Американскиот претседател Доналд Трамп изјави за Ројтерс дека САД ќе се повлечат од Иран „прилично брзо“, но се подготвени да се вратат за „целни напади“ доколку е потребно. Неговата изјава доаѓа само неколку часа пред најавеното обраќање до нацијата, пишува Ројтерс.
На прашањето кога САД ќе ја сметаат војната во Иран за завршена, Трамп одговори: „Не можам да ви кажам точно… ќе излеземе наскоро“. Тој тврди дека акцијата на САД обезбедила Иран да нема нуклеарно оружје.
„Тие нема да имаат нуклеарно оружје затоа што сега не се способни за тоа. А потоа ќе се повлечам и ќе земам сè со мене. Ако треба, ќе се вратиме и ќе извршиме целни напади“, рече Трамп.
Трамп, исто така, рече дека ќе го изрази своето негодување кон НАТО поради она што го смета за недостаток на поддршка од страна на алијансата за целите на САД во Иран. Тој потврди дека „апсолутно“ размислува да се обиде да ги повлече САД од алијансата.
Трамп го покрена прашањето за напуштање на САД од НАТО, овој пат со многу посериозен тон отколку претходно, во услови на војна со Иран и растечки тензии на Блискиот Исток.
Во интервју за Телеграф, тој рече дека сериозно размислува за таков потег, нарекувајќи го НАТО „хартиен тигар“ и тврдејќи дека алијансата повеќе не функционира како што треба.
„НАТО денес е непрепознатлив. Тој никогаш не ме убеди. Секогаш знаев дека се хартиен тигар, а и Путин го знае тоа“, рече Трамп.
Ваквите изјави доаѓаат во време кога САД се обидуваат да најдат излез од војната со Иран, додека во исто време расте притисокот врз сојузниците за нивната улога во безбедноста на клучните поморски патишта, особено Ормутскиот теснец.