Испораките на ракети „Патриот“ што сојузнички земји сакаат да ѝ ги испратат на Украина се задржани поради недостиг на американско одобрение, според извештај на „Вашингтон пост“ пренесен во медиумите.
Според извештајот, Пит Хегсет формално не ги одбил договорите за испорака од трети земји, но не ги презел административните чекори потребни за нивно одобрување.
Неименуван висок украински функционер изјавил за весникот дека Украина располага со „само неколку“ ракети „Патриот“ во своите резерви. Тој предупредил дека недостигот ја отежнува одбраната од руските балистички напади.
Украинскиот претседател Володимир Зеленски ја критикувал блокадата на испораките, нагласувајќи дека противвоздушната одбрана е неопходна за заштита на човечките животи. Тој го поврзал прашањето и со олеснувањето на санкциите кон Русија, оценувајќи дека таквиот пристап на партнерите ја игнорира реалноста на војната.
Зеленски предупредил и на проблеми со навременото добивање разузнавачки информации. Според неговите тврдења, за балистички напад врз Киев во понеделникот украинската страна добила предупредување само една минута пред ударот.
Во телефонски разговор со американскиот државен секретар Марко Рубио, Зеленски посочил три приоритети: обезбедување ракети за пресретнување балистички цели, навремено предупредување за руските напади и обновување на работата на системите Starlink и Starshield.
Паралелно, според „Аксиос“, американскиот пратеник Стив Виткоф треба да учествува на разговори во Осло со украински и европски претставници за усогласување мировен предлог.
Дипломатските активности се одвиваат во услови на засилени критики од Доналд Трамп кон Зеленски. Американскиот претседател го обвинува украинскиот лидер дека го одложува завршувањето на војната, додека Киев бара поголема поддршка за заштита од воздушните напади.