Галичник денес повторно е исполнет со свадбарски песни, зурли, тапани и традиционални обичаи. На Петровден се одржува Галичката свадба 2026, една од најпрепознатливите културни манифестации во Македонија.
Годинашни галички младенци се Александар Пендароски и Мартина Михајлова, чија свадба носи и посебна семејна симболика. Токму пред 35 години, на првата современа Галичка свадба во 1991 година, се венчале родителите на Александар.
За младоженецот, учеството не е само свадбена свеченост, туку продолжување на семејната поврзаност со Галичник и неговите обичаи. Мартина, пак, го опиша учеството како чест, одговорност и привилегија да се биде дел од традиција што опстојува со векови.
Во текот на денот се изведуваат некои од највпечатливите ритуали на Галичката свадба: „канење на мртвите“, „канење на кумот“, бричење на зетот, гледање низ прстен, тргнување по невестата и традиционалното дарување.
Младенците ќе се венчаат во црквата „Св. Петар и Павле“, а свадбената свеченост ќе заврши со традиционалното испраќање на тапанџиите и зурлаџиите.
Главните свадбарски обичаи започнаа уште во саботата, со китење на ситото, замесување на сваќата, пречек на тапаните и поставување на свадбарскиот бајрак.
На платото пред чешмата „Упија“ беа изведени свекрвиното и невестинското оро, како и „Тешкото“ во изведба на ансамблот „Танец“. Еден од најсликовитите моменти е и одењето на невестата по вода од трите галички чешми, придружувана од свадбарите.
Галичката свадба не е само реконструкција на минатото. Таа е редок пример за обичај што и денес се пренесува преку вистинска свадба, семејства, музика, носии и заедничко учество на целото село.
Маја Терзиова