрание за да го прифатат, иако и тие мирисаа дека предавството во Тетово го има направено Таравари. Без разлика, јас правев сѐ за да ја држам унифицирана Алијанса за Албанците, за да не се случи ова што се случи.
Но, погрешно проценив дека тој има желба само да биде претседател. Можеби требаше да влезам уште подлабоко, но јас по природа, кога некој веќе ми е соработник, не проверувам дали соработува со служби итн. Би било некоректно. И тука направив грешка.
ФОКУС: Зошто сметате дека Таравари би работел зад грб?
СЕЛА: По сѐ изгледа, неговите намери беа да ја снема АА од политичката сцена и тврдат дека ВРЕДИ ќе никне во политичка партија. Нели, се исполнува неговата цел.
Од друга страна, ја води оваа судска битка за Алијанса за Албанците за да не постои. Ако веќе сака да креира нова партија, АА никогаш не била криминална дружина, туку партија каде што волонтерски се влегува и така се излегува.
Сега се враќам на прашањето зошто му отстапив место за да биде лидер? Одговорот е за да спречам поделба на Алијанса за Албанците, го назначив за претседател.
Ако не го направев тоа, за време на парламентарните избори што поминаа, интуицијата ми велеше дека ќе постапи исто како на локалните избори во Тетово.
ФОКУС: Во која смисла?
СЕЛА: Значи тајно, дел од гласовите, не сите што ние ги имаме во Гостивар, ќе ги преиначеше со неговата екипа во Гостивар, кои се дојдени во партијата, не кога таа се формираше, туку кога се здоби со власт… Се работи за некои 2.000-3.000 гласови, кои ќе ги преиначеше кај БЕСА.
Во таква ситуација, АА од партија спремна да донесе победа и промена, од втора во албанскиот политички кампус ќе станеше трета, а јас не го сакав тоа за партијата. Па, одлучив сите збиднувања да останат во мирување, да ги поминеме парламентарните избори и тогаш да ги отвораме темите по потрага по вистината.
ПОДЕЛБА НА „ЗИЈАДИНИСТИ“ И „АРБЕНИСТИ“
ФОКУС: Дали кога сте го направиле Таравари лидер, како што велите, можеби имавте калкулација тој да го истурка процесот на коалицирање со ДУИ, а по изборите да влезете во постапка на негова смена, особено откако ќе поминевте лошо ако настапевте самостојно, во ситуација кога политичката битка беше крајно поларизирана?
СЕЛА: Не, такви планови немало, иако, за волја на вистината, јас пред конгресот во 2022 година не планирав пак да конкурирам за претседател. По локалните избори во 2021 година, кога, исто така, многу се работеше во делот да ми падне авторитетот во Алијанса за Албанците, голем придонес даде ВМРО-ДПМНЕ.
ФОКУС: На кој начин?
СЕЛА: Нели имавме соработка со ВМРО-ДПМНЕ за меѓусебна поддршка. ВМРО-ДПМНЕ го поддржуваше целосно Таравари во Гостивар, но не даде поддршка во Струга, иако јас не бев кандидат. Не даде поддршка и во Тетово, го поддржуваше Касами таму.
Од друга страна, Таравари се погрижи ние да изгубиме во Боговиње, преку отцепување на дел од членството. Но, сите овие работи се случувале тајно. Градоначалникот на Боговиње во тоа време ми рече – немаш никаква обврска кон мене, можеш да поставиш кој било кандидат.
Но, тој ни беше најуспешниот градоначалник и не сакав да се ставам во позиција да споменувам достигнување на некој функционер на АА, а потоа вие како новинар да ме прашате – е па зошто тогаш тој не е кандидат?
Според анкетите, ние само со него имавме шанса да ги победиме изборите. Последниот негов збор беше – немаш обврска кон мене, нема да се лутам, ќе работам на изборите, но една работа да знаеш, не сум јас целта, ти си целта и овие игри ти ги прави Таравари.
Ми вели – не сум сакал да ти кажам бидејќи те гледам дека си близок со него, го почитуваш, но да знаеш, да не биде дека не ти било кажано. Се работеше за политичка хајка против мене што се водеше од многу политички актери. Откако сум влегол во политика, сѐ ми било пресметан ризик, но ова внатрешното не.
ФОКУС: Сакате да кажете дека зад оваа хајка против вас и зад сценарио за делење на партијата стојат ВМРО и Мицкоски? Да не испадне дека во заднина е Курти, бидејќи тој се јави во улога на спонзор на коалицијата за уривање на ДУИ, од која последниот елемент беше Таравари?
СЕЛА: Планот е подготвен многу пред да стапи на сцената Албин Кури, кој, исто така, по сѐ изгледа е дел од проектот. ВМРО сакаше на чело на Алијанса претседател кој е скроен според нивните апетити, и тоа го имаат сега со Таравари, и најавата на Мицкоски 2 недели пред да се случи поделбата не беше случајна.
Јас во 2022 година реков доста е, нема да конкурирам за претседател на партијата. Тогаш го викнав Таравари. Не сакав јавно да објавам, за да не предизвикам дефетизам или некој што верува во мене, да си замине од партијата. Затоа, седнувам со Таравари и му го кажувам планот дека нема да конкурирам, да се подготви, зашто партијата не може да остане без претседател.
ФОКУС: Каков беше неговиот одговор?
СЕЛА: Неговиот одговор беше – да, ама со еден услов. Да го слушнам условот, му велам. Тој да биде претседател до парламентарните избори и потоа да се вратам јас. Му велам – немој да ме навредуваш. Вели, во кој дел те навредив? Со самото тоа што ми го кажува, испаѓа дека ги користам луѓето како марионети за свои потреби.
Мојот предлог е да бидеш претседател, а не со некои намери или скриени цели, претседател еден мандат, два мандати, како што предвидува статутот, па потоа ќе дојде некој трет. Рече ќе зборуваме пак, ама нека има и други членови за да знаат што сме договарале.
Седнуваме по 10 дена, го прашувам што одлучи? Ми вели дека нема да конкурира, бидејќи ако јас сум заминел од претседател, партијата ќе се подели. И така одлучив уште еднаш да конкурирам. Потоа тој почна да работи уште посилно за да се интензивира поделбата на „зијадинисти“ и „арбенисти“, па на крај се случи тоа со Тетово.
СТРАТЕГИЈА НА АНТИАЛБАНСТВО
ФОКУС: По сѐ што се случи, нели сметате дека ја одбравте погрешната страна на последните избори, а Таравари ја одбра вистинската?
СЕЛА: Ние живееме во општество со предрасуди, за жал. Ние имаме една политичка партија, или да бидам коректен, македонски политички партии, кои, во зависност од позицијата каде се наоѓаат, на власт или во опозиција, целата нивна стратегија за да дојдат на власт ја градат врз антиалбанство.
Така е кај ВМРО-ДПМНЕ, ама и кај СДСМ не е поразлично кога се во опозиција, иако таму оваа стратегија е малку пофина и помалку изразена. Не јас како политичар, туку цела јавност знаеше дека ВМРО-ДПМНЕ силно ќе се врати на овие избори и ќе победи.
ФОКУС: Се знаеше дека ВМРО-ДПМНЕ ќе победи во однос на СДСМ, но сепак власта работеше на сценарио да стигне до 61 пратеник со поширока коалиција и да го заобиколи ВМРО-ДПМНЕ.
СЕЛА: Ќе објаснам која е улогата на Таравари во целата приказна и затоа ја почнав тезата.
Имавме заедно претседателски со парламентарни избори и внатре во албанскиот кампус тој водеше преговори со ДУИ дали да настапат заедно, дали ќе имаме заеднички кандидат за претседател или ќе поддржиме друг. Во врска со темата, ние разговаравме со Таравари.
Треба да сметаш дека што во ситуација кога сите партии, наши опоненти, ќе имаат свои кандидати и ние мора да имаме, нели. Кога се заедно изборите, исходот од претседателските многу го одредува исходот на парламентарните избори. Проценките во тоа време беа дека ВМРО ќе победи, но тешко дека ќе стигне до 50 пратеници.
Во таква ситуација, јас му велам на Таравари, ако мора, ако истакнат другите партии, и ние ќе истакнеме претседател. Дали ќе се кандидираш за претседател? Не, не, на никаков начин, беа неговите тврдења.
Од друга страна, кога има избори, најголемиот успех и победа е балансот меѓу партиите, бидејќи тоа гарантира слобода на граѓаните. Кога една партија добива апсолутна власт да немате двоумење дека се удира врз слободата на обичниот граѓанин. Сега тоа што фали, особено во македонскиот политички блок, е балансот меѓу ВМРО и СДСМ.
И без мое запознавање, Таравари истакнува кандидатура за претседател. Тоа значи дека и другиот опонент ќе истакне кандидатура. Целта беше албанските гласачи да се соединат околу кандидатите и во првиот круг на претседателските избори, две недели пред парламентарните, ВМРО да освои апсолутна победа и од тој момент со експоненцијално растење да го зголеми бројот на пратеници. И тоа се случи. Играчот на Мицкоски во овој план е Таравари.
ФОКУС: Голема улога имаше и обединувањето на коалицијата ВЛЕН. Дали вие за неуспех го сметате тоа што никогаш не успеавте да ја обедините опозицијата и така да го загрозите ДУИ? Соработувавте со БЕСА, па со Алтернатива, но не со двете партии заедно…
СЕЛА: Јас цело време сум работел за да обединам, зашто јас сакам да донесам промена, која е квалитетна. Никој не може да зборува за промена, кога еден од главните експоненти на таа промена е Изет Меџити, кој над 20 години бил потпретседател на ДУИ. Ние живееме во апсурд.
ФОКУС: Многумина ќе речат дека апсурд е тоа што вие и Тачи повторно се здруживте, и тоа во коалиција предводена од Ахмети.
СЕЛА: Ќе одговорам и на тоа, но зборувам за поголемиот апсурд. Замислете, Меџити го обвинува Села за 20 години корупција на ДУИ. Или, Таравари прашува јавно каде бил Села 20 години и зошто тогаш не предлагал Бадентер во Уставен суд.
Велам дека можеби човекот има проблеми, па најдобрата работа што може да ја направи како министер за здравство е да има систематски контроли за овие што се занимаваат со пациенти со психички нарушувања, бидејќи почнуваат да наликуваат на нивните пациенти.
СИТЕ ШТО СЕ ОГРЕШИЛЕ ДА ОДГОВАРААТ
ФОКУС: Можеби имате право дека тоа не се прашања за вас, но дефинитивно се легитимни прашања за ДУИ, а сега сте во коалиција со нив. Вие ја оправдавте коалицијата со технички аргумент, дека по расколот во АА останавте без печат па моравте да коалицирате за да настапите на избори. Има ли суштински работи што ве врзуваат со ДУИ? Делите ли заеднички вредности и цели?
СЕЛА: Кај македонскиот кампус, за жал, најавуваа дека ќе дојдат на власт, водејќи кампања само против Албанците. И во ваква ситуација мора да се обединиш за да спречиш вакви најави.
Мицкоски, уште пред 2 години најави укинување на балансерот, тоа не е од сега. Кога зборувавме за уставните измени, и кога баравме за албанскиот јазик да не стои 20 отсто, тој одговори дека е спремен да разговара на таа тема, но рече ај да го укинеме балансерот, ај да го укинеме Бадентерот итн.
Јас сум да зборуваме за теми, но не за укинување, бидејќи тие се одбранбени механизми, со цел да спречат мајоризација. Дали се спроведувале е друго прашање. Треба да се процени дали тие механизми се ефикасни.
Во ваква ситуација, ние се здруживме за да ги минимизираме лошите ефекти што Мицкоски ги најавуваше за Албанците, не за ДУИ.
ФОКУС: Се создаде една перцепција дека ДУИ е извор на криминал и корупција во изминатите години, се најавуваат истраги и процеси, па вие како ќе се поставите во однос на тоа? Ќе се дистанцирате ли?
СЕЛА: Ако, како и дали ќе се случи некој да одговара за корупција и така натаму, јас немам намера да земам одговорност на кој било што има работено криминално. Сите што се имаат огрешено пред законот, треба да одговараат.
ФОКУС: ВМРО постојано говори за индиции за криминал, пред избори дури му порачуваше на Ахмети дека политичката кариера ќе ја заврши како криминалец…
СЕЛА: ВМРО зборуваше и за куќата на Таравари, најавуваше одговорност и сега истиот го направи министер. Сега имам едно прашање – судското рочиште во врска со овој скандал се држеше во белата палата или во судовите?
Јас сум дал свои придонеси Северна Македонија да биде тука каде што е. Без моето политичко присуство и дејствување немаше денес да бидеме членка на НАТО. И не мислам дека правда се дели со политички ставови на една или друга политичка партија.
ФОКУС: Вие бевте 61-от пратеник кога се избираше прв претседател на Собранието-Албанец, но 62-от (Ахмети) го немаше…
СЕЛА: И Африм Гаши и Биљал Касами беа пратеници, ама кога се избираше прв претседател Албанец на Собрание избегаа од Собранието.
ФОКУС: Претходно, нивни сопартиец ја испеа албанската химна и дополнителна ја ескалираа состојбата. Како од денес ви изгледаа тие случувања, кога вие бевте крваво нападнат? Во една пригода, го обвинивте Ахмети дека е нарачател на ваша ликвидација…
СЕЛА: Сум прашал. Во тоа мое изнесување јас сум прашал. Тогаш се здружија Зоран Заев и Али Ахмети за локалните избори во Струга против мене. И прашав ако сега веќе сакате политички да ме елиминирате, дали и во настаните од 27 април сте сакале и физички да ме елиминирате? Прашање беше, а како беше интерпретирано е друга работа.
Плус, се соочив со една невидена пропаганда во Струга, кога се ширеа памфлети на вратите на граѓаните Македонци дека јас мора да се казнам како политичар бидејќи сум бил монструм. За жал, тие пропаганди беа делени од активисти на ДУИ.
ЗАГАРАНТИРАНИ МЕСТА ЗА ЕТНИЧКИТЕ ЗАЕДНИЦИ
ФОКУС: Кај нас популизмот и пропагандата на националистичка основа секогаш успеваат во битката за политички поени. И да речеме дека точно е дека македонските партии често играат на таа карта во опозиција. Но, нели се случува и албански партии да ловат гласови на ист начин, претставувајќи се како заштитници од Македонците?
СЕЛА: Сепак, не е истото кај двете страни. Нашите политики не се ориентирани против Македонците.
ФОКУС: Ниту ВМРО не вели дека е против Албанците, туку дека е против ДУИ како извор на криминалот.
СЕЛА: Не, не. Сега кога веќе владеат е друга работа. Но, легитимитетот е важна работа што треба да се почитува.
ФОКУС: Како да се утврди кој го има легитимитетот кај Албанците, зашто вашата коалиција е мултиетничка?
СЕЛА: Лесно измерливо е тоа. Прво, со бројот на пратеници. Кои се Албанци. Второ, во сите резултати на ДИК во секое изборно место се гледа. Отворете избирачко место на Таравари и ќе видите дека е поразен во неговото место. Не велам дека ова прашање не треба да се регулира.
Како Европски фронт, кој гледа кон иднината, а не кон минатото, работиме на тоа да најдеме начин кој ќе се преточи во закон за ова правило да важи и да биде законски запишано.
ФОКУС: Говорите за анализата нарачана од странскиот експерт Пол Вилијамс за утврдување на легитимитет?
СЕЛА: Да.
ФОКУС: Што предвидува таа?
СЕЛА: Сакам да бидам коректен, кога ќе имаме нешто за јавно да соопштиме, ќе соопштиме преку Фронтот. Тоа треба да биде кауза на Европскиот фронт.
ФОКУС: Ако се направи анализа колку коалициските партнери на ДУИ освоиле на претходни избори сами и ако тој број на гласови се одземе од вкупната бројка на гласови што ја освои Европскиот фронт, испаѓа дека ДУИ самостојно тежи помалку од партиите обединети во ВЛЕН. Зар тоа не укажува на делегитимирање на ДУИ?
СЕЛА: Ако сакате начин, еве како е во другите држави. Треба да имаат загарантирани места сите етнички заедници. Прво треба да се одреди што мислат политичките партии за Албанците – дали се мнозинство или малцинство? Дали тезата за население, кое е автохтоно и кое е некаде 30 отсто или може повеќе од вкупниот број на населението може да го сметаш како малцинство? Која е дефиницијата за малцинство?
ФОКУС: Која ви е поентата?
СЕЛА: Сакам да ја разработам тезата во што навлегуваме, не сакајќи да зборуваме на овие теми и потоа ни се случува крах во системот. Ако не ја почитуваш волјата на една третина од вкупното население, си дал најголем придонес за тоа што денес секој ден слушаме изјави и по прес-конференции за сценарија за дестабилизација.
Во суштина, кој го прави тоа? Го прави владата. Тоа што го има најавено Мицкоски, дава политички наредби за да донесат одлуки, иницијативи во Уставен суд. Газиш пред легитимитетот на втората по големина етничка заедница и ти си создаваш таква ситуација.
Затоа, јас ја поставив тезата дека не може да се смета како малцинство население, кое во случајов е албанско, кое е над 30 отсто. И на тој начин, ако сметаат дека треба да бидеме малцинство, тогаш да го отвориме поглавјето на малцинствата.
Малцинствата заслужуваат да имаат гарантирани места. Ако зборуваме за гарантирани места, за Албанците треба да имаш гарантирани места од 30 отсто од вкупниот број пратеници. И плус да конкурираат во заедничката листа и Албанците ќе имаат 50 пратеници.
ПРАВИЛО „МАНДАТАР СО ПОБЕДНИК“
ФОКУС: Не сакам да говорам за бројки и таков тип аргументи, но мора да ве прашам зошто цело време оперирате со таа бројка од 30 отсто? Нели некоректно е да ги сметате и лицата во дијаспората, кои не се попишани како резидентно население, туку само се евидентирани?
СЕЛА: Кој го гради политичкиот систем на една држава? Тоа се гласачите. Друг поим е дијаспората. Овие наши граѓани што имаат куќи тука, имаат имот, си плаќаат данок, доаѓаат два-три пати годишно и трошат пари тука не се дијаспора. Дијаспора е некој иселен пред стотина години и има чувство дека неговите по потекло се Македонци или Албанци.
Политичките системи се градат од страна на гласачите преку изборот на нивни претставници што се викаат пратеници. Тие имаат право на глас и не можеш да ги исклучиш од вкупниот број население.
ФОКУС: Гласачкото право се остварува врз основа на државјанство и сите државјани имаат право на глас. Но, правилата за попишување налагаат да бидат попишани тие што се една година тука, ако не се, ќе бидат попишани во таа држава каде што се затекнати, за да нема двојно попишување. Затоа надвор немаше попис, туку евиденција.
СЕЛА: Секоја држава носи закон. На Евростат му треба информација за вкупниот број население во светот. За нив е доволно да знаат дека некој 2 пати се попишува. А ние што правиме и како ги третираме нашите граѓани, дали ги гледаме како синови на мајка или на маќеа, зависи од нас. Не ти налага Евростат ништо.
ФОКУС: Вие велите дека ВМРО прави дестабилизација, со тоа што игнорира изборен легитимитет. И еве да прифатиме дека Европскиот фронт е легитимниот претставник, а не е ВЛЕН. Но, не сметате ли дека вие го почнавте овој процес со преседанот да направите влада со СДСМ наместо со ВМРО во 2016 година? И зошто сега го модифицирате тоа правило „победник со победник“ во „мандатар со победник“?
СЕЛА: Јас никогаш не сум велел „победник со победник“. Ако зборувате со ДУИ, тоа е друго. Јас велам „мандатар со победник“. Делот што не е уредуван со закон е делот на изјаснувањето на легитимитетот на албанскиот политички фактор и гласач. Делот на македонскиот политички фактор се одредува со закон и устав. Ги победиш ли изборите, добиваш мандат, право да формираш влада.
ФОКУС: Мандатот го добива коалицијата што освоила најмногу пратеници, никаде не стои дека е македонска, албанска, мултиетничка. Теоретски, мандатарот може да не направи влада, па доаѓа следен, може и некој од Фронтот да биде мандатар.
СЕЛА: Но, не е прв. На овие избори, СДСМ и ВМРО направија договор, заедно со ВЛЕН ги повторија изборите во 5-та и во 6-та изборна единица, за да добијат плус пратеник и да скратат кај нас. Така, СДСМ веќе е втора партија откако нас ни скратија пратеник во шестата ИЕ.
„Мандатар со победник“ треба да биде стартно решение за да се почитува легитимитетот. На Груевски не му се скрати правото да формира влада, туку, според мои информации, тој никако не прифаќаше да прифати решение околу спорот за името со Грција.
И кога веќе си за НАТО и за ЕУ, во иста ситуација може сме и сега со членството во ЕУ, и знаеш дека услов, не од Бугарија, туку од ЕУ имаш, со самиот факт што си прифатил француски предлог, мораш да ги вметнеш Бугарите во Преамбулата. Ние треба да почнеме од тоа и да се формира владата по тој принцип, кога веќе викаш пред народот дека си за членство во ЕУ.
ФОКУС: Секогаш ќе се најдат доволно причини победникот да добие мандат, но да не формира влада. И кога со политички инженеринг се бајпасира мнозинска волја на мнозински народ, тоа завршува вака како што заврши со ВМРО-ДПМНЕ, со убедлива победа.
СЕЛА: Опасна е играта на Мицкоски, која не е измислена сега, туку ја играше Груевски – еден на власт, и заканувајќи се цело време дека ако имате барања што не се во програмата на ВМРО, ќе ги земам другите. Вистина во тоа нема, ама тој ги плаши кутрите од ВРЕДИ дека ние сме готови да влеземе во владата.
ПАРЛАМЕНТАРНИ СО ЛОКАЛНИТЕ ИЗБОРИ
ФОКУС: Имате ли комуникација со ВМРО, лично вие или како Фронт? Од СДСМ велат дека функционери на ВМРО секој ден се во Мала Речица…
СЕЛА: Јас немам комуникација со Мицкоски. Нормално дека партиите ќе комуницираат меѓу себе, не велам дека тоа е погрешно. Но, најмногу што го мразам како феномен е оние права што си ги даваат себе си одредени политички актери, кои јавно кажуваат дека ќе земат 3, 4, 8, 9 пратеници.
Тоа е скандалозно, политичари не треба така да се однесуваат, зашто наликуваат на обични измамници, блефери, пазарџии. Да се случи тоа, мора да има случување во некоја коалиција или партија.
Второ, кога го велат тоа, асоцира на тоа да купиш некој пратеник или да го уцениш. Нели и двете работи се казниво дело. Ова е феномен, за кој сум зборувал уште кога Касами од позиција на партнер на СДСМ викаше дека ќе земе пратеници од тогашната албанска опозиција на Алијанса и Алтернатива.
Во таков аморален правен систем живееме што ниеден обвинител не го вика на разговор тој политичар кој јавно вели дека ќе земе некој пратеник. Мора да го викне, да го праша на кој начин, за да не се осмели повеќе да го прави тоа.
ФОКУС: Какви се односите во Европскиот фронт и дали ќе настапите како коалиција на локалните избори?
СЕЛА: Европскиот фронт е заедно, имавме договор за парламентарните избори, дали тоа значи дека треба да одиме на локални избори заедно, тоа е предмет на договори што ќе се прават внатре во Фронтот. Ако имаме договор, ќе настапиме заедно, ако не, нормално ќе си ги гледаме интересите поединечно.
ФОКУС: Засега изгледа дека ќе настапите во два блока на изборите, на кои треба да се прекршат работите во албанскиот кампус по различните интерпретации на резултатот на парламентарните избори. Ако, да речеме, недвосмислено победите на локалните избори, кои ќе бидат вашите следни чекори?
СЕЛА: А дали сте сигурни дека нема да има парламентарни заедно со локалните избори?
ФОКУС: Најавувате ли дека ќе има?
СЕЛА: Според мои претпоставки, колку што го знам политичкото дејствување на ВМРО-ДПМНЕ, очекувам дека ќе има.
ФОКУС: Сакате да кажете дека ВМРО ќе ги предизвика, а не Европскиот фронт?
СЕЛА: ВМРО ќе ги предизвика. И ние имаме интерес, зашто во опозиција сме сега и нормално дека нема да поддржуваме нелегитимна влада. Може Мицкоски си има свој легитимитет, но кога зема во коалиција слуги, кои се по избор на ВМРО, а не на граѓаните, и ние ќе направиме сѐ за да предизвикаме избори и тие што се легитимни да станат дел од власта.
ВОДИМЕ КАУЗА ЗА ПРАВЕДНА ДРЖАВА
ФОКУС: Порано го обвинувавте ДУИ дека е синоним за криминал и партизација на државата, па потоа станавте партнери. Сега упорно се борите да станете дел од влада на ВМРО, која, пак, ја обвинувате дека е антиалбанска, а пред избори ја обвинувавте дека спроведува руска агенда итн. Зошто би сакале да бидете партнер со таква партија?
СЕЛА: Политиката не се прави по однос на себеси, туку по однос на другите политички чинители и по однос на тие со кои не се согласуваш за многу работи. Затоа, седнуваш и кроиш заедничка програма за владеење и принципи, а не како сега, кога не можеш да најдеш ниедна реченица во владината програма од ветувањата на ВРЕДИ.
Јас би сакал да нема никаде проруски политички чинители, да нема политики насочени против една или друга етничка заедница, но тоа не зависи од моите желби.
Јас ја гледам оваа реалност и мора да влезеш за да дејствуваш политички и овие предрасуди и политики настроени кон другите, како и во надворешната политика кон познанства и алијанси со недемократски држави и политичари за кои ништо не важат основните граѓански права, влегуваш за да ги минимизираш и да ги прекинеш тие врски што можеби постојат.
ФОКУС: Во една пригода не исклучивте протести, па дали може да кажете дека сигурно ќе ги има?
СЕЛА: Веројатно ќе има. Не сме хистерични за желбата да бидеме дел од власта, водиме кауза, која има за цел праведна држава кон граѓаните, без разлика на нивниот етнички идентитет, почитување на легитимитетот на етничките заедници, Северна Македонија со политички систем, која ја одразува демографската реалност што ја има, а не желбите на поединци политичари за мајоризација на едната етничка заедница врз другата.
ФОКУС: Сепак, така изгледа, бидејќи овие термини и наративи за дискриминација, мајоризација и нееднаквост почнавте да ги пласирате откако заминавте во опозиција. Претходните 20 години, додека ДУИ беше на власт, тие воопшто не беа дел од политичкиот дискурс.
СЕЛА: Зборуваш со претседателот на Алијансата за Албанците, а не со ДУИ, а ние секогаш сме биле во опозиција и секогаш сме разговарале и преточиле во политичка платформа на нашата партија. Легитимитетот добива на значење сега, бидејќи грубо се гази врз легитимитетот на Албанците, имајќи предвид дека ДУИ овие 20 години ги имаат победено сите избори.
Дали беа изманипулирани или не, е друго прашање, зборувам за сертифицирање на изборите од ДИК овие 20 години. Е сега и каква демократија имаме е друга тема. Секоја држава има демократија колку што има развиено средна економска класа. А ние ако видиме кој е процентот на сиромаштија, тоа е алармантно, тоа е 40-50 отсто. И сега каква демократија имаме кога половина од гласачите решаваат не со глава, туку со стомак?
Како и да е, се соочуваш со фактот на бројките и нема што друго, туку ќе продолжиш политички да дејствуваш и да работиме секој ден оваа средна економска класа да порасне, а тоа се прави преку економски развој, борба против корупцијата, деполитизиран правен систем итн.
ПРОТЕСТИ ЗА ОЗДРАВУВАЊЕ НА ДЕМОКРАТИЈАТА
ФОКУС: ДУИ го прогласи Рамковниот договор за нормативно затворен по законот за јазиците. Сега повторно го оживувате… Која е Вашата оценка?
СЕЛА: Јас сум се противел за таа дрскост дека некој си зема за право да затвори ова или она. Не е затворен Рамковниот договор и не може да се затворат политички теми.
Охридскиот договор е важен бидејќи донесе мир. Не можам да тврдам дека е лош, имајќи предвид дека спречил поголем конфликт, повеќе жртви и донел мир. Тоа е важно. Дали во договорот има одлуки што се донесени само заради мирот, а не заради правда – да.
Мислам дека повеќе треба да работиме на правдата, зашто така го градиме мирот. А ако работиш на мир по секоја цена и не ја градиш правдата, тоа не е мир. Затоа мислам дека треба да бидеме со отворени умови и да разговараме за сите овие теми ако сакаме да градиме иднина.
Не можам јас да си давам за право себе си дека Македонците треба да имаат едни основни права и никако да не размислуваат за друго, да не живеат со реалноста и со динамичноста на овој свет кој секој ден се менува. Па, ниеден политички актер кај Македонците го нема истото право и за Албанците.
Знаете што? Историјата на човештвото познава многу држави кои имале внатрешни проблеми. Државите што ги решавале внатрешните проблеми на цивилизиран начин и преку дијалог уште опстојуваат, а државите што не сакале да ги решат, биле принудени да одат низ тешки драми и пак да седнат преку дијалог да ги решаваат проблемите што ги имале, а има и такви што не постојат повеќе. Таква лекција ни дава историјата.
Во политичкиот дискурс во Македонија цело време се зборува за рамката за Охридскиот рамковен договор, но тој е дел од Уставот, треба да зборуваме за Уставот.
ФОКУС: Никаде, ниту во Рамковниот, ниту во Уставот, на пример, не се говори за партизација, а таа ни се случува постојано и насекаде. Како гледате на тоа?
СЕЛА: Затоа реков дека треба да бидеме со отворени умови, за да зборуваме за сите теми. До ден денес зборуваме дека оваа партија или онаа партија го контролира судскиот систем.
Уште од 2017 година, со големата најава „Нема правда нема мир“ дека ќе има вистински реформи во правосудниот систем, сум изјавил дека проблемот не е дека судската власт е политизирана, туку дека е владизирана.
Истите чинители на судската власт ја менуваат страната и се со другата власт. И политичкиот систем, политичките партии не работат да има деполитизирано судство, туку да се исполитизира и да биде за нивни потреби. Така не се достигнува важниот столб на секоја демократија -судската власт да биде целосно независна.
Исто така, битен столб се и медиумите. Во време на Груевски, сум дал изјава дека не е вината во владата, туку во волјата на медиумите, кои се ставаат на пазар и си ставаат цена за кого да работат политички. Без да навлегувам дека има и одлични новинари и медиуми, тие што одат и се пазарат и ставаат цена за професијата новинар да знаат дека ставаат цена на нивната слобода и нивните деца, цена на слободата на граѓаните.
ФОКУС: Интересна е пораката дека тие држави што не ги решавале внатрешните проблеми не постојат. Како да се сфати пораката, особено во контекст на тврдењата дека сите придобивки во делот на колективни права, сегашната влада ги анулира? Може ли тоа да се протолкува како предупредување за нова 2001?
СЕЛА: Јас само цитирав во однос на една историска реалност и како треба да се решаваат проблемите цивилизирано и да седнеме да преговараме околу политички теми и отворените прашања. Тешко е да се занимаваш и да лечиш параноја на некои политичари.
Јас како параноични ги гледам изјавите на оној заменик-премиер, кој тврди дека е прв, а Мицкоски вели дека нема прв или втор. Кога се менуваше таблата во Блаце и кога го снема албанскиот јазик, Меџити одговори дека ова е сценарио за дестабилизација.
Второ, го прашуваат министерот за внатрешни работи кои се вашите информации за најавите за дестабилизација наесен, кои реално се најави на владата, тој одговара дека ќе има протести. И дека ние сме спремни да одговориме на тие протести.
Протестите не се дестабилизација, туку демократско право, кои ја оздравуваат демократијата кога се става во прашање, ја враќаат на прав пат.
Затоа, Европскиот фронт се има изјаснето дека ќе ги преземе сите политички механизми, вклучително и протести, за да ја оздравиме оваа наша демократија, која е нападната од страна на Мицкоски и ВМРО-ДПМНЕ.
ФОКУС: Кога треба да се случат овие протести и можни ли се немири?
СЕЛА: Што би значело тоа со немири? Ќе има протести. А ако владата планира да инфилтрира луѓе за да врши сценарио, нека кажат, бидејќи во Македонија, за жал, такви вклучувања на власта преку такви луѓе се случувало особено кога протестирале Албанците.
ЕТНИЧКАТА ПРИПАДНОСТ НЕ Е ЧУВСТВО
ФОКУС: Ја споменавте таблата, но власта вели дека и законот за бранители предложен од СДСМ е дел од сценариото за дестабилизација, исто како и одлуката да се оценува уставноста на Законот за јазиците од Уставниот суд, каде што, според власта, судиите се избрани од СДСМ и од ДУИ. Токму Уставниот суд го замрзна и балансерот…
СЕЛА: Кој е ставот на ВМРО-ДПМНЕ за Законот за јазиците уште кога е донесен? Дека е неуставен. Кој е нивниот став за цело време на кампањата? И баш сега се отвораат тие теми, имаат направено иницијативи. Никој не може да ми скрати право да го бранам тоа што е достигнато со многу напор.
Нормално дека ќе протестирам во врска со тоа. И одговорот е нема ние да молчиме и ништо да не правиме во врска со тоа. Уште посилна ќе ни биде каузата, на пример, кога зборуваме за албанскиот јазик, да го решиме како што треба преку Устав. Да се промени формулацијата.
По грешка ги делите судиите на СДСМ и на ДУИ, бидејќи гласањето на денот за балансерот беше по етничка линија. Македонските уставни судии гласаа за ставање во мирување, а сите други етнички заедници гласаа против. Тоа е гласање по етничка линија, а не по партиска.
Многу поскандалозно е образложението дека етничката припадност е чувство. Тој кој си го менува чувството за работно место и од Македонец се прави Албанец, или обратно, тој ниту некогаш бил Албанец или Македонец. Тие граѓани немаат никакво чувство. Јас сум тоа што биле моите родители.
ФОКУС: Ве разбирам што сакате да кажете, но како да се нормира припадноста кон една или друга етничка заедница, ако тоа не се прави со декларирање, кое гледаме дека варира според потреби?
СЕЛА: Нормирано е. Не случајно документите што се издаваат, се издаваат врз база на тоа што ти пишува во матичната книга. Ако сакаш да го смениш, има попис на секои 10 години. Има механизми како да се среди.
Во сертификатите требаше да стои етничката припадност, но Уставен суд го урна за да и даде уште повеќе замав на оваа анархија со балансерот. Наместо да даде придонес, да се спречи ваквата најава, укина закон од времето на Југославија, и сега уште похаотичен го направи системот.
Со ваквите решенија уште похаотично ќе го направи битието на Северна Македонија, бидејќи живееме во ера на национални држави од време на француската револуција. Дали се мулти или еднонационални држави е друго прашање.
Но, јас не познавам случај во светот каде што има граѓански Устав без базата на креирање и функционирање да ја има во етничката припадност. Е сега со најавата дека било чувство удираш во основата на градењето на една држава.
И таквите судии кои за дневно-политички цели си даваат за право да даваат вакви образложенија треба да знаат дека отвораат сериозна и опасна тема и за македонскиот и за албанскиот идентитет. Не сакам да кажам дека ова личи на истото она залагање, на пример, дека нема татко и мајка, дека има родител 1 и родител 2. Или дека немаме само 2 пола, туку повеќе.
ФОКУС: Како и да е, факт е дека балансерот не функционира како механизам, прашањето е дали треба да се укине, награди или да се реши со нов закон.
СЕЛА: Кога направивме договор за влада со Заев и Ахмети уште во 2017 година, јас предлагав закон за правична застапеност, бидејќи секое право стои во уставот и за да се спроведе треба да се преточи во закон.
Затоа јас и давам значење на формулацијата дека чувство била етничката припадност, бидејќи во тој случај, еве носиме закон за правична застапеност, според оваа логика, пак етничката припадност ќе биде чувство. Значи и тој закон ќе падне на Уставен суд. Треба да се ретерира зашто Уставниот суд еднаш се изјаснува за една работа.
Ако стои дека тоа ти е чувство тогаш со кое право некој нема утре да каже дека јазикот што го зборуваат над 20 отсто од населението не е албански јазик, тоа било пред 2 години кога имало попис, сега не е, зашто од кај да знам јас за чувството на луѓето, зарем секој ден треба да ги прашуваме?
ФОКУС: Давате значење за формулацијата на уставен, но зошто не давате значење на она што го констатираше Европската комисија, според која балансерот се злоупотребува и ја загрозува независноста на институциите?
СЕЛА: Јас спремам еден закон за правична застапеност, размислував во делот што го реков да важи последниот попис кога си се изјаснил и тоа место треба да се загарантира. Или имајќи предвид дека се укина делот на припадност во матичната книга и етничката припадност да стои во изводите на родените, треба да стои. Има и друга работа – ако си Албанец треба да знаеш албански.
Зошто треба да има правична застапеност? Зашто има граѓани од сите етнички заедници кои бараат услуга. Сега се враќаме на логиката дали фактот што ќе имаме различни етникуми во администрацијата има за цел да им служи на сите граѓани или целта е сите овие граѓани да им прават услуга на овие администратори за да земаат плати? Додека не размислуваме со идејата дека администрацијата е во служба на граѓаните, ние немаме европска иднина.
Второ, за правичната застапеност, на пример во Тетово… Основниот суд дава услуга во регион каде што 80 отсто се Албанци. Кога таа реалност ќе се отсликува во судии, обвинители, полицајци итн., ќе се минимизираат оние за кои цело време зборуваме политички или етнички мотивирани случаи. Тоа е придонес за иднината.
Овој систем не е перфектен, ништо не е перфектно. Ние ја имаме оваа реалност и менталитет, за некои работи многу подобар од менталитетот во ЕУ, за некои работи многу полош. Ние треба да ги прифатиме вредностите на ЕУ, но да ги чуваме и нашите особини, и тоа е многу важно во време на глобализација, кога ние како мали народи единствен спас за да не нѐ снема е да се држиме до нашите вредности.
Затоа велам дека етничката припадност не е чувство, туку начин на живеење, јазик, како сонуваш, традиција…
АНЃУШЕВ БЕШЕ СТАВЕН НА ЦРНА ЛИСТА ПО ИНИЦИЈАТИВИТЕ ЗА СОРАБОТКА МЕЃУ ВМРО И СДСМ!
ФОКУС: Дали сметате дека Заев одработи за Мицкоски на последните избори, бидејќи имаше такви информации?
СЕЛА: Кога зборувам за овие феномени претпочитам да зборувам за политички збиднувања и јавни изјави во минатото. Дали имаше изјава меѓу Мицкоски и Заев за време на кампањата и дадена рака меѓу нив дека ќе направат коалиција по изборите меѓу ВМРО и СДСМ со исклучување на албанскиот политички фактор? Тоа се случи во студио за време на кампања, 2020 година. Тоа е најава.
Потоа проструи, исто така, една информација по медиумите дека треба да се направи коалиција меѓу ВМРО и СДСМ, со исклучување на ДУИ додека станеме рамноправна членка на ЕУ. Но, за таква најава постои ризик. И во време на СФРЈ сме имале претставници во власта, но не го претставувале народот.
Исто е сега со легитимитетот за кој зборуваме. Јас имам право да се сомневам. Да земаш политички губитник кај Албанците како дел од власта, па потоа да создаваш ситуација кога ќе немаш потреба од организирана партија кај Албанците, па ќе земеш индивидуалци Албанци, па на Албанците ќе им кажеш еве имате претставници во власта. Оваа идеја наликува многу на тоа што Заев правеше.
ФОКУС: Сепак, треба да се има предвид дека Заев промовираше концепт „Општество за сите“ и успеа да дојде на власт со широка поддршка од албанските гласачи.
СЕЛА: Светот е општество за сите, но дали системите се праведни пред сите? Ние сме Европејци, но не сме дел од ЕУ, затоа велевме држава за сите.
Имаше информација и за средби меѓу Заев и Мицкоски, со олигарси внатре. А дали имаше ставање на црна листа на некои олигарси по овој период? Кочо Анѓушев после овие иницијативи беше ставен на црна листа.
ФОКУС: Според вас, затоа е ставен?
СЕЛА: Кога веќе јасно се покажа од страна на меѓународниот фактор дека таква идеја е неприфатлива, бидејќи ќе удира врз стабилноста на државата, а за целта зошто тие го правеа тоа немам информации, но претпоставувам дека се работи за бизнис зделки.
Не е во ред во општество како Македонија да се зборува за корупција, корупција, и да се ставаат во заборав некои што биле премиер долги години. Кој е договорот?
ФОКУС: Да не е амнестија?
СЕЛА: Не знам бидејќи ги паметите и сликите и она кога се појавуваше Сашо Мијалков кога цела држава се прашуваше каде е, а кога тој се појавуваше, имаше новинар што го чекаше да излезе. Сега, да не се правиме наивни.
Кога не може да се постигне такво нешто преку договор меѓу македонските политички партии, бидејќи тоа директно удира врз стабилноста на државата, зашто тоа може да го прави и албанскиот политички фактор како одговор на таква иницијатива, тогаш што правиш? Ги соединуваш гласачите и за тоа никој не може да ти забележи, зашто ќе велиш дека тоа е волја на гласачите.
И да одговарам на прашањето – мислам дека тезата држи дека ВМРО е помогната за да постигне апсолутна власт, а за жал поддржувачите и членството на СДСМ во овој случај се жртва.
НЕ ВЕРУВАМ ДЕКА ГРУЕВСКИ ИЗБЕГА БЕЗ ЗНАЕЊЕ НА ЗАЕВ!
ФОКУС: Што се случи со Груевски? Побегна или беше пуштен?
СЕЛА: Не верувам дека Груевски избега од државата без знаење на Заев. Груевски беше проблем за Заев бидејќи, иако беше во опозиција и почна против него да има обвинувања, сепак, важеше за политичар кој има повеќе поддршка кај Македонците.
И на Заев му требаше Груевски да избега како што избега за да падне неговиот рејтинг кај граѓаните и пред неговото членство. Мислам дека тоа му отвори пат на Груевски да избега, зашто многу држави треба да се поминат, не е толку едноставна таа работа за таква политичка фигура.
ФОКУС: А дали имаше обид на претходната власт да го врати Груевски за да се поткопа ВМРО и да се истуркаат уставни измени, како што обвинуваше Мицкоски?
СЕЛА: Да тврдам дека не сум слушнал такви планови и информации, сакам да бидам транспарентен, и да, сум слушнал, како што сте слушнале и вие.
ФОКУС: Сте слушнале од медиуми и на јавна сцена или во некакви затворени кругови?
СЕЛА: Овие разговори изникнаа во медиуми бидејќи беа дел и од политичките разговори што се случуваа во Македонија. Дали има вистина во таа работа не можам да знам, бидејќи не сум бил дел од таквите планови.