Текстот е објавен на 03 октомври 2024 година во неделникот „Фокус“, во бројот 1.513.
Лидерот на Левица смета дека уште во првите 100 дена од формирањето на новата влада, станало јасно дека ВМРО-ДПМНЕ се, како што вели, поголеми предавници од СДСМ, додека ВЛЕН се покажале поопасни од ДУИ. Говори дека се случува т.н. косоваризација на Македонија и бинационален грабеж, што, според него, оди кон сценарио државата полека да биде расцепкана. Како што нагласува, патот на Западен Балкан кон ЕУ е затворен, бидејќи интересот на Европа е овој дел да служи како депонија каде што ќе се случуваат највалканите работи. Иако смета дека веќе се води Трета светска војна, а на Балканот има 3 жаришта – Косово, Република Српска и Македонија, истакнува дека нема да дојде до реприза на 2001 година, велејќи: „Ако дојде, тогаш да сме живи и здрави – ќе фатиме пушки како партизаните“.
Разговараше: Влатко СТОЈАНОВСКИ
ФОКУС: Од денешна перспектива, како го оценувате исходот на двојните избори, на кои може да се каже дека бевте во трка со ЗНАМ за третото место во македонскиот блок?
АПАСИЕВ: За разлика од Мицкоски, кој е опседнат со политички анкети, ние во Левица сме политички пророци и знаевме дека ќе биде тој резултат, затоа што сметавме и сѐ уште сметаме дека ЗНАМ е проект, а не партија.
И ако гледаме според најновите анкети од пред неколку дена, единствената партија што бележи раст од 3,5 отсто е Левица. Иако сметам дека овие анкети се наштимани во корист на власта, сепак на нив сите други партии бележат пад.
Тоа значи дека народот веќе почнува да нѐ препознава како вистинска опозиција.
ФОКУС: Вашиот претседателски кандидат на изборите освои помалку гласови од лидерот на ЗНАМ, додека на парламентарните избори вие како Левица освоивте повеќе гласови од ЗНАМ. Како го објаснувате тоа?
АПАСИЕВ: Резултатот за мене беше очекуван, зашто професорката Ванковска што ја кандидиравме за претседател беше апстинирана од медиумите во своевидна самоизолација со години и поради тоа веројатно на народот му требаше повеќе време да ја запознае.
Исто така, во дебатите, професорката беше мошне коректна зашто се држеше до ингеренциите на претседателот, додека сите други зборуваа како да се на парламентарни избори. И мислам дека очекувано беше тоа.
За нас како млада партија, која за првпат имаше свој левичарски, но непартиски кандидат, беше предизвик собирањето 10.000 потписи. Тој тест ни беше важен за да покажеме дека не сме онака како што нѐ нарекуваат „фејсбук-партија“, туку дека имаме теренска поткрепа. И тоа го докажавме.
Оттука, мислам дека резултатот на парламентарните избори е очекуван зашто тоа беа нашите избори, изборите на кои јас и Крмов како препознатливи „фаци“ на партијата во парламентот и тоа како имавме што да понудиме.
ФОКУС: Велите дека сте го очекувале овој резултат, но пред изборите очекувате над 100.000 гласа, а таква поддршка ви даваа и анкетите што за внатрепартиска употреба ги правеа ВМРО и СДСМ. Сепак, на крај не испадна баш така.
АПАСИЕВ: Точно, но во меѓувреме се случија неколку работи. Се случи медиумски бојкот на Левица, кој и тоа како не чинеше. Ако се вратите ретроспективно, ние пред 3-4 години бевме речиси секоја недела на некоја дебатна емисија, а потоа веќе 2 години не бевме никаде и ни останаа само социјалните мрежи. Сета среќа што живееме во 21 век и ги имаме и тие социјални мрежи, замислете да сме 90-тите години – никој немало ни да не споменува.
Исто така, се случи проектот ЗНАМ, кој беше и тоа како бустиран. Јас направив едно блиц-истражување, од кое произлегува дека Максим Димитриевски за само 2 месеца гостуваше повеќе пати на национални телевизии отколку сите членови на Левица во изминатите 2 години! Знаете колкав е тој буст?
Најмногу кај нас луѓето сѐ уште гледаат телевизија. Иако во перспектива тој број се намалува и се оди кон социјалните медиуми, сепак, возрасните луѓе, заедно со таа каша-попара од програма што ја имаат со турски серии, ги лепат на вести и тие гледаат вести. А на вестите сликата е како да нѐ нема.
НЕ СМЕ ФЕЈСБУК-ПАРТИЈА
ФОКУС: Поради тоа што сте најприсутни на социјалните мрежи многумина што сакаат да ве дискредитираат, ве нарекуваат фејсбук-партија, велат дека собирате повеќе лајкови од гласови итн. Вие, пак, сметате дека сте докажале дека не сте со тоа што сте собрале 10.000 потписи за претседателска кандидатура, но ги исполнувате ли оние параметри што прават една структура класична партија? На пример, дали имате разгранета инфраструктура?
АПАСИЕВ: Од аспект на инфраструктура, кога јас ја презедов партијата, имавме 6 ограноци, а сега имаме 60 ограноци, и тоа не само на хартија, туку ограноци што имаат закупено простор, плаќаат кирија, се состануваат, има база на записници, акции, иницијативи… Значи, зборуваме за еден жив внатрепартиски живот.
Тоа значи дека Левица не е четврта или петта партија, како што сме по број на пратеници, туку по инфраструктура е трета партија, веднаш зад ДПМНЕ и СДСМ. Дури сметам дека во овој период, кога СДСМ практично е под стечај, не одржуваат состаноци, немаат никако внатрепартиски живот, сме и втора партија. Дури ни ДУИ не може да се пофали со таков број на ограноци.
Има 80 општини, а ние имаме 60 канцеларии. Тоа значи дека тестот на фејсбук-партија ни е положен и тоа поглавје еднаш-засекогаш е завршено.
ФОКУС: Исто така, двете најмоќни партии ви префрлуваат дека не располагате со значителен број евидентирани членови, со кои би можеле да организирате протести, блокади и сл.? Држи ли тоа?
АПАСИЕВ: Левица има многуилјадно членство, но не е како нивното, бидејќи нивното е третирано како биро за вработување и таму доаѓаат сосема друг калибар на луѓе. Кај нас доаѓаат активисти, кои повеќе имаат штета од членувањето во Левица, отколку корист. Тоа се сосема 2 различни ментални склопа на луѓе.
И овие што доаѓаат кај нас се авангардата на општеството, не од аспект на тоа дека се интелектуална авангарда и слично, туку тоа се прогресивни луѓе, кои се спремни да се жртвуваат за политичка кауза. Тоа ретко кој го има, зашто кај другите клиентела-партии доаѓаат луѓе што очекуваат вработување, синот, ќерката и сл. Кај нас е обратно, ни ги бркаат браќата, сестрите, роднините од работа…
ФОКУС: Ваши членови воопшто ли не бараат ваков тип на услуги од партијата?
АПАСИЕВ: Не, затоа што од старт се поставени основите сосема поинаку и кај нас е срам да побараш нешто такво. Градиме високоморална политика, ако сакате во аристотеловска или античка смисла земете, значи политика на јавното добро.
И ако гледате, нашите пратеници не земаат патни трошоци, не земаат апанажа, не земаат службени дневници, тоа е стриктно забрането со внатрепартиска регулатива. Додека овие другиве, кои ни продаваат морал, гледате како ги користат тие властелински привилегии.
ФОКУС: Планирате ли да покренете иницијатива за да се укинат овие права или привилегии за кои зборувате?
АПАСИЕВ: Апсолутно. Имавме 2 иницијативи во претходниот мандат и сега ќе имаме иницијатива, зашто тоа го сметаме за наша автентична антиестаблишментска борба.
Ние сметаме дека патните трошоци, кои не постојат за работниците, тоа го укинаа ДПМНЕ во време на Трајко Славевски со концептот на бруто-плата, не треба да постојат ни за пратениците. Или, ако веќе постојат, да бидат во некои ограничени рамки на патен билет на меѓуградски превоз или на просечна потрошувачка на гориво 6-7 литри на 100 км.
А сега вие имате илјадници евра патни трошоци за една година, колку што вредат 2 автомобила!? Каква е таа амортизација на автомобил, ако од Собранието земате како да си купите 2 нови автомобили?!
ФОКУС: Јавно излегоа информации дека патни трошоци користат пратеници со живеалиште во внатрешноста, но дел од нив имаат станови со Скопје.
АПАСИЕВ: Не дел, јас мислам дека сите имаат станови во Скопје и тука е таа квалитативна разлика меѓу нас и нив. Нашите пратеници си плаќаат кирии, нивните си кркаат патни трошоци. И затоа ние сме атипични политичари, зашто сѐ уште дејствуваме како активисти, а не како политичари.
Политичкиот естаблишмент има други правила на бонтон и гледате тие меѓу себе никогаш не се напаѓаат на овие теми, кои и тоа како се легитимни, додека единствен што чепка на овие теми е Левица, зашто ние сме партија на народот. Впрочем, и нема друга партија што така се поставува овие години.
Ние сме единствената партија што бележи перманентен раст на сите избори, скромен, но перманентен. Ние почнавме во 2016 година со 12.000 гласа, потоа во 2020 се качивме на 37.000 гласа, па во 2021 скокнавме на 50.000 гласа и сега на скоро 70.000 гласа. Таков перманентен развој на партија не постои, кај сите има „ап енд даун“ цело време, а кај нас има само нагоре цело време… И тоа е веројатно феноменот на Левица.
СЛЕДНА ЦЕЛ – НЕКОЛКУ ГРАДОНАЧАЛНИЦИ
ФОКУС: За една година доаѓаат редовни локални избори. Дали се подготвувате само за локални или очекувате и предвремени парламентарни избори?
АПАСИЕВ: Ако ги следат стапките на Груевски, можно е да бустираат оваа година со овие унгарски кредити, со милиони евра и со други милиони црни пари кои народот не ги гледа, и така да избустаат некаков фејк меур дека тие се „победниците“, „градителите“ и сл. Такво нешто правеше Грујо, па распишуваше предвремени парламентарни избори.
Но, мислам дека не им е опортуно. Тоа би можело ако имаат килава влада, во смисла влада која е уценувана, како што беше СДСМ претходно. Сепак, мислам дека се стабилизирани, солидно им течат тезги и тендери и затоа мислам дека немаат потреба од таква авантура. Но, сѐ бидува, можно е и тоа да се случи.
ФОКУС: Имате ли проектирано цели за локалните избори? Каков исход би сметале за успех?
АПАСИЕВ: Чисто за народот да знае – најлесни избори за организирање се претседателски, зборувам од партиски аспект. Потешки се парламентарни и најтешки се локални избори.
Значи, тие се логистички кошмар, особено за партии како нас, кои не одат во коалиција, туку одат сами. И ние уште сега од октомври ќе почнеме со подготовки за тие избори, мислам дека следната цел што треба како партија да си ја поставиме е да освоиме барем неколку градоначалници.
Значи, за првпат Левица да има свој градоначалник и да практицира власт на дело. За минатите избори, лозунгот ни беше „Левица во советите“, зашто немавме советници и стигнавме до педесетина, а сега мислам дека тој број ќе оди нагоре…
ФОКУС: Дали сте мапирале општини каде што ќе се фокусирате и сметате дека имате реални шанси за градоначалник?
АПАСИЕВ: Мислам дека Левица најдобро котира во урбаните општини, во скопските општини и во поголемите урбани центри. Но, тоа не значи дека ние не треба да работиме како партија за ширење кон руралните средини. Тука е многу напластено…
Според нас, овој концепт на мали општини е нефункционален, треба со двотретинско мнозинство да се смени законот. За нас, прифатлив е југословенскиот концепт на поголеми, погломазни општини зашто овде имате рурална општина која не може да собере данок да си ја плати администрацијата. Тие се нефункционални без владина поддршка.
Оттука, овој концепт, кој да не заборавиме дека е етнички концепт, трибалистички концепт, дојден во 2001 година, со текот на времето како цивилизирано општество треба да го надминуваме и да видиме што е функционално.
Кога зборуваме за територијална поделба, треба да видиме што е функционална целина. Ако еден урбан град функционирал со децении и со векови можеби уште од Кралевина Југославија и сега вие вештачки го делите, така го правите нефункционален.
ФОКУС: Можно ли е да се случи на локалните избори да соработувате со СДСМ или со друга опозициска партија?
АПАСИЕВ: Ние веќе работиме внатрепартиски на мапирање на ликови што би биле интересни, особено во скопските општини. Мислам дека на овие избори повторно десницата ќе биде во предност, зашто ја има власта. Десницата секогаш кога ќе ја има власта…
Тоа е тој избор меѓу змијата и магарето што го викаме. За нас змијата е СДСМ, која е попрефригана, но е опасна и смртоносна, а овие се посилеџии, тие се магаре-тип. И тие кога ќе ги фатат полугите на власта, тераат минимум 2 мандата, тоа е практично емпирија.
ФОКУС: И СДСМ истера 2 мандати, и тоа еднаш по изборен пораз, а вторпат со многу тенки мнозинства.
АПАСИЕВ: Така е, и затоа сега се дефакторизираше самата себе. Тие по цена да ја задржат власта, се изгубија во овие афери што ги правеше ДУИ, а тие мораше да ги штитат.
Но, ако забележите и сега ситуацијата е слична. Сите овие афери на Африм Гаши, на Изет Меџити мора да ги покрива ДПМНЕ и затоа јас не верувам дека тие растат. Напротив, мислам дека од ден на ден се гледа лажниот патриотизам на ДПМНЕ…
ФОКУС: Поентата ми беше дали е можно на локалните избори да се случи опозициска соработка, во смисла заеднички да поддржите одредени кандидати за градоначалници? Овој модел на поддршка на расцепканата левица на еден кандидат наспроти кандидатот на консолидираната десница успеа во Грција и Хрватска, на пример, на изборите во Солун, Загреб…
АПАСИЕВ: Мислам дека не. Ние статутарно имаме забрана за предизборно коалицирање. Единствената опозициска соработка ние ја гледаме кога Левица ќе се факторизира, не како џуниор-партнер, туку како примус, а не како секундус.
Тоа е додека не ги престигнеме СДСМ и не го зафатиме главното место во левицата, во левиот спектар на гласачи, ние не гледаме простор за соработка, зашто мислиме дека тоа е погрешниот пат и така ќе се изгуби секоја наша автентичност.
Впрочем, тоа го знаеме од ЗНАМ и од НСДП. Сите тие партии по цена да се дограбат до власт прифатија да бидат џуниор-партнер, после издишаа. Таа грешка ние нема да ја направиме.
ДПМНЕ СЕ ПОГОЛЕМИ КВИСЛИНЗИ ОД СДСМ
ФОКУС: Од конкурентските партии велат дека веќе сте го достигнале лимитот и не можете погоре. Притоа, Филипче рече дека само СДСМ може да го порази ВМРО, а Мицкоски рече дека според анкетите тие растат, додека вие стагнирате. Како го коментирате тоа?
АПАСИЕВ: Не, СДСМ е расштиман оркестар, таму не се знае кој јаде кој плаќа. Гледате дека сега кога ќе речете „опозициски пратеници“ сите помислуваат на нашите пратеници на Левица, во само неколку месеци пратенички мандат. Сите помислуваат на нашите борбени говори, на нашите фајтови со ДПМНЕ, додека нивните (на СДСМ) пратеници, ако не биле поранешни министри, тие ќе беа непознати за јавноста, зашто немаат збор земено.
Тоа го гледам и кај други, го имаше и кај Мицкоски ако сакате, чие прво политичко вработување му е премиер. Претходно, не бил ниту министер, ниту пратеник, нема никакво државничко искуство, туку директно е инсталиран како премиер. Јас не ги разбирам овие лидери на партии кои Собранието го гледаат со потценување.
Ние, напротив, јас лично, не ја правиме таа грешка. Тоа ти е како опозицијата во британскиот парламент да го нема лидерот!? Така истера Мицкоски, ниту еден мандат го немаше во жижата. Па, тука е фајтот. Единствениот политички орган каде што имате политичка борба, и идеолошка ако сакате, е парламентот, а сите овие го гледаат со потценување. Пратеничката функција како највисока, тие ја гледаат како најниска.
ФОКУС: Значи, сметате дека преку Собранието ќе се факторизирате дополнително?
АПАСИЕВ: Нашиот активизам во Собранието вродува со плод. Тоа не може да биде бомбастично, но е ефективно стратешки и долгорочно гледано. Нашите препознатливи говори, борби во Собранието привлекуваат искрени гласачи, и тоа баш такви кои не зависат ниту од едните ниту од другите.
ФОКУС: Се согласувате ли со тезата дека како партија најмногу се наметнавте на политичката сцена со тврд наратив за националните прашања, во време кога ВМРО-ДПМНЕ беше колеблива, како што беше во врска со Преспанскиот договор и референдумот. Се чини дека тогаш добивте видливост и тргнавте нагоре…
АПАСИЕВ: Мислам дека времето кога Левица успеваше да капитализира десни гласови е зад нас. Десните гласови во суштина се емотивни гласови и второ – клиентелистички.
ДПМНЕ успеа по консолидацијата на локалните избори да почне на широко да вработува наставнички, чистачки, бирократи… бидејќи за првпат по долго време се дочепа до власт. И сите тие разочарани вмровци, видете ги, кои демек инклинираа како самостојно или направија квазипартии, сите си се прибраа во стадото.
Секогаш е тоа така и затоа нашата перцепција е дека ние во тоа трло нема што да бараме. Ние максимумот на десни гласови, односно национални и патриотски гласови, го освоивме и ние нема што таму да бараме. Но, сега се отвора друга пукнатина, која беше непланирана.
ФОКУС: На што мислите?
АПАСИЕВ: Тоа е дека ДПМНЕ стануваат поголеми квислинзи од СДСМ! Зошто? Не онаму каде што запреа СДСМ, па тие да продолжат, туку го продлабочија тоа што СДСМ го имаше ставено под тепих.
Речиси во десетици закони, оние министри кои до вчера како опозициски пратеници се чукаа во гради дека нема да изговорат „Северна“, сега самите поднесуваат предлог-закони со кои се брише зборот „македонско“, иако тоа не е согласно Преспанскиот договор.
Може да замислите дека СДСМ цели 7 години заборавило или не сакало да смени десетици закони каде што функционира фразата „Република Македонија“, а ДПМНЕ за неколку месеци се обидува тоа да го промени и сѐ да демакедонизира. Тоа значи дека сами ни отвораат простор ние пак да пенетрираме во нивното, условно кажано, гласачко тело.
ФОКУС: Ако ВМРО-ДПМНЕ ви отвори простор во десниот спектар преку топло-ладно односот кон Преспанскиот договор, од друга страна ви го ограничи тој простор кога застана цврсто против уставните измени. Се согласувате со тоа?
АПАСИЕВ: Тоа им беше тактика за да дојдат на власт. Тие, наместо да ја укинат онаа фамозна Историска комисија, која е ревизионистичка и погазува сѐ што ние како нација сме оствариле од АСНОМ до денес, тие само ги заменија членовите. Нема суштинска разлика во тоа.
ФОКУС: Сѐ уште ли стоите на ставот дека ВМРО од позиција на власт ќе ги донесе уставните измени, бидејќи засега нема такви сигнали? Дури гледаме заострување на односите со Бугарија, Албанија е одвоена од Македонија во интеграцискиот процес…
АПАСИЕВ: Апсолутно, да! Во моментот кога ќе проценат дека имаат простор, тие ќе ги донесат и мислам дека тука напомош ќе им дојде ДУИ, како што им дојде во 2 наврати досега – еднаш за реорганизација на министерствата и другпат за Законот за локална самоуправа.
ФОКУС: Значи, ако тоа се случи, во тоа гледате шанса за партиски раст?
АПАСИЕВ: Апсолутно, политиката е динамична, дури и кога едно прашање сте го сметале за затворено, а тоа е дека не може повеќе да грабиме кон десни гласови, тие ви отвораат ситуација за пенал.
И сега природно е дека, кога луѓето гледаат дека овие испаднаа поголеми предавници од СДСМ, само Левица остана доследна на тоа што го зборува.
КЛИЕНТЕЛА НЕ НИ ТРЕБА
ФОКУС: Дали цените дека е дојдено времето за директно да се пресметате со ВМРО-ДПМНЕ, како што најавивте своевремено? Или сѐ уште е рано за тоа?
АПАСИЕВ: Јас во интервју за „Фокус“ пред неколку години реков дека во прво полувреме ќе се пресметаме со СДСМ, и мислиме дека тоа заврши, а во второ со ВМРО-ДПМНЕ.
ФОКУС: Зар не е малку преамбициозно тврдењето дека вие го „пасокизиравте“ СДСМ? Нели може да се каже дека тоа го направи ВМРО со убедливата победа? Или, пак, можеби најточно е да се каже дека СДСМ се самопоразија со лошите политики?
АПАСИЕВ: Ако се сеќавате, кога ние зборувавме за „пасокизација“ уште пред 4-5 години, сите ни се смееја, мислеа дека тоа е некоја теза што само така од пизма кон СДСМ ја застапуваме. Но, СДСМ падна на невидено ниво досега.
Инаку, вистината зошто дојде до тоа е некаде помеѓу, повеќе фактори на влијание придонесоа СДСМ да се „пасокизира“, но првично водство имавме ние со нашата теза и нашето левичарско дејствување во парламентот кога направивме квалитативна разлика меѓу лева и центар-лева партија, бидејќи по најновите политиколошки теории социјалдемократијата повеќе инклинира кон центар отколку кон лево и затоа ние не ги сметаме за левичари.
И друго, тие се милионери, практично. Не живеат од плата, туку од бизниси! Левица е партија чии пратеници живеат исклучиво од платата што ја земаат.
ФОКУС: Како да се разбере ова? Левица има филтер кој ги одбива богатите?
АПАСИЕВ: Не, не, ако ги прифаќаат нашите идеолошки платформи се добредојдени… Па видете сега, секој Маркс треба да има свој Енгелс. Енгелс бил богат, татко му бил фабрикант, а Маркс бил сиромашен. Ама тешко е кај нас да се протне, ние сме идеолошки потврда партија за разлика од другите.
Еве видете го Максим. Тој ги фаќа сите незадоволни од сите партии, најмногу од СДСМ кои сакаат да си ги продолжат своите директорски позиции и сл. Буквално клиентела. Такви луѓе нам не ни требаат, затоа патот што го оди Левица е многу потежок, но долгорочно и стратешки е многу постабилен.
ФОКУС: И сега – дали следните парламентарни избори ќе бидат тоа второ полувреме меѓу вас и ВМРО што го најавувате?
АПАСИЕВ: На локалните мислам дека десницата ќе издоминира со овие финансиски инјекции оваа година, но клучното доаѓа на следните парламентарни избори. Ако ДПМНЕ дотогаш ги направи уставните измени, нивниот рејтинг ќе оди надолу. Ако не ги направи и успее да извози, мислам повторно десницата ќе биде доминантна, но ќе биде интересно што ќе се случува во левиот простор.
Тука мислам дека ние ќе имаме повеќе пратеници од СДСМ и тоа ќе биде триумф на нашата партија и на нашата генерација, зашто од деца тој момент го сонуваме. Ние и сега се факторизиравме како единствена опозиција, која се спротивставува на штетните политики на ДПМНЕ, а тогаш пак ќе биде уште повесело.
ФОКУС: Од што, според Вас, ќе зависи одлуката на ВМРО во врска со уставните измени?
АПАСИЕВ: Зависи како Западот ќе ги притисне, до кој момент ќе може да одат. Тие ќе одат со некоја варијанта со одложено дејство, не знаеме дали ќе им го дозволат, дали Бугарија ќе им прифати, гледаме и тие одат на ачик, на тврдо. И затоа политиката е интересна, да видиме што ќе се случи. Ова е шах, тие мрдаат потег, вие имате време да размислите кој потег ќе го мрднете.
ФОКУС: Колку мислите дека оваа влада може да издржи да го одложува решавањето на крупните стратешки прашања? Груевски издржа десетина години, но на крај со политички инженеринг беше симнат, а албанскиот политички фактор отворено кажува дека го бајпасирале поради отпорот да го решава спорот со името со Грција.
АПАСИЕВ: Мислам дека Мицкоски го има апсолвирано тоа прашање на судир со колективниот Запад и мислам дека нема да се осмели на тоа. Тој е плашлив политичар, кој никогаш нема да се осмели на директен судир со западните бирократи.
Тој го нема габаритот на Вучиќ да може да игра со 2,3,4 светски сили во исто време. Тој е типичен западнистички измеќар. Тој може само за домашна употреба да им се сили на Бугарите, на Бојко Борисов. Вучиќ игра на повисоко ниво, овие се ситна боранија за него.
Мислам дека геополитички тие се западни евроцентристи до смрт, нема разлика меѓу СДСМ и ДПМНЕ. Ние се залагаме за реално гледање на геополитиката, а не за идеолошки западнизам и мислам дека никогаш ДПМНЕ нема да се осмели на оди спротивно на западните геополитички интереси на Балканот.
ФОКУС: Што мислите за блискоста на Македонија со Унгарија или поточно на ВМРО-ДПМНЕ со ФИДЕС на Орбан? Добиваме милијарда евра под поволни услови, имаме односи на високо ниво. Што се крие зад ова, кои се интересите и целите на двете страни?
АПАСИЕВ: Тие се братски, т.е. сестрински партии. Тие се трамписти, како некоја нова десница. Тие конекции си ги имаат од времето на Груевски. Мицкоски ја нема ниту логистиката, ниту габаритот на Орбан, можеби само како некој помал брат, кој ќе биде тапшан по рамо.
Гледате како тие велат – парите биле кинески? Па, што ако се кинески, што има лошо во кинески пари? Напротив, има добро во кинески пари.
Тие се буквално во таа западнистичка матрица и не можат да го скршат тој оклоп. За разлика од нив, нивниот патрон Орбан го крши тој оклоп. Видовте со активноста кога како претседавач со ЕУ отиде на средба и со кинески и со руски лидери.
ПЛЕМЕНСКИ МОДЕЛ НА ДРЖАВА
ФОКУС: За Мицкоски велите дека ќе го следи тој типичен западнистички курс, но тој сега практично влегува во оваа оска Орбан, Вучиќ, порано тука беше и Јанша, која, сепак, е некаква алтернатива на европската народна демохристијанска унија и идеологија.
АПАСИЕВ: Па не, нема простор. Тоа веројатно и големината на државата си го прави. И Груевски се обиде да прави, не толку орбанистички, туку ердоганистички тип на партија и се покажа како добар модел, зашто ја сомеле цела опозиција толку години. Но, падна со поддршка на Западот.
Јас сега, ако смеам да шпекулирам, се плашам дека клиничката смрт на СДСМ ќе биде оживеана со истото тоа сценарио, со западнистички „енџио“-јашки, удбашки структури од Запад, зашто Западот, токму поради таа можност за влијание врз нашата политичка сцена преку едните кога другите се на власт, тоа ќе го искористи.
И тоа на нас како Левица ни претставува најголем проблем. Да остават автохтоно да се развива грасрут движење Левица и СДСМ ние и тоа како ќе го надминеме, но тука ќе имате повторно странски пари, црни пари, исто како за Преспанскиот. Буквално, „брејн-вошинг“ на народот преку финансиски инјекции за поддршка на СДСМ и нивните папагали.
Мислам дека Западот ќе го балансира Мицкоски преку овој рецепт, зашто досега се покажа успешен. Зошто се покажа успешен? Бидејќи ние имаме племенски модел на држава, каде преку албанското малцинство може да ви ја контролираат власта. Груевски затоа одеше на 61 пратеник и успеа донекаде, но Мицкоски ја нема ниту инфраструктурата, ниту табиетот, ниту ништо. Тој е третиот ешалон на Груевски.
ФОКУС: Сепак, факт е дека Мицкоски не е во лоша позиција во тој поглед. Со предизборна коалиција освои 58 пратеници и само со ЗНАМ, без албански партнер, има мнозинство и тоа барем во овој мандат, при ваков распоред на сили, му дава стабилност и комоција.
АПАСИЕВ: Токму поради ова нема да се осмели на предвремени парламентарни избори, зашто тогаш нема да освои 58 сам, туку ќе освои под 50 и ќе му биде потешко да хендла. Вака е по раат, зашто ако му откаже ВРЕДИ со ЗНАМ имаат 61.
ФОКУС: Кога се правеа оние протести против францускиот предлог, се чинеше дека се поставуваа одредени основи за соработка меѓу вас и ВМРО-ДПМНЕ, но потоа пак ги заостривте односите, до степен денес Мицкоски и неговите сопартијци да ве нарекуваат „џанаци“, „циркусанти“, а вие него го нарекувате „алкохоличар“, неговите пратеници „малограѓанштина“ и сл. Како дојде до тоа – суштински се разидовте или се работеше за судир на суети?
АПАСИЕВ: Мислам дека веќе врие крвта меѓу левицата и десницата и тој идеолошки судир веќе почнува да претекува, зашто досега го немало поради таа политичка коректност. Како да ви кажам? Тие сега на говорница божем се плукаат, а во пратенички клуб пијат кафе заедно. Е тоа со Левица го нема и тука имате автентична политика борба. И овие етикети кои си ги лепиме не се случајни.
И зошто овој човек, кој е нехаризматичен, плашлив во јавниот настап и никогаш не ја преминува црвената линија во политичката култура, одеднаш така дрско, вулгарно, безобразно да се однесува кон нас? Тоа е зашто е опседнат со анкети и ги гледа анкетите, гледа дека борбата на Левица се исплати на долг рок и дека на долг рок Левица незапирливо расте. И тоа го нервира.
ФОКУС: Од друга страна, пак, ВМРО ве игнорира. Додека може да се слушне дека Заев одработил за ВМРО и ВЛЕН на последните избори со цел да падне ДУИ, ВМРО-ДПМНЕ постојано го напаѓа Филипче и СДСМ, а за вас не кажува ниту збор. Зошто мислите дека е така? Не ви придаваат значење или?
АПАСИЕВ: Нас нема да не спомне зашто ние никогаш не сме биле власт. ДПМНЕ никогаш нема да удри на СДСМ. Единствено, според мојата теорија, ќе удрат на оние на кои им го собираат уште од времето на 27 април. Пресметките ќе бидат лични, а не политички.
Ако некој се огрешил кон некој челник на ВМРО и го апсел сега ќе му се светат, а не дека тоа ќе биде системска борба против корупција. Големите риби ќе си останат на слобода, Заев ќе си остане, Филипче ќе си остане, сите тие си имаат дадено рака уште претходно, се знае до кај се маваат. Ќе одат во затвор некој втор, трет ешалон, некој што копал јаглен таму.
ФОКУС: Очекувате ли некој од ДУИ да заврши во затвор, зашто власта проектираше такви очекувања?
АПАСИЕВ: Можеби некој ситен, зависи до кај може да одат со ДУИ. Мислам дека со ДУИ добро им оди коалицирањето, еве во 2 наврати гласаат. Не знам што е пазарот искрено, јас не сум во тие криминални шеми, не ни размислувам на тој начин.
Но, заднински сметам дека одлично им оди и со едните и со другите, дури таму нема разлика дали биле ДУИ, дали биле ВРЕДИ. Видовме дека ВРЕДИ се повеќе великоалбански национал-шовинисти од ДУИ.
ЛИБАНИЗАЦИЈА И БЕЈРУТИЗАЦИЈА
ФОКУС: Зошто го сменивте мислењето за ВРЕДИ и сега велите дека се полоши од ДУИ, бидејќи кога ја рушевте претходната влада, проект што пропадна поради Кастриот, велевте дека овие партии што сега се во ВРЕДИ треба да им се даде шанса, бидејќи не се терористи, не биле корумпирани итн.?
АПАСИЕВ: Еве им се дава шанса и што е шансата? Тотална антимакедонска политика, тотален иредентизам, оди во Њујорк и се слика пред американско и албанско знаме… Тотално негирање и уринирање врз македонските инсигнии, не можете да најдете македонско знаме никаде…
Тотална федерализација на државата или, ако сакате, либанизација на републиката и бејрутизација на Скопје, и сето тоа дозволено од десничарската, патриотската и не знам каква ВМРО-ДПМНЕ.
Затоа нејќам да го употребам зборот ВМРО за ДПМНЕ, оти нема ништо вмровско во нив. И мислам дека таа традиција не е отсега. Не заборавајте дека Груевски стави терорист за министер за одбрана, даде амнестија на воени злосторници, а перцепцијата беше дека е „најголем Македонец“.
ФОКУС: Генералната перцепцијата е дека СДСМ им дава премногу концесии на Албанците, а ВМРО-ДПМНЕ на таа антиалбанска карта секогаш профитира.
АПАСИЕВ: Е тоа е проблемот и тоа сакавме да го артикулираме на овие избори, но не знам колку народот го сфати. Со таа македонска платформа што ја понудивме.
Значи, ние сѐ додека како македонски политички партии не воспоставиме Македонска платформа како што албанските партии имаат тиранска платформа, ние ќе одиме кон разградување на државата со тенденција за неколку децении таа да ја снема.
ФОКУС: Како мислите да ја снема? Мислите на федерализација?
АПАСИЕВ: Тоа веќе се случува. Вие во Западна Македонија немате владеење на право, имате енклави, имате бинационален грабеж. Вие имате трла во кои едниот не чепка во трлото на другиот, а другиот не чепка во трлото на првиот.
Мислам на косоваризација на државата. Ако гледате сега влезено е преку бизнисот, големи ланци на маркети, земјоделско-индустриски комбинати, таму е вложен голем косоварски, албански капитал. Следно би било веројатно банкарскиот сектор, кој досега стоеше како недопирлив за албанското малцинство. И полека државата ќе биде феудализирана и расцепкана.
Во перспектива, ако Македонија геополитички не се престрои, ние ќе ја изгубиме државата онака како што сега ја познаваме, ќе станеме Швајцарија на Балканите, кон тоа се оди. Да нема конститутивен македонски народ, да бидеме збирштина на заедници и кон тоа се оди. И да се изгради некоја нова вештачка северномакедонска нација и тоа веќе се прави.
ФОКУС: Значи, според Вас, и во најцрното сценарио не е загрозен територијалниот државен ентитет?
АПАСИЕВ: Можеби поради реномето на земја-членка на НАТО таа нема да се распадне. Ако гледаме перспективно домино-ефектот веќе го знаеме каде е.
Во следна светска војна, на Балканот балканската војна ќе биде во Косово, Република Српска и евентуално Македонија. Тие се жариштата, тие тлеат и доколку не се решат, а мислам дека Западот намерно не гледа интерес да ги реши, не ни се пишува добро.
ФОКУС: Говорите за Трета светска војна… Верувате ли дека ќе дојде до тоа?
АПАСИЕВ: Па прашање на време е да ни кажат дека сме во Трета светска војна. Ако видите, Втората светска војна не почнала 41-ва, туку претходно. Така и сега.
Војната во Украина беше крај на меѓународниот поредок кој ние го познававме, во кој ние растевме и кој мислеа нашите геостратези дека ќе трае цел живот. Не, тој се распадна и сега имате една мултиполарност, во кој умешни политичари со визија би знаеле да се постават.
Зборувам за политичари од рангот на Тито, еве мене не ми е шубе да го споменам, ако на Мицко му е шубе. Луѓе што гледаат каде се движи светот и знаат да се престројат, знаат да играат и со Русите и со Американците и со Кинезите и со сите. Овој западнистички концепт се виде дека нас не ни мисли добро.
ФОКУС: Врз основа на што го тврдите тоа, зашто оние кои не се согласуваат со Вас ќе кажат дека САД е наш најголем стратешки партнер, па дури и дека поради САД сме добиле држава при распадот на СФРЈ, кога се правеа платформи за поделба на Македонија и сл.?
АПАСИЕВ: Впрочем, ако сакате да вулгаризираме – Американците не се наши стратешки партнери, тие се стратешки партнери на албанското малцинство. При секој евентуален иден меѓуетнички конфликт, тие ќе застанат на нивна, а не на наша страна.
ГНОЈАРНИКОТ НА ЕВРОПА
ФОКУС: Програмски, вие сте против НАТО, но не и против ЕУ. Сметате дека не треба стратешки да се држиме само за Западот, туку да ја имаме во предвид мултиполарната слика и притоа потсетувате на политиката на титова Југославија со „Неврзаните“. Колку тоа е апликативно во денешен контекст на поделба на сфери на влијание и на поларизација? Зарем нели и таа титова Југославија не се покажа како одржлив модел, бидејќи се распадна?
АПАСИЕВ: Се распадна зашто имаше влијание на многу геополитички сили и внатренационални шовинизми, значи усташко, четничко, ванчомихајловистичко и секакви движења кои се оживотворија.
Ние како мали држави на Балканот немаме друг концепт, освен концептот на балканската левичарска федерација или конфедерација и некои такви иницијативи кои ќе не живнат привремено додека не влеземе во ЕУ.
Но, патот кон ЕУ на Западен Балкан мислам дека е долгорочно затворен. Тука би се сложил со Николоски дека Албанија никогаш нема да влезе во ЕУ. Интересот сега на ЕУ е Западен Балкан да остане енклава.
ФОКУС: Кој би бил интересот на ЕУ за тоа?
АПАСИЕВ: Па, би имале секаков интерес. Еве, на пример, енергетски интерес. Ние ќе бидеме практично депонијата на Европа, каде ќе се копа литиум во Србија, ќе се носи отпад од Италија да се гори во нашите фабрики. Еве имате имигрантска криза во ЕУ и како ја решаваат? Со тоа што градат бегалски кампови во Албанија.
Како да се изразам? Секој манастир, колку и да е чист, има еден рид кој, ако сте ја читале „Името на розата“ од Умберто Еко, се вика гнојарник, каде се фрла отпад. Ние ќе останеме гнојарникот на Европа, зашто секоја чиста градина мора да има нужник. Ние ќе бидеме нужникот на Европа, каде ќе се случуваат највалканите работи.
И затоа ако геополитички не се престроиме, ние буквално ќе завршиме како депонија, каде ќе се гори европскиот отпад, кај што ќе се носат европските имигранти да живеат и да ни плаќаат кирии, каде ќе се носат и џихадисти. Видовте од Иран дојдоа во Драч. Буквално ќе не перцепираат како дива територија, каде не важат закони и цел валкан веш од кај нив ќе го складираат кај нас.
ФОКУС: Дали и како би се извело тоа? Еве да речеме дека тоа е интерес на Македонците, но како тогаш би се поставиле Албанците, кои се јасно евроатлантски определени?
АПАСИЕВ: Еве да го отвориме и тоа прашање. Мислам дека Албанците се многу практичен народ, многу попрактичен од нас, и тие секогаш историски биле со посилните.
Ви тврдам дека за 10 години, ако геополитичката слика се промени и светска сила стане Кина, тие ќе бидат про Кина. И ќе се повикаат на комунистичкото минато на Енвер Хоџа и Мао Це Тунг, зашто тие соработуваа.
Тие се многу прагматични, кога победувале Отоманците биле со Отоманците, кога победувале Американците биле со Американците…
ФОКУС: Фактички, вие ги отфрлате теориите дека евроатланскиот курс и интеграции се врзивното ткиво или лепакот кој одржува меѓуетничка кохезија? Нели со тие тези, меѓу другото, се оправдуваат компромисите што ги правиме, а не ретко може да се слушне дека ако се напушти тој правец можна е реприза на 2001…
АПАСИЕВ: Тргнувајќи од немирите или протестите за францускиот предлог, ми остана една епизода која го покажува степеност на зовриеност на Македонецот. Тоа беше ако ви текнува кога оној од ВЛЕН извади пиштол пред споменикот на Скендер бег, имаше еден Македонец кој го вклучи мобилниот телефон му одеше директно, го снимаше и му одеше во очи, а тој го држеше пиштолот.
Е до таму е степенот на зовриеност кај Македонците. И таа невралгична точка „ќе ви се случи 2001“ – ајде бујрум нека се случи! Да видиме кој ќе извлече подебелиот крај.
ФОКУС: Според вас, има ли услови и потенцијал да дојде до такво сценарио?
АПАСИЕВ: Мислам дека нема да им дозволат да дојде до тоа зашто не им одговора. Дури и во такви околности на депонија на Европа и треба каква таква стабилност за тој бизнис, особено германско-австрискиот бизнис и капитал тука профитира. И мислам дека нема да дојде до тоа, ама ако дојде – тогаш ќе фатиме пушки како партизаните, да сме живи и здрави.
Значи такви закани не поминуваат. Геополитички се сменети работите. Помина времето кога, се сеќавате во конфликтот 2001, освен Украина и тогашниот проруски претседател што ни даде оружје, нашите стратешки партнери Американците и Европејците ни ставија ембарго на оружје. Зошто сега на Израел не му стават ембарго, кога прави масакри во Палестина и Либан?
БЛИСКИОТ ИСТОК МОЖЕ ДА ГО ЗАПАЛИ СВЕТОТ
ФОКУС: Кога го спомнавте Израел и кризата на Блискиот Исток, може да видиме дека од големите сили таму влијание има само САД која се обидува да менаџира, што говори дека сѐ уште е доминантна светска сила, бидејќи не може да видиме замешателство од Кина, Русија…
АПАСИЕВ: Блискиот Исток е нешто што може да го запали светот, но не заборавајте дека врските на Русија со Иран се подобри од кога било претходно. Иран, како наследник на персиската империја, е стратешки играч и долгорочно треба да се гледаат работите.
Вас пред 7 октомври лани да ви кажеа дека Хамас може да изврши таков напад на Израел, ќе ве правеа смешни, највисоки претставници на ЦИА велеа дека Палестинците се мртви практично. Но, се виде дека не се.
Се отвори спирала, но баш поради геополитиката. Ако беше униполарниот свет, тоа прашање ќе тлееше. Но бидејќи не е униполарниот свет, Хутите добиваат оружје не знаеме од каде, се претпоставува дека од Русија, Иран му дава оружје на Путин, Путин им враќа… Има една раздвиженост која ја немало до пред 2 години.
ФОКУС: Ако може да сумираме, според Вас, Трета светска војна веќе се случува, а ако се разгори може да се рашири и на Балканот, па дури и во Македонија?
АПАСИЕВ: Јас мислам дека се одвива светска војна, но не е прогласена. Имате неколку жаришта истовремено. Има Сахел во Африка, која ги протера Французите, поддржани од Русија.
Од друга страна, ја имате софт пауер политиката на Кина, особено во Источна Африка, која особено инвестира наместо да бомбардира и гради пруги и автопатишта во Кенија и секаде.
Потоа го имаме Блискиот Исток, кој гори и сега имате Тајван во перспектива, спорот со Филипините, Балканското прашање кое секогаш иницирало светски војни… Имате сложена геополитика.
Но, од друга страна не треба да се занемари штетата која може да ја направи империјата која пропаѓа, секогаш било така. Тоа го видовме и со минирањето на Северен тек. Секогаш кога една империја пропаѓа таа гребе со нокти да остане стариот свет.
Ако веќе завлеговме во тие геополитички води, најголемиот кошмар на САД е хатрлендот Русија-Прусија или германско-руско пријателство. Тие сѐ ќе дадат да го скршат и успеаја, за жал.
Меркел беше мудра на таа карта и играше и успеа да направи Северен тек и тоа беше крвотокот на германската економија, евтини енергенси. Сега тоа го нема и видете се затвораат фабрики на нивните индустриски гиганти.
ФОКУС: Нели ЕУ имаше обид да изгради свој геополитички идентитет, што се виде во пристапот кон Кина и промоцијата на поинаков став од САД за тајванското прашање, па и за конфликтот на Блискиот Исток? Дури Макрон во првичната фаза одржуваше комуникација со Путин, за сега да најавува и можна интервенција на НАТО во Украина. Како дојде до тоа и зошто Европа не станува самостоен играч?
АПАСИЕВ: Европа мора да се освети и да биде самостоен играч. Таа, пред сѐ, беше француска инцијатива, на Макрон, па уште од Де Гол ако тргнете. Таа е таа француска идеја на пркос кон Америка. Наместо да го доживее својот климакс сега во војната во Украина…
Требаше да се позиционираат поинаку во оваа геополитичка игра и не мораа да бидат победници, но немаше да бидат губитници. Сега Европа е најголемиот губитник од украинската криза!
Ако ние геостратешки не се престроиме, значи ако не ја фатиме иницијативата за брза пруга по коридор 10, па дури и проектот за Вардарска долина кој не е мртов, а тоа е апла кинески интерес, од солунско пристаниште…
ФОКУС: Еве новата власт најавува дека ќе го реализира проектот за брза пруга во рок од 7 години, но не со кинески пари.
АПАСИЕВ: Дај Боже, јас давам поддршка. Или тој проект ќе заживее како крвоток кој ќе ги носи овие геостратешки интереси на Кина кон Европа или Македонија, ај да не бидам песимист, но црно ни се пишува. Ќе станеме полуфеудална територија каде во западна Македонија, или од Куманово преку Скопје и Велешко до Охрид ќе важи друг закон.
„СОЦИЈАЛИЗАМ СО КИНЕСКИ КАРАКТЕРИСТИКИ“
ФОКУС: Многумина кои сакаат да ве дискредитираат ве нарекуваат проруска партија, ве дисквалификуваат како „рубља патриоти“, но вие барем јавно не ја афирмирате толку Русија, туку говорите позитивно за Кина и кинескиот систем. Зошто сметате дека земјава треба да се развива според кинески модел?
АПАСИЕВ: Тие го викаат „социјализам со кинески карактеристики“, но не заборавајте дека ние веќе имавме социјализам со југословенски карактеристики.
Тоа значи дека средствата за производство да бидат јавни (државни, општествени или работнички), а не приватни. Не може да си дозволите се да оставите на глупавата идеја за некаква си „слободна рака на пазарот“ и капиталот.
ФОКУС: Во тој дел критиките се дека државата е лош газда.
АПАСИЕВ: Не е точно. Тоа се гледа во Кина, каде сите поголеми корпорации се со доминантна државна сопственост. Тој модел на Денг Сјаопинг е барем повеќе од половина од некогашниот модел на самоуправување на Југославија.
Кога доаѓале Кинези во 70-тите години да гледаат како се произведуваат фрижидери во Битола било доживување за нив, а сега произведуваат автомобили кои сами се паркираат и летаат, или ултрамодерни возови со брзина на авион. Тој модел се покажа како претерано успешен во споредба со европскиот или капиталистичкиот.
Кинескиот модел е всушност прилагоден југословенски модел со тоа што тие мудро играа. За разлика од Русија, кои отидоа на Перестројка и Гласност, тие направија само перестројка, односно само економска трансформација, со примање на странски инвестиции, но политичка не.
Затоа имате еднопартиски систем кој владее сѐ уште, тоа е Кинеската комунистичка партија со која само ние од Македонија соработуваме. Сега имаше 75 години од прослава на таква светска сила, а ниеден друг политичар не отиде.
Соработуваме и со руската Комунистичка партија, но таа е опозициска. И со кубанската воспоставивме соработка од скоро, ние сме со партиите со кои соработувала бивша Југославија.
ФОКУС: Често зборувате за Југославија, Тито. Искрено верувате во тоа или целта ви е да допрете со тој југословенскиот сентимент кај народот?
АПАСИЕВ: Јас не сум растен во Југославија, сум бил забавиште кога се распаднала. Но, Тито е во право кога во еден говор им вели дека сите јужнословенски народи – вие сте ништо ако сте разединети. И тоа го покажавме на дело.
Со југословенските војни ние – да се изразам хегелијански – од субјект на историјата, станавме објект на историјата. Бевме респектабилна балканска држава почитувана и од САД и од Русија и од Кина, за сега да сме пачавра од држави, територии владеани од мафии, кои им слугуваат на западните интереси. И тоа не е само за Македонија, туку за сите екс-ју држави.
ФОКУС: Освен што ве нарекуваат проруски и пројугословенски ориентирани, ви лепат и други етикети – фашист, радикал, анархист… Сами за себе што би рекле – кој е Апасиев и која е Левица?
АПАСИЕВ: Идеолошки – санданист, јакобинец и кемалист. Левица е социјалистичка партија, зашто имаме поширок спектар, не сме хард-кор комунисти или анархисти.
ФОКУС: Користите нетипичен говор за политичар. Дали тоа го правите плански, бидејќи како професор по реторика сигурно знаете што поминува добро во јавност и меѓу луѓето? Или станува збор за ваш природен израз?
АПАСИЕВ: Мешавина е. Секој политичар си гради сопствен имиџ и слика во јавноста. Јас важам за пис на јазик, но имам интересен метод, а тоа е со сељаците сељачки, а со интелектуалците интелектуално.
Знам да водам дискусии на ниво на докторат, но знам и да ве испцујам, и тој микс не можат да го сварат едните и другите и не знаат како да се постават. Изградив некој оригинален имиџ со текот на времето.
ФОКУС: Уште ли водите „црвен тефтер“?
АПАСИЕВ: Еве го, тука има преку 100 луѓе кои Левица кога ќе дојде на власт ќе ги поапси. Си ги запишуваме педантно.
ФОКУС: Освен политичар, Вие сте и универзитетски професор, па дали наставниците требаше да добијат повисоки плати?
АПАСИЕВ: Ние сме држава која на балканско и европско ниво одделува најмалку за образование. Тука можеше да се најде заеднички јазик и со албанските партии за тој сектор да се стабилизира, да се даваат пари за студентски домови, за универзитети, за плати на професори.
Едно Косово има поголеми плати на универзитетски професор и наставен кадар во школи. Тој сектор треба да се крене на европскиот просек, зашто вака најпаметните студенти ни ги зема Словенија, вториот универзитет е љубљанскиот по број на запишани македонски студенти.
ФОКУС: Дали преку образование може да спречи или ублажи демографскиот егзодус?
АПАСИЕВ: Образовани луѓе комуницираат на поинаква фреквенција, и оваа демагогија што ја фура Мицкоски пали кај необразован народ.
Намерно се оди образованието да се држи на маргините, поразително е професор да бара списоци од 10-15 луѓе и да го однесе во месниот комитет на владејачката партија за да го стават професор. Па, ни во „едноумието“ не било така.
КОЈ ЌЕ СОБЕРЕ 61, ТОЈ ПРАВИ ВЛАДА
ФОКУС: Што мислите за најавите на власта за дестабилизација?
АПАСИЕВ: Може ДУИ ќе се обиде со некои протести, но тоа е партија која 20 години е во власт и таа нема членство, освен можеби некои радикални навивачи, кое може да истрпи улица.
Тој терористички дух кој го носеа и на борци за слобода се претвори во естаблишмент преполн со привилегии. И некој што бил 14 години директор ќе ви дојде на 1-2 протести и толку. Нема кондиција за повеќе. Затоа не очекувам некоја посериозна дестабилизација.
ФОКУС: Како пак гледате на најавите на ДУИ дека ќе понуди платформа за почитување на легитимитетот? На некој начин, тоа значи враќање во игра на тој принцип „победник со победник“, кој го издејствува своевремено Ахмети, но неговиот партнер Села сега заговара формирање на влада според правило „мандатар со победник“.
АПАСИЕВ: Тие сами си го прекршија правилото.
ФОКУС: Според Вас, како треба да се формира владата?
АПАСИЕВ: Принципот е уставен и нема што да мислиме, тоа се вика уставна математика – кој собере 61, тој прави влада. Крај на муабетот.
ФОКУС: Но, колку ќе биде стабилна таа влада од повеќе партии кои би собрале 61 пратеник, а во опозиција да остане една партија или коалиција со 59?
АПАСИЕВ: Тоа се прави и во Европа, сега во Австрија ќе се прави, најголемата партија да не прави влада, тоа и во Франција на левицата и го направија. Тоа не е праведно, но што значи политички?
Тоа значи дека на наредни избори, на тој што за малку му требало да направи влада, сигурно ќе направи влада баш поради револтот.
ФОКУС: Кога така ќе се постават работите, испаѓа дека и ВМРО-ДПМНЕ победи толку јако на минатите избори, бидејќи претходно како најсилна партија беше заобиколена со поголема коалиција. Сега се јавува дилемата дали ова туркање на ДУИ во опозиција ќе ја врати посилна?
АПАСИЕВ: Па, може (ДУИ) и да победи. Кога веќе ја споменавме таа разлика меѓу ДУИ и ВРЕДИ…
Мислам дека ДУИ се полесни за манипулација за Западот зашто им висат Хашки случаи. Бидејќи тоа автентично толкување е гола вода, тука важат меѓународни конвенции за хуманитарни права, според кои воени злосторства не застаруваат, тие во секој момент може да им ги активираат ако почнат да лаат повеќе од потребното.
Во случај ако Али Ахмети стане новиот Албин Курти и оди во екстрем и затоа мислам дека се бенигни. Не заборавајте дека во меѓувреме од голтари станаа милионери и не им одговара дестабилизација, зашто милионите ќе им отидат во вода.
Од друга страна, видете ги новите, тие се необалисти, иредентисти, сецесионисти, антимакедонисти, македонофоби кои не го ни кријат тоа, и затоа велам дека се поопасни зашто креваат споменик на балистот Џемо Хаса, на кољачот на Македонците. И на Мицко не му е проблем со такви луѓе да прави коалиција, ни НЗС не договориле кога правеле влада.
ФОКУС: Сепак, ДУИ беше најомразена партија кај Македонците генерално и на таа карта ВМРО доби, сега гледаме дека и СДСМ се обидува да се дистанцира од ДУИ. Нема толку голем анимозитет кон ВЛЕН.
АПАСИЕВ: Ви гарантирам дека до следни избори ВРЕДИ ќе бидат најомразените.
За разлика од Артан Груби и неговата простачка ароганција, која беше антипатична и одвратна за просечниот Македонец, овие играат стратешки на долг рок, плански ја косоваризираат државата, се обидуваат да елиминираат се што е македонско, од јазик, инсигнии, симболи, имиња на улици, колективна антифашистичка меморија итн…
Буквално одат на етничко чистење во институции каде ќе влезат да раководат и затоа се позлобни од другиве, кои сепак некако можете да ги контролирате.
ДОШЛА ПОНУДА ЗА ПОТКУП ПО СТРУМИЧКА ЛИНИЈА ПРЕКУ БИЗНИС- КАНАЛИ!
ФОКУС: Вашиот колега Крмов во една прилика обвини дека му бил понуден поткуп. Може ли да откриете детали како се случило тоа, со оглед дека се работи за сериозно обвинување?
АПАСИЕВ: Мене не ми бил понуден, но на Крмов му е понуден. Тоа е кога првпат станавме пратеници. Дошла понудата по струмичка линија и тоа преку бизнис-канали, а не политички.Не за џабе ги освоивме симпатиите со прекарот Неподмитливите, го покажавме тоа и влеваме доверба кај народот за наредни избори да ни дадат супер број на гласови.
НЕ БЕГАМЕ ОД ТЕПАЧКА ВО СОБРАНИЕТО, ИМАМЕ НАБИЛДАНИ ПРАТЕНИЦИ!
ФОКУС: Колку новиот деловник ви ги врзува рацете во Собранието? Дали сега е возможен филибастер?
АПАСИЕВ: Новиот деловник планираме да го оспориме пред Уставен суд, зашто го загрозува правото на опозициско политичко делување. Можете да правите дебата 3 плус 3 дена, но се е до креативното толкување на претседателот на Законодавно-правната комисија на кој ќе му поднесеме кривична, бидејќи според него – не било 3 плус 3 дена, туку само 3 дена!? Значи, и тоа малку што ни остана сакаат да ни го земат.
Ова е неиздржлив деловник за опозицијата и уште тогаш им кажував дека Собранието ќе се девалвира и ќе стане фабрика за штанцање лоши закони. И, еве, тоа се случува.
Но, сите опции ќе ги користиме, да не реагиравме некни за директорот на Царина никој немаше да знае дека се става трет директор. А сега сите знаат и дека Дафина има 6 стана и плус земала 6.000 евра годишно за патни трошоци.
ФОКУС: Имаше и обид за инцидент на оваа седница. Што поточно се случи?
АПАСИЕВ: Имаше пцовки, навреди, дофрлување од некои анонимуси пратеници од ДПМНЕ. Може да се испотепаме, ние не бегаме и од тепачка, ако дојде „нож до коска“. Имаме солидни пратеници набилдани, Јанчев, Амар, Борис – вежбаат.
ФОКУС: Има ли некаква игра околу Законот за бранители?
АПАСИЕВ: Тука ќе видите зошто Албанците имаат 3 држави, а Македонците ќе ја изгубат и едната што ја имаат. Илире Даути вика не го ставам законот додека сум жива.
Од друга страна, Сања Лукаревска вика леле морам да свикам седница во рок од 24 часа, зашто ќе добијам кривична. И како со таков калибар на луѓе ќе се спротивставиме на овие силеџии?
Додека еден политичар не е спремен да оди во затвор за каузата за која се бори, тој не е политичар и државник!
ФОКУС: Сепак, тоа е лесно да е каже. И Груевски викаше апсете ме мене – остајте ги другите, но побегна.
АПАСИЕВ: На Груевски му фатија за ситно, за мерцедесот, како Ал Капоне за данок што го фатиле.
ТОА ШТО ВЛЕГОВМЕ ФРОНТАЛНО СО МЕДИУМИТЕ НЀ ЧИНЕШЕ 3 ПРАТЕНИЦИ!
ФОКУС: Често сакате да се конфронтирате со дел од традиционалните медиуми. Нели сметате дека тоа ви е контрапродуктивен пристап, токму од причина која и самиот ја рековте – сѐ уште најмногу се гледа телевизија? Плус, би додал дека ТВ гледаат повозрасни луѓе, кои се поверни гласачи, за разлика од младите кои повеќе се на социјални медиуми. Направивте ли тука стратешка грешка?
АПАСИЕВ: Стратешки не, но тактички погрешивме што влеговме фронтално против медиумите, зашто тоа нѐ чинеше 3 пратеници. Но, јас сум ленинист и мислам дека не постојат независни медиуми! И мислам дека новинарите се покорумпирани и од политичарите барем, во македонски прилики.
ФОКУС: Врз основа на што го тврдите тоа?
АПАСИЕВ: Јас лично знам за расипани ваши колеги кои буквално се пазарат, пред мене имаат вртено на министри за да помине некој закон и сл. Шемите на бизнис-новинари се провлекуваат и јас сум лут на оваа црно-бела слика во медиумите, цело време ДПМНЕ–СДСМ, како ние да не постоиме.
Но, тактички си го плативме цехот, а стратешки мислам дека оние концесии на 5-те национални медиуми треба да се одземат на некој од нив, не кажувам на кој но треба да се одземат.
И со времето добра е позиционираноста на Левица да инвестира во социјални наместо во традиционални медиуми, зашто за 1-2 изборни циклуси отсега порталите и социјалните медиуми ќе бидат доминантни.
ЗНАМ СУДИИ КОИ ПОДМИТУВАЛЕ ПРАТЕНИЦИ, РЕШЕНИЕТО Е АНТИ-НЕПОТИСТИЧКИ ЗАКОН!
ФОКУС: Колку најавеното распуштањето на советите за судии и обвинители може да ја врати довербата во правосудството?
АПАСИЕВ: Јас сум изгубил надеж за тоа, тие тела се модели кои се нефункционални. Имате судии избирани во тефтерчиња и во едната и во другата гарнитура.
Знам примери за милионери судии, судии кои на пратеници давале 10-15.000 евра мито за да станат судии или колеги мои за да се запишат на Академија. Ова е пролупан модел, како сакајте шминкајте го тоа е само лечење на полумртов пациент.
ФОКУС: Кое е тогаш решението?
АПАСИЕВ: Има решение, но тие се рески. Едно е естонскиот модел на предвремена пензија на сите и избирање ново.
Друго е антинепотистички закон, лекс специјалис, да не може мајката да е судијка, таткото обвинител, синот адвокат, ќерката нотар во исти апелациски подрачја, тоа практично се судско-адвокатски мафии.
Следно е потекло на имот. Имате судии кои се милионери. Сега имавме судија кој 95 пати се слушнал со странка додека му го судел процесот!? Тоа е недозволиво. Имате механизми, познати се, но нема политичка волја.
ФОКУС: Што мислите за идејата за испитување на потекло на имот на сите граѓани?
АПАСИЕВ: Тоа е преголем залак со ваква бирократија, треба да биде стратешки осмислено, видовте што се случи со лустрацијата. Фазно треба да се спроведува, прво треба стотици функционери државата да ги прочешла – пратеници, министри, државни секретари… И тоа го има решено Италија со нивните антимафијашки закони.
Дури и лајфстајлот се оценува. Ако ти си работничка класа, а возиш ламборџини и пушиш не знам какви пури и носиш саати од 60.000 евра, таа комисија што ќе се формира има право се да провери.
И да се оди со роднинска поврзаност зашто пајаковата мрежа е најчесто по роднинска или бизнис поврзаност. Има модели, само не се применуваат зашто не им одговара. Тоа може само Левица да го направи, бидејќи ние не должиме на никој, на олигарси и лобисти.
ФОКУС: Да, но за да дојдете во таква ситуација треба да дојдете на власт, а како вие се поставувате испаѓа дека мора сами да освоите 61 пратеник за тоа да се случи, зашто тешки сте за коалицирање. Разбирам дека принципиелно сте против предизборни коалиции, но зошто ги затворате вратите за постизборни соработки?
АПАСИЕВ: Па не речи два пати, Вучиќ еве сам освојува две третини.
Постизборни соработки доаѓаат во предвид и мислам дека Левица треба да се отвора за постизборни соработки, но предизборни не, тоа сакаме да забраниме зашто тоа е лажење на народот.
Имате 25 партии во коалиција и викате ДПМНЕ освои 58. Не, 25 партии освоивте 58. А ние сами освоивме 6.