Американскиот актер, режисер и продуцент Џорџ Клуни ја доби наградата „Златен лав“ за животно дело на свеченото отворање на 83-тиот Филмски фестивал во Венеција, како признание за неговиот исклучителен придонес кон светската кинематографија.
Престижната награда му беше врачена за време на церемонијата на отворање, со која се оддаде почит на неговата повеќедецениска кариера, во текот на која оствари бројни значајни улоги и успеси како актер, режисер и продуцент.
„Живееме во време кога луѓето на власт и оние со најмногу пари ни велат да се плашиме едни од други“, рече Џорџ Клуни вечерва за време на отворањето на Филмскиот фестивал во Венеција и додаде: „Но, ние знаеме подобро од тоа, зарем не? Бидејќи историјата нè учи на една лекција. Првите луѓе што авторитаристите се обидуваат да ги замолчат не се политичарите. Тоа се новинарите кои поставуваат прашања, уметниците кои одбиваат лесни одговори, филмаџиите, писателите, актерите и музичарите кои инсистираат на тоа дека некој што никогаш не сте го сретнале заслужува ваша емпатија.“
Клуни тврди дека „приказните се секогаш опасни за луѓето што ги продаваат преку страв“ и дека „луѓето што се плашат од книги, музика и приказни никогаш не се херои во историјата“.
Тој заклучи: „Значи, да, филмовите не запираат војни, не ја намалуваат инфлацијата, не местат избори. Но, тие прават нешто извонредно. Нè потсетуваат дека странецот никогаш не е странец… ако сè уште можеме да седиме заедно во темница и да се грижиме за луѓе што никогаш не сме ги сретнале, мислам дека ќе бидеме добро“.