Интервјуто е објавено на 16 февруари 2023 година во неделникот „Фокус“ со број 1428
Кумановскиот градоначалник, Максим Димитриевски неделава ја промовираше политичката партија Движењето за наша Македонија-ЗНАМ, чиј идеен творец е токму тој. Претставниците на 10 граѓански здруженија дадоа поддршка движењето да прерасне во политички субјект. -Ќе мораме да ја направиме Македонија самоодржлива држава, не може да доаѓаат од надвор да ни ги земаат ресурсите, а ние да бидеме кираџии – рече Димитриевски. Тој веќе втор мандат е на чело на втората по големина општина во Македонија, откако на последните локални избори во Куманово ја победи матичната партија СДСМ по што почна локална соработка со ВМРО. Во интервју за „Фокус“, тој зборуваше за разидувањето со СДСМ, за неговото граѓанско движење „За наша Македонија“, а се осврнува и на односите со Бугарија. Како што вели, владата на Заев станала софистицирана варијанта на режимот на Груевски
Разговараше: Фросина ФАКОВА СЕРАФИНОВИЌ
ФОКУС: Вашиот настап на Бугарската национална телевизија предизвика големо внимание. Во медиумите имаше дури и наслови, „Максим Димитриевски се врати од Бугарија како Ѓоковиќ од Австралија опен“. Така ли се доживувате?
ДИМИТРИЕВСКИ: Не сум поборник на бомбастични наслови. Мојата единствена цел е да се градат добри односи со сите наши соседи. Во таа насока беше и моето гостување на Бугарската национална телевизија. Јас таму го соопштив и го бранев мојот долгогодишен став, а верувам дека тоа е ставот и на мнозинството Македонци во Македонија. Сметам дека политиката на „наведната глава, сабја не ја сече“ или политиката на „виткање кичма”, особено кога се работи за државните и национални интереси, не дава резултат.
ФОКУС: Како, според Вас, треба да се поставиме и да разговараме со соседите?
ДИМИТРИЕВСКИ: Ние со нашите соседи треба да разговараме отворено, со однапред поставени црвени линии, кои ќе го заштитат постоењето на македонскиот народ, јазик, историја, култура и неговиот континуитет. Се надевам дека ако тоа аргументирано им го објасниме на нашите соседи, но и на нашите партнери во ЕУ, наместо да прифаќаме сѐ што ќе побараат од нас, ќе нѐ разберат и нема да го блокираат нашиот европски пат.
ФОКУС: Но, власта уверува дека идентитетот и јазикот никогаш не биле тема на разговор.
ДИМИТРИЕВСКИ: Во спротивно треба да се самопоништиме. За мене тоа е неприфатливо, затоа што во Европската Унија треба да влеземе како Македонци, кои говорат македонски јазик, со своја, а не со заедничка историја, достоинствено, како што тоа го направиле сите народи на земјите-членки на Унијата. Постоењето на еден народ и јазик е основната вредност на ЕУ, а почитувањето на националната и етничката припадност, особено на малите народи е еден од основните постулати на Унијата, која има за цел да ги заштити помалите, а не како во овој случај да им овозможи на поголемите да присвојат или да избришат.
ФОКУС: Каков е амбиентот во Бугарија во однос на Македонија?
ДИМИТРИЕВСКИ: За жал и од двете страни, амбиентот на добрососедство го креираат политичари што не можат да се носат со дадените предизвици, а граѓаните, и на Македонија, и на Бугарија се колатерална штета во целиот процес.
Поради таквите импровизации на поединци, недефинирани договори држени во тајност, ад хок предлози, несреќни изјави во кои окупатори се претставуваа како администратори и голем број други круцијални грешки нѐ оддалечија многу од патот на Жељу Желев и Киро Глигоров, кои единствени, со мудрите и умни политики успеаја, по долгогодишните лоши односи, да ги приближат нашите два народа, кои реално се блиски.
ПОФАЛБИ ЗА ПОЛИЦАЈЦИТЕ, НЕ ЗА МВР
ФОКУС: Иако секогаш ја критикувате власта и институциите за односот кон Бугарија, сепак застанавте на страната на македонската полиција и ги пофаливте полициските службеници на Деве Баир за професионалноста и трпеливоста.
ДИМИТРИЕВСКИ: Да, застанав во заштита и им упатив честитки на македонските полициски службеници на граничниот премин Деве Баир за добро завршената работа. Тие покажаа високо ниво на професионалност, трпение, но и оперативно дејствување. Иако беа навредувани, провоцирани и во одреден момент напаѓани вербално, па и попречувани, согласно безбедносните стандарди и високото ниво на ризик во дадената ситуација, сметам дека беа на висина на поставените работни задачи.
ФОКУС: Кој ги навредуваше македонските полициски службеници? На кого мислите?
ДИМИТРИЕВСКИ: Ако ги погледнеме сите изјави на лицата што дента беа снимени на граничниот премин и ги навредуваа нашите полициски службеници при влез во Македонија, ќе се потврди фактот дека добар дел од нив се и претставници на медиуми што недолично се однесуваа кон нашите полициски службеници, а подоцна се жалеа дека им бил попречен и оневозможен влезот во Македонија.
Дали доколку некој наш граѓанин или новинар се однесува, исто така, при премин на државна граница и влез во Бугарија, ќе му биде дозволен влезот или овозможен непречен премин? Секако не, а во многу случаи претходно, наши новинари биле третирани слично и не им бил дозволен влез веднаш во Бугарија, но, за жал, никој тоа не го експлоатирал во јавноста, а најмалку нашите политички претставници.
ФОКУС: Дали тоа значи дека застанавте во заштита и на МВР, институција кон која своевремено испорачувавте низа обвинувања?
ДИМИТРИЕВСКИ: Треба да направиме јасна дистинкција во чија заштита застанав, на полициските службеници, но тоа не се однесува на раководството на МВР, бидејќи тие претходно се среќаваа, менаџираа и се договараа со своите колеги од Бугарија и на крајот излезе дека не се договорија ништо, а самото одбележување на големиот датум остави слика во јавноста дека празнуваме под полициска заштита еден голем празник во сопствената држава, што, според мене, не е потребно, а најмалку обезбедување кога сакам во сопствената држава да се поклонам и да оддадам почит на некој од нашите великани како што е Гоце Делчев.
ФОКУС: Како ја оценувате организацијата на денот на чествувањето на роденденот на Гоце Делчев, на што и Вие присуствувавте?
ДИМИТРИЕВСКИ: Гоце Делчев е еден од најголемите борци за независна македонска држава, револуционер, борец и личност од најголемо значење во нашата историја. Гоце Делчев е Македонија, Македонија е Гоце Делчев. Чествувањето на неговиот роденден требаше да биде празник за сите македонски граѓани.
Но, сведоци бевме дека и официјално пријавени делегации чекаа по неколку часа за да изразат почит на ликот и делото на Гоце Делчев. Да не зборуваме за обичните граѓани што немаа никаков пристап до гробот на Гоце Делчев. Тоа е недозволиво. Самото место на одбележување беше блокирано неколку дена пред чествувањето, што за мене е срамно и недостоинствено.
ДИПЛОМАТИЈАТА Е ТОТАЛНО ФИЈАСКО
ФОКУС: На што се должи тоа?
ДИМИТРИЕВСКИ: Тоа е резултат на катастрофалните политики на владата и лошото планирање на раководството на МВР. Таквата ситуација и ваквото одбележување никогаш повеќе не треба да се повтори. Гоце ги сакал сите и сите го сакаат Гоце, и ние треба да се гордееме со тоа. Без разлика кој од каде или од која држава доаѓа, или кој за чиј потомок се претставува. Неговите посмртни останки се тука, неговата последна желба е да почива во Македонија, и тоа се најсилните аргументи во делот на многуте оспорувања кој бил и за што се борел Делчев.
ФОКУС: Каков треба да биде односот на македонските власти кон Бугарија? Таа е во Европската Унија, ние не сме, па оваа борба е неправедна.
ДИМИТРИЕВСКИ: Моменталната политичка ситуација на односите меѓу Македонија и Бугарија, или „слабиот и силниот“, или земја-кандидат за членство во ЕУ и членка на ЕУ, е резултат на досегашната погрешна и површна политика на нашите влади во изминатите шест години, тотално фијаско на нашата дипломатија, која е резултат на непрофесионализам и недостиг од искуство поради растурениот дипломатски државен капацитет, кој се растура со децении наназад поради незапомнета партизација низ која поминавме во дипломатскиот сектор и газење преку дипломатите од кариера. Таквиот однос го зема својот данок, всушност поради тоа денеска имаме резултат на вакви лоши меѓудржавни договори и предлози што им штетат на нашите државни и национални интереси.
ФОКУС: Сепак, оваа владејачка структура и дипломатија обезбеди членство во НАТО и формален почеток на преговори со ЕУ, а сите политичари тврдат дека друга алтернатива за Македонија нема, освен ЕУ.
ДИМИТРИЕВСКИ: Јас знам дека меѓудржавни договори и умешност за креирање добрососедски односи се компромис. Но, кога тој е едностран, тогаш е погубен и штетен. Тогаш тоа не е компромис, туку е очигледен притисок, кој во нашиот случај е евидентен.
ФОКУС: За што се залагате Вие?
ДИМИТРИЕВСКИ: Силно се залагам за политика на реципроцитет и промовирам веќе подолг период декларација позади која ќе застанат сите релевантни македонски политички субјекти, каде што ќе бидат испишани нашите национални црвени линии, а со тоа ќе се засили нашата преговарачка позиција и сега, и секогаш во иднина.
Нашата Македонија, географски и цивилизациски, припаѓа во Европската Унија и ние друг пат и избор немаме. Тоа е нашата стратешка цел и по тоа прашање постои консензус од сите политички партии во Македонија. Јас, сите ние не сакаме да припаѓаме на Западен Балкан – феномен што дефинира дел од југоисточна Европа, по мое толкување „на некои лоши момци“, кои чекаат пред портите на Европа.
ФОКУС: Како сметате дека треба да нѐ третира Европа?
ДИМИТРИЕВСКИ: Ние сме родени на европскиот континент и сме дел од Европа. Таа, како наш традиционален партнер, не правејќи разлика меѓу нас и другите, час поскоро треба да ја прифати таа реалност, да нѐ прими, и да изнајде начин како ќе ги спречи поголемите членки на Унијата да не го спречуваат прогресот на помалите, бидејќи во спротивно, доколку е пасивна, на овој план ќе се остави простор граѓаните да бараат други алтернативи во меѓународните односи, а под тој граѓански притисок да попуштат и актуелните политички елити, бидејќи нив ги избираат граѓаните. Македонија има своја стратешка цел во ЕУ атлантските интеграции, географски и цивилизациски припаѓа на Европската Унија и ние друг пат или избор немаме.
ПАТРИОТИЗМОТ НЕ Е ЕРЕС
ФОКУС: Политичките опоненти Ве обвинуваат дека зад Вашата патриотска реторика се крие популизам, со цел окрупнување на Вашето гласачко тело. Тоа ли ви е целта?
ДИМИТРИЕВСКИ: Не знам зошто мојата реторика претставува проблем за некого. Од кога тоа во Македонија патриотизмот е ерес? За мене, да се сака државата, е патриотизам, да се брани нацијата и јазикот е патриотизам, да се негува историјата е патриотизам. Обратно треба да се постави прашањето. Кој е тој што не чувствува во себе патриотизам?
Во јавноста, од повеќе партии и личности, беа поставувани повеќе прашања. Себеси се сметам за искрен, директен, јасен и прецизен политичар. На таков начин ги изнесувам и ги споделувам со граѓаните моите ставови и мислам дека тоа е единствениот исправен пат.
ФОКУС: Дали тоа го правевте доследно низ сите изминати години?
ДИМИТРИЕВСКИ: За да нема никакви дилеми, би сакал да направам ретроспектива на моите ставови. Бев сериозен поддржувач и искрено верував во политиката на мојата тогашна партија СДСМ – „живот за сите“. Сметав дека таа политика ќе обезбеди рамноправност, правда и солидарност за сите граѓани подеднакво.
Верував во влада без корупција, верував во влада и визија, која ќе овозможи подобар живот и стандард за граѓаните. Во тоа време, во Македонија владееше диктаторски режим предводен од Никола Груевски, државата беше поделена, изолирана и руинирана, а владата корумпирана.
Паролата „Нема правда, нема мир“, за мене е важечка и до ден денес. За жал, голем дел од раководството на тогаш мојата СДСМ, која влезе во новата влада предводена од Зоран Заев и малата група околу него ништо од тоа не исполни. Напротив, стана софистицирана варијанта на режимот на Груевски. Односно стана сѐ против што се борев.
ФОКУС: Кога го сфативте тоа? Кога се освестивте?
ДИМИТРИЕВСКИ: Во раното практикување на власта јавно, но и во партиски рамки се спротивставував на одредени политики во различни области (образование, здравство, труд и социјална политика, безбедност, државни и национални интереси).
Првично бев сменет од позиција на извршен одбор во партијата во 2018 година, заедно со професорот Петар Атанасов, а подоцна и од член на централен одбор на партијата. Јас ги спротивставив моите ставови со раководството во партијата кога тие практикуваа апсолутна власт, и на централно, и на локално ниво.
Поради тоа имаше повеќе обиди за моја прикриена политичка елиминација низ различни форми на лажни кривични пријави, монтирани истраги и други обиди за кои јавноста знае, а тоа е потврдено и за некои од нив се водат постапки против лица што се актери во тие дејствија пред надлежни судови.
ФОКУС: Зошто во 2017 и во 2018 година, кога сѐ уште бевте пратеник, не се произнесовте за случувањата со договорот со Бугарија?
ДИМИТРИЕВСКИ: Договорот за добрососедство, пријателство и соработка меѓу Македонија и Бугарија е една од главните причини за моето разидување со тогашното раководство на мојата партија, односно владата.
Мора да нагласам дека тој договор беше потпишан и чуван во тајност, набрзина, без соодветна дебата во јавноста и недостиг од расправа во партијата и во јавноста. Едноставно, на тогашното раководство му текна да потпише меѓудржавен договор без да направи консултации со раководството на партијата, да отвори расправа меѓу членството и во јавноста, белки сметаа дека прават договор меѓу два субјекта, од кои едниот е нивна лична своина.
ИНТЕРВЈУТО ЗА БГНЕС ЈА ПРЕЛИ ЧАШАТА
ФОКУС: Иако договорот беше критикуван, сепак немаше некои жестоки реакции од никого, вклучително и од Вас.
ДИМИТРИЕВСКИ: Во јавноста овој договор беше предмет на критики, особено во делот што се однесуваше на наводно „заедничката историја“. Но, сепак, можам да констатирам дека реакцијата на јавноста не беше доволно силна за да се спречи потпишувањето на овој договор.
Веднаш по потпишувањето следеа пораки што го негираа постоењето на македонскиот народ, од тогашниот министер за одбрана на Р. Бугарија, господинот Каракачанов, за кои веднаш реагирав во јавноста, и во знак на протест, го вратив орденот што претходно ми беше доделен токму од него.
Несреќното интервју на тогашниот премиер, господинот Заев, за бугарската телевизија БГНЕС ја прели чашата и ние де факто тука за првпат и официјално тргнавме секој по својот пат. Потоа, од разни европретставници доаѓаа неколку предлози за можно решение што ќе го отвори патот на Македонија кон ЕУ и сите беа одбиени од нашата влада, вклучувајќи го и францускиот предлог.
ФОКУС: Што е со францускиот предлог, каков е Вашиот став за него?
ДИМИТРИЕВСКИ: Изненадувачки, седум дена по одбивањето на францускиот предлог, се појави таканаречениот старо-нов „модифициран“ француски предлог и тој беше прифатлив, и за владата, и за претседателот на државата. За мене овој предлог е целосно неприфатлив, штетен и директно задира во македонските национални интереси.
ФОКУС: Зошто? Овој предлог стана дел и од преговарачката рамка…
ДИМИТРИЕВСКИ: Овој предлог, во ваква форма, не го отвора патот на нашата земја кон стратешката цел, почеток на преговори со ЕУ, туку ја зголемува можноста за долгорочна блокада од страна на Бугарија и претставува опасност за долготрајна асимилација на македонскиот народ, т.е. селективна бугаризација, која, всушност, е активна и во моментов.
ФОКУС: Кои делови, според Вас, се најспорни?
ДИМИТРИЕВСКИ: Во вториот протокол потпишан од министрите за надворешни работи на двете држави, кој сега е дел од преговарачката рамка, јасно се наведени одредбите и темите, но и условите што треба да ги исполниме за да ги почнеме преговорите со ЕУ: говорот на омраза, ревизија на учебниците, промена на написите на спомениците, рехабилитација на жртвите од комунизмот, отворање и оспорување на идентитетот на македонските историски личности и сл., па се прашувам кој кого окупирал во минатото – ние Бугарија или таа нас.
Кој ги убиваше луѓето во нашата земја за време на окупацијата? Кој се обидува Македонија да ја прикаже како држава агресор и репресивна страна, кога во нашата историја никогаш никаде никого немаме ниту нападнато, ниту, пак, поробено или окупирано?
Ние со потпишувањето ваков документ самите се доведовме во ситуација на инфериорност и трансформиравме еден еднострано наметнат билатерален проблем во мултилатерален проблем.
ФОКУС: Зошто е проблем вметнувањето на Бугарите во Уставот, кога тие ќе бидат еден од многуте народи наведени во Преамбулата, а тоа ќе ни ги отвори преговарачките поглавја со ЕУ?
ДИМИТРИЕВСКИ: Основен услов од овој предлог е вметнување на Бугарите како државотворен народ во нашиот Устав, што не е проблем за држава како Македонија, која гради мултиетничко општество, но доколку се работи за народ што не ви ја негира државноста и македонската нација, што во случајов од страна на официјална Бугарија сме брутално негирани во континуитет, т.е. од нивни официјални претставници и носители на различни јавни функции.
На крајот можам да констатирам дека владата на Македонија доби меѓувладина конференција за сликање, поткрепена со ПР стратегија за некаков наводен успех, а граѓаните кај нас доживеаја големо понижување.
ФОКУС: Дали имате сличен став и за Преспанскиот договор? Дали заговарате негова ревизија?
ДИМИТРИЕВСКИ: Во однос на Преспанскиот договор, со кој не сум среќен до крај, како и многумина Македонци, а со него се смени уставното име на нашата држава Република Македонија, но се зачува македонската посебност, идентитет и јазик и претставува компромис кој на Македонија ѝ отвори можност да влезе во НАТО и да затвори едно битно безбедносно и стратешко прашање.
Тоа беше, исто така, договор за кој многу малку во тој момент, кога се водеше кампањата за референдумот, сите ние бевме информирани и ниту во еден момент не добивме информација дека ќе се откажеме од етничкото македонско малцинство во Грција како и асномските определби од Уставот, некористење на нашите автентични топоними за Егејска Македонија и друго.
Секако, историјата на крајот ќе суди кој, дали и на каков начин постапувал исправно, но Преспа беше влог во иднината на државата и повеќе никогаш никој не може да нѐ заплашува дека Македонија нема да постои бидејќи влеговме во колективниот систем за безбедност НАТО како 30-та држава-членка.
БУГАРИТЕ ТРЕБА ДА СЕ ИЗВИНАТ
ФОКУС: Вие кажавте дека на спомениците во Куманово нема да ги избришете натписите на кои пишува „бугарски фашистички окупатор“.
ДИМИТРИЕВСКИ: Да, токму така. Историјата не може да се менува. Од 1941 до 1944 година, тогашна царска Бугарија беше официјално дел од фашистичката коалиција предводена од Германија и Адолф Хитлер. За тоа постојат безброј докази, фотографии, филмови, пишани и усни сведоштва.
Неприфатлива е тезата од актуелното бугарско раководство дека во тој период, бугарската фашистичка војска била администратор во Македонија, а не окупатор, воедно голем процент од бугарските полициски сили, наводно, биле составени од домашното македонско население, чиста лага, измислица, желба за самоамнестирање.
Само во мојата Општина Куманово има над 900 жртви што се убиени во тој период, а најголем дел се убиени токму од бугарската окупациска армија и полиција.
ФОКУС: Да, но колку историјата треба да биде пречка за изградба на иднината?
ДИМИТРИЕВСКИ: За таквите дела треба да се извинат како што тоа во минатото го стори Германија, впрочем тоа е обврска на официјална Бугарија и од Бледскиот договор. Согласно овие историски факти, во Куманово нема да се избришат натписите на спомениците во кои стои бугарски фашистички окупатор во соработка со домашните предавници, четниците и балистите.
ФОКУС: Со што друго го образложувате овој Ваш став?
ДИМИТРИЕВСКИ: Зошто таблите во Македонија се проблем, а исти такви табли имаме на територија на цела денешна Хрватска, особено во регионот на Далмација и Истра, каде што на нив пишува италијански фашистички окупатор. Хрватска е официјална членка на ЕУ, а во ниту еден момент Италија не ја негираше историјата, ниту, пак, бараше ваквите спомен-плочи и споменици да бидат коригирани. Таквиот чин на бришење и менување на таблите би претставувал чин на самонегација и предавство на нашите предци, кои ги дадоа своите животи за сопствената држава, слободна и независна Македонија.
ФОКУС: Како функционирате како градоначалник во вториот мандат, откако веќе не сте заедно со владејачките партии на централно ниво – СДСМ и ДУИ?
ДИМИТРИЕВСКИ: Кога сте директно должник на граѓаните, а не на политички субјекти, секогаш е полесно, бидејќи граѓаните се вашиот приоритет. Без разлика на многуте опструкции што доаѓаат од централните нивоа на власт, ние на локално ниво успешно се справуваме со проблемите и Куманово се развива и гради, а тој процес не може да го спречи никој.
Најмалку може со укинување на средствата од страна на државата наменети за кумановска „Соколана“ или други проекти, бидејќи Општина Куманово е веќе финансиски стабилна општина и зависи исклучиво од граѓаните. Секако дека е добредојдена секаква помош, но во иднина ќе креираме таков политички амбиент, во кој ќе му надоместиме сѐ на Куманово.
ФОКУС: За какви опструкции говорите?
ДИМИТРИЕВСКИ: Лажни се тврдењата на поединци од власта, особено на функционерите во централната власт во Куманово, дека тука кај нас се инвестираат милиони. Сѐ што е инвестирано во нашиот град е инвестирано од средства на нашите граѓани и даноците и таксите што ги плаќаат на локално или на централно ниво. Притисоците и опструкциите никогаш не престанале, но се навикнавме и не им обрнуваме внимание и нашиот приоритет се исклучиво граѓаните, а со интриги нека се занимаваат други.
НЀ МАЛТРЕТИРАА, НО ПОБЕДИВМЕ
ФОКУС: За време на изборната кампања објавивте видео и тврдевте дека полицијата на Оливер Спасовски ви врши тортура. Кажавте дека подолг период сте следени од возило на МВР и дека сте биле застанат од полицаец без никакво образложение.
ДИМИТРИЕВСКИ: За овој предмет се води предмет пред обвинителство за организиран криминал, а, исто така, и за предметот во корона-кризата, за кои, за жал, епилогот ми е однапред познат.
Морам да кажам дека во тој период бев под силна полициска присмотра и притисок, но не само јас, туку и сите активисти на граѓанското здружение „За наше Куманово“. Достоинствено се изборивме со сите овие притисоци, кои наликуваа на претходниот режим. Имавме момент кога одделни наши членови беа и физички малтретирани, напаѓани, па и претепувани од страна на лица за кои имаме сознанија дека се вработени во органите за безбедност.
За жал, во заробен систем и држава немате можност таквите предмети да ги процесуирате до крај, што не значи дека еден ден целата правда нема да излезе на видело, откако ќе ја ослободиме државата и ќе обезбедиме обвинителско-судскиот систем реално да функционира, а не по потреба.
ФОКУС: Каков е вашиот однос со вашиот сограѓанин Спасовски?
ДИМИТРИЕВСКИ: Не можам да најдам соодветен збор за да го дефинирам односот меѓу мене и г-динот Спасовски. Ние сме со различни убедувања, различно ја практикуваме довербата дадена од граѓаните и сме со дијаметрално спротивни политики. Го немам сретнато во Куманово.
ФОКУС: Како функционира советот на Општина Куманово, каде што соработувате со ВМРО, Левица, Алијанса и Беса?
ДИМИТРИЕВСКИ: Засега нема пречки од страна на сите советнички групи од различна политичка провениенција во рамките на Советот на Општина Куманово. Секако има различни мислења и ставови за одредени точки од дневниот ред, што е разбирливо.
Но, исто така, морам да потенцирам дека има и одлуки што се носат со консензус. Седниците на советот се јавни, транспарентни и директно се пренесуваат на локалната телевизија во Куманово, како и на официјалните социјални мрежи и веб-страна на Општина Куманово, а претседателката на Советот успешно менаџира со седниците.
ФОКУС: Како функционира соработката со ВМРО-ДПМНЕ, со оглед на тоа што Вие на „крвавиот четврток“ бевте жртва на нападот во Собрание?
ДИМИТРИЕВСКИ: ВМРО-ДПМНЕ, како и дел од другите помали политички партии, во советот беа прагматични и го прифатија повикот и ја избраа заедно со советниците од редовите на иницијативата „За Наше Куманово“, Ивана Ѓорѓиевска, за претседател на општинскиот Совет. Досегашната соработката со советничката група на ВМРО ДПМНЕ ја квалификувам како коректна.
За упадот во собранието многупати имам говорено многу отворено на оваа тема и за мене ќе повторам во тој случај многу поголема одговорност имаат сценаристите и режисерите отколку заведената група луѓе што влезе во собранието во толпата. За жал, голем дел од лицата што повредуваа физички други лица, во тие настани се сѐ уште неосудени.
ФОКУС: Формиравте здружение „За наша Македонија“ и почнавте веќе да формирате ограноци по градовите. Како сте задоволни од процесот?
ДИМИТРИЕВСКИ: По примерот во Куманово, во другите градови на Македонија се формираат граѓански здруженија, кои се идентификуваат со политиките на граѓанското здружение „За наше Куманово“. Ова граѓанско здружение прераснува во едно републичко граѓанско движење, во кое секојдневно се приклучуваат голем број индивидуалци од различни професии, различна политичка провениенција, но и граѓани што воопшто не се политички определени, граѓани од различна етничка, верска и политичка припадност.
ФОКУС: Како програмски и концепциски е поставено здружението и која е крајната цел? Дали ќе прерасне во партија?
ДИМИТРИЕВСКИ: Граѓанското здружение „За Наше Куманово“, на последните локални избори излезе со своја визија, понуда и програма пред граѓаните на Куманово и ја доби нивната доверба, извојувајќи убедлива победа пред партиите што се присутни на политичката сцена повеќе од 30 години. Па, зошто тоа да не се преслика и на републичко ниво?
Во овој момент кај граѓаните постои заситеност од постоечките политички субјекти, а сѐ поизразена е желбата и мотивацијата кај нив да се приклучат во едно ново движење, кое ќе биде „од граѓаните за граѓаните“. Иницијативата за вакво нешто не е моја, туку доаѓа од жителите на секоја општина поодделно, каде што се присутни навистина голема енергија, желба и идеи за напредок на државата и подобар живот за граѓаните.
ФОКУС: Дали во партијата има незадоволни членови од СДСМ? Дали Петар Атанасов е таму?
ДИМИТРИЕВСКИ: Секако дека има. Секој ден е сѐ поголема заинтересираноста на граѓаните од различна политичка провениенција, но и неопределени граѓани за приклучување кон граѓанските здруженија низ републиката.
Атанасов формираше свое граѓанско здружение под името „Модерна“. Петар е мој добар пријател и соработник од времето на заедничките денови во СДСМ. Не исклучувам соработка и со ова граѓанско здружение на следните парламентарни избори, како и со многу други.
ВО ОПОЗИЦИЈА ЕДЕН, НА ВЛАСТ ДРУГ
ФОКУС: Кога одлучивте да се кандидирате за независен кандидат за градоначалник, односно кога СДСМ одлучи да не ве поддржи, на чело на партијата беше Зоран Заев. Му замерувате ли?
ДИМИТРИЕВСКИ: Не, Заев не беше причината за судирот со партијата, ниту, пак, јас сум се судрил со партијата, туку се судрив со голем дел од раководството во мојата партија. Јас не се судирам со човек, туку се судирам со политиките што тој човек ги спроведува. Секој човек има свои карактеристики, мани и доблести. Има лоши и добри политики.
ФОКУС: Каков беше Заев?
ДИМИТРИЕВСКИ: Во опозицијата познавав еден Заев, во периодот на власта запознав нов. Заев спроведуваше лоши политики во периодот на власт. Ние имавме колосални разлики во политиките и начинот на практикување власт. Веројатно ваквото практикување на власт беше причината за мојата елиминација од највисоките партиски органи.
Но, на таквите одлуки заткулисно секогаш кумуваа други поединци, кои вешто и умешно се криеја зад неговото име, нив јавноста ги знае, а особено партиското членство во СДСМ, моите партиски другари со кои заедно поминав многу.
ФОКУС: Сепак, Заев веќе не е на чело на партијата. Гледате ли сега разлика?
ДИМИТРИЕВСКИ: Од страна на граѓаните поразени се таквите политики и тој го напушти челното место во СДСМ, а граѓаните на Куманово ја поддржаа политиката што беше предложена од мене и од граѓанското здружение „За наше Куманово“.
СДСМ има прекрасно членство, кое во моментов е маргинализирано поради клиентелистичкиот пристап на актуелното раководство и борбата за власт на поединци, макар и еден ден повеќе.
За жал, до ден денеска не изостануваат дејствијата на семејствата, особено родителите на носителите на највисоките државни функции од мојот град, кои сметаат дека буквално треба да контролираат сѐ.
ФОКУС: Може ли да бидете поконкретен?
ДИМИТРИЕВСКИ: Па, почнувајќи од различни здруженија на граѓани, како што во моментот е случајот со обид за оцрнување и смена на актуелното раководство на здружението на пензионерите во Куманово, кое е едно од најдобрите во државата и многу други вакви примери кои имаат за цел да стават политичка контрола во многу вакви добри граѓански организации и семејно да се себеинсталираат во сите сегменти на општествено дејствување, сакајќи преку тоа да имаат влијание. Погрешни се таквите обиди и сето тоа ќе се сруши на крајот како кула од карти.
ФОКУС: Премиерот Ковачевски е Ваш сограѓанин. Каква комуникација имате со него? Го познавате ли лично?
ДИМИТРИЕВСКИ: Да, се познавам лично со г-динот Димитар Ковачевски. Во минатото комунициравме како сограѓани, а не како сопартијци. Да потсетам, г-динот Ковачевски, во режимот на Груевски беше на менаџерската позиција во македонски „Телеком“ и уживаше во благодатите на таа позиција и во друштвото на многу тогашни функционери од власта блиски до ВМРО ДПМНЕ. Тогаш тој немаше време за политички ангажман во СДСМ, кога беше најтешко.
ФОКУС: Дали ви се јавил и дали Ви понудил да се вратите во партијата откако дојде на лидерското место?
ДИМИТРИЕВСКИ: Немам конкретна понуда за враќање на СДСМ директно од Ковачевски, а и да ја има, не би ја прифатил. Но, има голем број луѓе блиски до раководството, па и до Ковачевски кои во својство на емисари нудат различни предлози за кои не сум заинтересиран.
Јас немам намера да ги разочарам граѓаните и да бидам само една нова реприза во практиките на должничко-доверителските односи во политиката и никогаш, ама никогаш нема да ги разочарам тие што гласаа за мене како независен кандидат.
ФОКУС: Во една пригода кажавте дека се слушате и со Мицкоски. За што разговарате?
ДИМИТРИЕВСКИ: Да, точно е. Мојата комуникација со Мицкоски и Ковачевски е исклучиво за теми и проекти што се од интерес за граѓаните на Општина Куманово. Јас сум политичар, политиката е дијалог и разговор и сум отворен за комуникација со сите врз база на претходно утврдени принципи.
ЈАС СЀ УШТЕ СУМ ЧЛЕН НА СДСМ
ФОКУС: Каков е вашиот статус во СДСМ сега?
ДИМИТРИЕВСКИ: Ова прашање треба да го упатите до актуелното раководство на СДСМ. Мислам дека ни тие самите не знаат каков е мојот статус во партијата. Но, правно-формално, согласно статутот на партијата, јас сум сѐ уште член на СДСМ. За мена ова е апсолвирано прашање.
Јас, мојата политичка иднина ја гледам како составен дел на едно големо граѓанско движење на национално ниво, кое ќе има за цел да ја стабилизира државата и да ја направи самоодржлива и власта да ја врати кај граѓаните преку нивни легитимни претставници, кои ќе имплементираат политики од општ интерес на државата и граѓаните, а ниту во еден случај како сега да создаваат узурпирана и приватна држава во функција на политички субјекти и поединци кои истите ги владеат инокосно како приватни компании.
ПО ИЗБОРИТЕ, ЌЕ ЈА ПОНУДИМЕ НАШАТА ПРОГРАМА
ФОКУС: Најавивте дека ќе учествувате на следните парламентарни избори. Дали веќе сте разговарале за некаква меѓусебна поддршка со другите партии за следните избори?
ДИМИТРИЕВСКИ: Единствената коалиција со која ќе настапиме на следните парламентарни избори се граѓаните. Впрочем, затоа е и граѓанско движење, а не политички субјект. Ќе се обратиме до сите, без разлика на нивната партиска и етничка припадност и очекувам да се приклучат сите што сакаат да припаѓаат на еден концепт за чесно, одговорно и домаќинско работење.
По завршување на изборите, во зависност од резултатите ќе ја понудиме нашата политичка и програмска платформа до сите политички субјекти што се држат по стратешките државни начела за евроатлантска иднина на Македонија и ќе бидеме во коалиција со оние што ќе бидат спремни истата да ја прифатат и на неа интензивно да работат.
НЕМАМ КОНТАКТ СО ЦРВЕНКОВСКИ
ФОКУС: Пред формирањето на движењето имаше информации дека позади формирањето на партијата стои поранешниот претседател Бранко Црвенковски.
ДИМИТРИЕВСКИ: Поранешниот премиер и претседател на РМ и поранешен претседател на СДСМ, Црвенковски, го ценам и почитувам. За мене претставува политичар од кој може да се научат многу работи. До овој момент немаме остварено контакт и разговарано за оваа тема.