Ахмети денеска и утре во Хаг ќе дава исказ пред Специјалнoто обвинителство за Косово

-Претпочитам да не одговарам пред државни микрофони на партиски прашања, но еве кратко, тој е повикан во својство на сведок, одговори портпаролот на ДУИ, Бујар Османи, на прес-конференцијата која како министер за надворешни работи ја одржа со вицепремиерот за европски прашања Никола Димитров.

Ахмети во Хаг, како дел од ОВК, треба да биде испрашуван во врска со војната на Косово и таму ќе биде на денеска и утре, бидејќи меѓународните обвинители побарале да им биде на располагање два дена.

Од специјалното обвинителство за Телма, минатиот месец, кусо изјавија дека до конечното одобрување на обвинителниот акт во јавноста не споделуваат детали ниту пак се знае кој е обвинет, а кој сведок и тоа правило важи и за Ахмети.

Ахмети пред изборите објави дека е поканет да сведочи затоа што бил дел од раководството на ОВК за време на војната со српските сили. Тој додаде дека ќе ги брани светлите цели на албанската ослободителна борба.