Цените на нафтата денес паднаа за повеќе од три отсто, при што цената на суровата нафта од типот „Брент“ (од Северното Море) се спушти под 102 долари за барел, приближувајќи се до најниското ниво во последниот месец.
Истовремено, цената на американската сурова нафта (WTI) падна под 96 долари, достигнувајќи го најниското ниво во последните три недели, објави „Trading Economics“.
Со ова продолжи падот на цените од претходната сесија, кога „Брент“ поевтини за 7,6 отсто, а WTI за 7,4 отсто, откако се намалија загриженостите за можни прекини во снабдувањето со нафта од Блискиот Исток. Цените паднаа откако американскиот претседател Доналд Трамп објави дека Вашингтон ќе ја прекине финансиската помош за Израел до крајот на годината, по постигнатиот договор со премиерот Бенјамин Нетанјаху за укинување на програмата за помош во вредност од четири милијарди долари (околу 3,45 милијарди евра).
Трамп изјави дека на Израел веќе не му е потребна таа финансиска поддршка, но нагласи дека САД остануваат подготвени да обезбедат други форми на помош.
Дополнително смирување на пазарот уследи по изјавата на американскиот секретар за енергетика, Крис Рајт, дека нападите извршени преку ноќ врз иранскиот остров Кешм немале влијание врз протокот на нафта. Тој исто така најави дека дополнителни количества нафтени деривати ќе бидат обезбедени од Персискиот Залив и од Индија.
Во исто време, од Техеран пристигнаа сигнали за поголема подготвеност за дипломатско решавање на конфликтот. Иранскиот претседател Масуд Пезешкијан изјави дека Врховниот лидер Моџтаба Хамнеи дал одобрение за разговори за прашања кои претходно се сметале за неприфатливи за преговарање.
Намалувањето на геополитичките тензии и индикациите за можно обновување на дипломатските контакти доведоа до намалување на премијата за ризик, која во претходните недели ги зголемуваше цените на нафтата поради стравувањата од прекин во снабдувањето од Блискиот Исток.