Пратеникот на СДСМ, Оливер Спасовски, во гостување во емисијата „Click Plus“ на ТВ21, изјави дека неговата партија има јасна програмска определба за намалување на бројот на пратеници во Собранието, оценувајќи дека 90 пратеници се сосема доволни за држава со големината и бројот на жители каква што е Северна Македонија.
„Ние имавме јасна програмска определба и сметам дека 90 пратеници се сосем доволни за држава како нашата, имајќи ја предвид големината, бројот на жители и другите релевантни параметри“, истакна Спасовски.
Тој додаде дека секогаш постои можност да се отвори аргументирана и суштинска дебата, доколку се процени дека е потребен поголем број пратеници, но нагласи дека таквите ставови мора да бидат поткрепени со јасни и издржани аргументи.
„Треба да бидеме одговорни и максимално да го оптимизираме бројот на пратеници на едно задоволително и функционално ниво. Доколку некој смета дека е потребен поголем број, тогаш мора јасно да образложи зошто тоа е така“, порача Спасовски.