Популарниот рок бенд Ареа ја промовираше песната ,,Ангелу мој” која ќе се најде на нивниот нов албум. Истиот бил во завршна фаза, а со неговото издавање групата ќе обележи три децении на сцената. Песните на Ареа се пренесуваат од една на друга генерација, и веста за новиот албум ги израдува нивните слушатели.
Вокалистката Ружица Милошеска Бричоска и нејзиниот сопруг Ивица, кој е гитарист во бендот, направија музичка револуција на почетокот на деведесеттите години на минатиот век, кога се појавија на сцената. Започнаа со дебитантскиот албум ,,Случајно тука”, а во 2000 година со хитот ,,Сите мои слики” покажаа дека се еден од најквалитетните бендови на нашата сцена.
Универзална сала ја наполнија три пати, а Скопски саем два пати. Во интервју за ,,Фокус” од пред три години, Ружица раскажа дека иако немаат нови материјали, сепак се доста барани и постојано настапуваат. Тогаш на прашањето дали подготвуваат големо враќање на сцената, изјави дека никогаш не се знае дали некоја песна ќе стане хит.
-Потребно е да се состават повеќе коцкички за такво нешто. А за тоа сметам дека не сме доволно паметни. По мене, конците ги води некој „одозгора“ или со други зборови ние спремаме песни, а што ќе биде само Бог знае-раскажа таа.
Вики Клинчарова