Поранешниот премиер Никола Груевски се чини дека далеку од дома се пронајде во улогата на бизнисмен, бидејќи сè уште дава консалтинг услуги на Унгарците, а неговата фирма бележи заработувачка.
Компанијата I.C.I.C. Kft. екс премиерот ја регистрираше летото во 2021 година, на 14 јули, во селото Пецел, на 20-тина километри од Будимпешта. Седиштето е во напуштена куќа на улицата Бошкаи број 9, а тој е наведен како единствен сопственик и извршен директор.
Фирмата на Груевски е активна веќе четири години, и иако врти милиони, но само како унгарски форинти, сепак неговата заработувачка пресметана во евра се брои во неколку илјади. Но, важно е дека добивката, иако не тече, сепак „капнува“ секоја година, бидејќи досега не пријавил загуби.
Според поднесениот годишен извештај за минатата година, 2024, тој остварил продажба од 4,1 милиони форинти (10.500 евра), за разлика од годината претходно, кога имал 9.700 евра. По одбивањето на трошоците и даноците, 6.860 евра му останале како чиста добивка, од кои нешто над 5.000 евра ги подигнал како дивиденда.
Извештајот, исто така, открива дека осудениот бегалец е прогласен за кредитоспособен, бидејќи во билансот на состојба се појавил и долг од 2,5 милиони форинти или околу 6.500 евра.
Главниот фокус на компанијата е бизнис-консалтинг, но, исто така, е лиценцирана и за трговија на големо со порцелан и производи за чистење, трговија на големо со храна, пијалаци и тутун, управување со средства, рекламирање, односи со јавност и комуникација.
Но, очигледно со идеја да го развие бизнисот, Груевски уште во 2022 година ги проширил своите бизнис-можности, регистрирајќи уште 10 дополнителни дејности.
Оттогаш, неговата фирма е застапник и за трговија на големо со мебел, покуќнина, теписи, опрема за осветлување, канцелариски мебел, трговија на големо со дрво, градежни материјали, санитарна опрема, трговија со мешани производи на мало, боја, стакло, ќебиња, ѕидни и подни облоги…
За Груевски сè уште нема информација, дали, освен компанијата, поседува имот во Будимпешта. И понатаму е тајна адресата на која живее, бидејќи како лична адреса во Унгарија, тој при формирањето на компанијата ги навел податоците на неговиот адвокат во Будимпешта.
Нашата држава, пак, веќе одамна крена раце од бегалецот Груевски. Последното и единственото барање за екстрадиција до Унгарија беше испратено во 2018 година, а по негативниот одговор од унгарските власти, веќе 6 години никој повеќе не го побарал. Во 2023 година, државата во раце го имаше и најсилниот аргумент за негова испорака, односно 9-годишната правосилна затворска казна за случајот „Плацови на Водно“, но не го искористи адутот.
Министерот за правда Игор Филков, неодамна во интервју за „Фокус“, појасни дека ново барање за екстрадиција би било беспредметно, бидејќи екс премиерот има добиено азил.
Валентина Вурмо