Собраниската Комисија за финансирање и буџет денеска ја продолжува расправата по Предлог-буџетот за 2027 година во второ читање, за кој се поднесени повеќе од 300 амандмани. Дебатата се одвива во атмосфера на остри политички спротивставувања околу економските проекции, јавниот долг, капиталните инвестиции и планираните расходи.
Комисиската расправа започна во петокот и, согласно собранискиот Деловник, може да трае до десет дена – четири дена се предвидени за општ претрес, а шест за разгледување на поднесените амандмани.
Министерката за финансии Гордана Димитриеска-Кочоска, образложувајќи го буџетот, истакна дека за 2027 година се проектирани вкупни приходи од 395,4 милијарди денари, што претставува раст од 5,7 проценти во однос на претходната година. Вкупните расходи се планирани на 440,4 милијарди денари.
Според предлогот, даночните приходи треба да достигнат 223,1 милијарда денари, што е зголемување од 6,4 проценти, додека за исплата на плати се предвидени 57,2 милијарди денари, односно 3,4 милијарди повеќе во споредба со проекциите за 2026 година.
Буџетскиот дефицит е проектиран на 45 милијарди денари или 3,5 проценти од бруто-домашниот производ, а за капитални инвестиции се планирани 40,8 милијарди денари.
Министерката посочи дека јавниот долг заклучно со 30 септември изнесувал 56,6 проценти од БДП и оцени дека економските показатели упатуваат на позитивни движења. Според неа, растот на БДП во вториот квартал достигнал 4,3 проценти, додека за целата 2027 година се очекува економски раст од 3,8 проценти. Воедно, се прогнозира раст на бруто-инвестициите од 6,8 проценти.
Димитриеска-Кочоска нагласи дека буџетот е насочен кон постепена фискална консолидација, подобра наплата на приходите и рационално трошење на јавните средства, со цел да се обезбеди економски раст, повеќе инвестиции и подобар животен стандард.
Од владејачката ВМРО-ДПМНЕ, пратеникот Бојан Стојаноски оцени дека буџетот обезбедува финансиска стабилност и значителен инвестициски циклус. Тој посочи дека за капитални инвестиции во централниот буџет се предвидени околу 663 милиони евра, а дополнителни 18 милијарди денари преку Јавното претпријатие за државни патишта.
Според Стојаноски, во текот на 2027 година се очекува истовремена реализација на шест автопатски делници, продолжување на изградбата на третата фаза од железничката пруга на Коридорот 8 и подготовка на нови проекти на Коридорот 10.
Тој посочи и дека државата следната година треба да сервисира долгови во висина од 2,43 милијарди евра, додека за камати се предвидени околу 405 милиони евра. Во буџетот, според него, се обезбедени средства и за повисоки плати, пензии, нови вработувања, како и за образованието, здравството и изградбата на детски градинки.
Од опозициската СДСМ, пак, сметаат дека владините економски проекции не се реални и дека не го отсликуваат животниот стандард на граѓаните. Од партијата тврдат дека Македонија останува меѓу најслабо рангираните европски економии според БДП по жител, повикувајќи се на проекциите на Меѓународниот монетарен фонд.
Опозицијата оценува дека дополнителното задолжување на државата во изминатиот период не донело подобрување на животниот стандард, а ја критикува и економската политика на Владата, вклучително и најавените поскапувања на енергијата, како и отсуството на зголемување на минималната плата.
Во Комисијата за финансирање и буџет во наредните денови ќе продолжи разгледувањето на поднесените амандмани, по што Предлог-буџетот за 2027 година ќе продолжи во понатамошната собраниска процедура.