Два авиона се судрија во саботата вечерта на Меѓународниот аеродром во Мајами, само еден ден откако општата забрана за летање во САД предизвика бројни откажувања и нарушувања во сообраќајот, пишува CNN.
Федералната управа за авијација (FAA) соопшти дека врвот на крилото на авион „Боинг 737“ на компанијата „Копа ерлајнс“ (Copa Airlines) удрил во носот на товарен авион „Боинг 767“ на „УПС“ (UPS), додека леталата се движеле по пистата. Инцидентот се случил околу 21:15 часот, а директорот за комуникации на аеродромот, Грег Чин, за CNN потврди дека две лица се полесно повредени.
Earlier this evening in Miami, a Copa Airlines 737 and a UPS 767 collided at low speed at the intersection of two taxiways. The Copa 737’s left wing impacted the nose of the UPS jet. No serious injuries have been reported.
https://t.co/AB8C3fwGxu https://t.co/gjY3FIujXx— Flightradar24 (@flightradar24) November 15, 2026
„По слетувањето, се движевме по пистата со нормална брзина, кога одеднаш слушнав како бучавата околу мене станува сè погласна. Се слушна колективен крик, а потоа друг авион удри во нашиот“, изјави за CNN Цезар Фереира, патник во авионот на „Копа“.
„Во кабината почувствувавме како авионот наеднаш силно се затресе. Некои патници првично почнаа да паничат, но екипажот реагираше брзо и побара од сите да останат на своите седишта“, додаде Фереира.
FAA го истражува судирот. Според оваа агенција, контролорите на летање му дале насока на екипажот на „УПС“ да му даде предност на авионот на „Копа“. Од „УПС“ изјавија дека се „целосно посветени на соработката со надлежните органи за да се утврди што точно се случило“ и потврдија дека нивниот екипаж е безбеден.
„Copa Airlines“ во соопштение за јавноста наведе дека „жали за непријатностите што овој инцидент може да им ги предизвика на патниците“. Тие нагласија дека „безбедноста на нашите патници и екипаж е наш највисок приоритет и ќе соработуваме со надлежните органи за време на истрагата“.
Во објавените снимки од комуникацијата, може да се слушне како пилотот на „Copa Airlines“ ѝ вели на контролата на летање: „Некој нè удри“. Контролорот потоа ги праша членовите на екипажот на „UPS“ дали дошло до контакт.
„Да, отидовме предалеку, па тој нè закачи со своето крило“, одговори пилотот на „UPS“. Пилотот на „Copa Airlines“ подоцна пријави: „Изгледа дека ни недостасува врвот на левото крило“.
Фереира изјави дека по десет минути капетанот објавил оти нема непосредна опасност и дека возилото за влечење ќе го помести авионот. Сите 166 патници и шестмина членови на екипажот подоцна се симнаа од авионот, а леталото беше одвлечено назад до терминалот, потврдија од авиокомпанијата.
На фотографија од авионот на „UPS“ се гледа смачкан нос со голема дупка во оплатата. Летот на „Copa Airlines“ пристигнал во Мајами од Панама Сити непосредно пред судирот, додека товарниот авион на „UPS“ се подготвувал за полетување кон Богота.
Двете повредени лица се здобиле со полесни повреди и им била укажана помош на самото место од страна на противпожарните и спасувачките екипи, изјави Чин. Инцидентот се случи во момент кога аеродромите низ земјата се обидуваа да го нормализираат сообраќајот, откако во петокот Федералната управа за авијација (FAA) привремено ги приземји сите авиони, поради што многу патници, чекајќи нови летови, мораа да спијат на подовите во терминалите.