Руската Федерација е подготвена да посредува во решавањето на конфликтот на Блискиот Исток „доколку сите го сакаат тоа“, изјави денес министерот за надворешни работи на Русија – Сергеј Лавров.
Тој ја коментираше изјавата на иранскиот амбасадор во Москва – Казем Џалали, кој изјави дека Техеран ќе ја поздрави улогата на Русија во случај на избор на медијатор за преговори за иранскиот конфликт.
Џалали претходно изјави за ТАСС дека иранската влада ги цени пријателските односи на руската влада и очекува дека Москва, како медијатор, ќе се обиде да ги земе предвид интересите на Исламската Република Иран.
Сепак, според неговите зборови, одлуката за медијација сè уште не е донесена поради, како што наведува, недостатокот на волја од страна на агресорот.
Во интервју за руската новинска агенција ТАСС, Џалали истакна дека за какви било преговори е неопходно прекинување на агресијата, безбедносни гаранции и почитување на неговите права, заедно со подготвеноста за продолжување на самоодбраната сè додека не се отстранат заканите.
Тој додаде дека Техеран ги поддржува сите конструктивни иницијативи за стабилност на регионот, но дека секој предлог за постигнување мир и траен прекин на огнот мора да влијае на реалната состојба на теренот и да ги исполни клучните политички и правни услови.