Во Ровињ се одржа првиот AI Weekend организиран од Weekend Media Festival и CroAI, кој ги собра регионалната и светската технолошка сцена за да разменат информации, знаења и да дискутираат за тоа што дополнително ни носи вештачката интелигенција (ВИ) во иднина.
Еден од главните говорници, Марк ван Рисвик, поранешен главен директор за производи (CPO) на Tinder, потпирајќи се на своето богато искуство во индустријата за игри и технолошки иновации во Glu Mobile и во Electronic Arts, истражи како се развива ВИ пејзажот и го постави клучното прашање: „Дали навистина денешниот технолошки развој им служи на човечките потреби?“ Тој ја нагласи важноста на градењето доверба кај потрошувачите, истакнувајќи дека 54% од корисниците на ВИ не веруваат во податоците што се користат за тренирање на ВИ системите, истакнувајќи ја потребата на корисниците да им се овозможи контрола врз нивните податоци и разбирање на тоа како тие податоци се користат.
На важната тема за испреплетеноста на ВИ и сајбер-безбедноста зборуваше Евана Ху, извршен директор на компанијата Omelas, на предавањето под покровителство на Американската амбасада насловено „ВИ и сајбер-безбедноста: Проширување на дигиталното бојно поле“, каде што ги истакна брзорастечките сајбер-напади како ransomware и нападите врз индустриските системи, потенцирајќи дека ВИ може да им помогне и на напаѓачите и на одбранбените сили. Таа нагласи дека е важно да се разбере дека ВИ е само алатка која ни дава можност да се бориме против заканите, но истакна дека повеќе не е прашање дали ќе бидеме нападнати, туку кога. „Сто проценти е сигурно дека ќе бидеме нападнати или дека некаде случајно ќе се компромитираме во дигиталното опкружување. Заканите се променија. Површината на нападите се умножи, како за поединците, така и за организациите“, рече Ху и предложи три работи со кои може да се спречат повеќето напади: VPN, енкрипција и менаџери на лозинки.
Тобијас Цвингман, ко-основач на Rapyd.ai, на предавањето „Како да се успее и како да не се успее со ВИ“ поддржано од Фондацијата Konrad-Adenauer-Stiftung, ги истакна честите грешки на организациите при воведување на ВИ технологии, но и клучните елементи на успехот. Преку едноставниот пример кога од ВИ го бараме терминот „голема мачка“, а добиваме тигар, тој го спореди недостатокот на прецизност при користење на ВИ со погрешни очекувања. Исто така, тој нагласи дека неуспехот е чест дел од иновацијата, но дека е клучно да се учи од тие грешки за да се развијат успешни стратегии за долгорочна имплементација на вештачката интелигенција.
Од технолошки производи од Хрватска до трета најкористена ВИ апликација во светот
Како од мала земја да се донесе глобално силен технолошки производ објасни Дамир Сабол, директор за софтвер инженеринг во Google. Сабол со публиката сподели како ја добил идејата за создавање на Photomath, апликација за решавање математички проблеми, која денес се презема повеќе од 700 милиони пати, која ја продал на Google, и денес е трета најкористена апликација во светот. Идејата се родила во 2013 година додека решавал математички задачи со својот син, а технологијата на Microblink му овозможила да го реши проблемот преку автоматизирано скенирање.
Што носи ВИ за спортот и fintech?
На панелот „Кога компаниите со производи се обложуваат на ВИ?“ Иван Бешлиќ, CSO на Sofascore и Хрвоје Чосиќ, извршен директор на Aircash, дискутираа за улогата на ВИ во спортот и fintech, истакнувајќи дека ВИ помага во подобрување на корисничкото искуство и оптимизација на процесите. Бешлиќ ја нагласи важноста на стручноста при користење на ВИ алатки, додека Чосиќ ја истакна соработката меѓу деловните и техничките тимови. Како добар практичен пример, Бешлиќ ја посочи користа од ВИ за препознавање на говор на омраза во четовите во живо, а Чосиќ за onboarding и управување со ризиците. На крајот, двајцата панелисти заклучија дека едукацијата е клуч за успешно користење на ВИ.
Важноста на Законот за ВИ
„Не сме среќни, но можеше да биде и полошо“, одговори Даниел Абу, претседател на ЕУ ВИ Форумот, на прашањето на модераторката Мили Дукан, генерален директор на EuroNavigator, за неговите размислувања за европскиот закон за вештачка интелигенција, кој стапи на сила на почетокот на август. На панелот „Законот за ВИ е на сила, што сега?“, панелистите изразија длабока загриженост за воведувањето на законот, бидејќи, како што велат, „дали може да се регулира нешто што постојано се менува?“. Тие, исто така, наведоа дека многумина кои не ја разбираат целосно улогата на вештачката интелигенција се плашат од нејзиното влијание врз општеството и бирократијата. Заклучокот на панелот беше дека за квалитетен развој на ВИ треба да се поработи на едукацијата и етиката, што е важно како при изработката, така и при користењето на ВИ алатките.
Градење на ВИ агенти за претпријатија
Адам Силверман, извршен директор на AgentOps.ai, зборуваше за растечкиот пазар на ВИ агенти, кој се предвидува дека ќе достигне 285 милијарди долари до 2028 година. Силверман зборуваше за алатките кои им се потребни на програмерите за развој и тестирање на ВИ агенти и за усогласување со регулаторните стандарди. Тој ја нагласи важноста на раната примена на ВИ автоматизациите, кои носат брзи и ефикасни резултати, со предупредување дека целосна автоматизација не е секогаш можна. Заклучокот беше дека програмерите треба внимателно да ги избираат ВИ решенијата за да избегнат скапи грешки и да ја зголемат оперативната ефикасност.
Иновации наспроти бирократија
Дека ВИ е технологија на денешницата се согласи со останатите панелисти и говорници и д-р Мазин А. Гадир, директор за партнерства и стратешки сојузи во IQVIA, водечки глобален давател на напредна аналитика, технолошки решенија и услуги за клинички истражувања за индустријата на биолошки науки, и експерт за дигитално здравје. Иако и на овој панел се отвори прашањето за иновации и бирократија, д-р А. Гадир преку пример на ВИ иницијативата за дијабетес во Дубаи истакна дека владите играат клучна улога во финансирањето и едукацијата. И покрај брзите резултати на ВИ, како што е скенирање за помалку од 24 часа, проблемите со недостиг на таленти, бирократија и усвојување на технологии сè уште остануваат. На крајот, модераторот Златко Матокановиќ, директор за истражување и развој на вештачка интелигенција во агенцијата Q, ја нагласи важноста на заедничкиот ангажман, а д-р Гадир ја истакна потребата за трајно финансирање и поддршка од владите.
Главната идеја на AI Weekend беше споделување на меѓусебни знаења и искуства и поттикнување на компаниите да се отворат кон старт-апи и агенции за заедничка соработка и користење на ВИ на најдобар можен начин. Повеќе информации за првиот AI Weekend можете да најдете на веб-страницата и социјалните мрежи Instagram, Facebook и LinkedIn.
ПР