Украинскиот претседател Володимир Зеленски изјави дека Соединетите Американски Држави не смеат да заборават колку се посилни од Русија во преговорите, оценувајќи дека Владимир Путин почнал да мисли оти тој е тој што одлучува што ќе се понуди во преговорите.
Зеленски рече дека верува оти САД навистина сакаат да ја завршат руската војна против Украина.
„Мислам дека САД навистина сакаат да ја запрат руската војна. Им верувам. Но, разбирам дека е тешко да се запре некој што е голем и не сака да запре. Затоа се обидувате да најдете некакви компромиси со Русија. Но, мислам дека го губиме времето ако сакаме да ја играме играта на руски компромиси“, рече Зеленски во интервју за Ројтерс.
Зеленски изјави дека американскиот претседател Доналд Трамп сега сака да постигне некаква победа пред изборите за Конгресот на средината на мандатот.
Според него, Путин ќе направи сè за да ги охрабри Иранците и да ги оневозможи преговорите.
„Претседателот Трамп сака да постигне некаква победа пред изборите за Конгресот. Но, Путин ќе направи сè за да ги поттикне Иранците и да ја направи целата оваа ситуација таква што не дозволува преговори. Истото важи и за руската војна против Украина. Ако Путин види дека на претседателот Трамп му е потребна победа, тој ќе одлучи што да даде, а што не. И тоа е проблемот – Путин почна да мисли дека тој е тој што може да одлучува. Но, Америка е сто пати посилна од Русија. Апсолутно. Тие само треба да се сетат на тоа“, рече Зеленски.