Полицијата во Белгија уапси осум лица за време на антитерористички рации низ целата земја, како дел од операциите насочени кон спречување на можни напади, соопшти федералниот обвинител.
Полицијата во Антверпен синоќа на барање на истражниот судија изврши пет претреси во Мерксем, Боргерхаут, Деурн, Синт-Јанс-Моленбек и Еупен.
Обвинителството соопшти дека се уапсени пет лица, но не соопштуваат детали за тоа што е пронајдено.
„Најмалку две инволвирани лица се осомничени дека планирале терористички напад во Белгија. Целта на нападот се уште не е утврдена“, соопштија обвинителите.
Во меѓувреме, бриселската полиција изврши рација во блиските градови Завентем, Моленбек-Сен Жан и Шарбек во одделен случај и уапси три лица.
„Овие лица се осомничени и дека планирале терористички напад во Белгија“, соопштија од Канцеларијата.
Постојат врски меѓу двата случаи, но понатамошната истрага ќе треба да открие до кој степен двата случаи биле испреплетени, пишува Alarabia News.
Апсењата доаѓаат додека во Белгија им се суди на осомничените членови на ќелијата што ги изврши најсмртоносните мирновременски напади на белгиска територија пред седум години.
Обвинетите се соочуваат со обвиненија, вклучувајќи убиство, обид за убиство и членство или учество во акти на терористичка група, за време на утринските напади на главниот белгиски аеродром и на централната патничка линија на 22 март 2016 година.
Покрај 32-те лица кои загинаа тој ден во Брисел, околу 900 беа повредени или претрпеа психичка траума.
Меѓу обвинетите е Салах Абдеслам – единствениот преживеан од екстремистите на ИСИС кои го нападнаа театарот Батаклан во Париз, градските кафулиња и националниот стадион на Франција во 2015 година.
Тој беше осуден на доживотен затвор без помилување за злосторството во француската престолнина.