Европската унија сака да ги балансира економските односи со Кина, да ја намали зависноста и да соработува во решавањето на глобалните проблеми и бара од Пекинг да престане да ја поддржува руската воена економија, изјави денес претседателката на Комисијата, Урсула фон дер Лајен.
„Првиот приоритет на кој треба да се фокусираме е балансирањето на нашите економски односи со Кина“, рече фон дер Лајен во дебатата во Европскиот парламент пред самитот ЕУ-Кина, кој ќе се одржи на крајот од овој месец во Пекинг. Претседателката на Комисијата истакна дека Кина има најголем трговски суфицит во историјата на човештвото, а во трговијата со ЕУ минатата година трговскиот суфицит изнесувал 300 милијарди евра.
Во исто време, за европските компании е сè потешко да работат во Кина. „Нашите производи се систематски дискриминирани во јавните набавки поради политиката на Пекинг „купувај кинески производи“. Производите и услугите произведени во Кина автоматски имаат ценовна предност од 20 проценти на јавните тендери. Тоа едноставно не е фер“, рече фон дер Лајен.
Фон дер Лајен го критикуваше субвенционирањето на прекумерниот производствен капацитет во Кина од страна на владата, што ги преплавува глобалните пазари и ја задушува конкуренцијата.
„Кина не може да се потпре на извозот за да ги реши своите домашни економски предизвици“, вели фон дер Лајен.
Друг приоритет за ЕУ е да се забрза намалувањето на ризикот од зависност од Кина, која својата доминација во производството на ретки метали, магнети итн. ја користи како економска лост.
„Намалувањето на ризикот е едноставно прашање на европска независност“, рече претседателот на Комисијата.
Фон дер Лајен ја критикуваше поддршката на Кина за Русија и руската воена економија.
„Кина де факто ја овозможува воената економија на Русија и ние не можеме да го прифатиме тоа. Секогаш велев дека начинот на кој Кина се однесува кон војната на Путин ќе биде одлучувачки фактор за односите меѓу ЕУ и Кина“, вели фон дер Лајен.