Земјотрес со магнитуда од 7,5 степени го погоди североисточниот брег на Јапонија, а властите ги повикаа жителите да се држат подалеку од крајбрежните области каде што се очекуваат цунами бранови до 3 метри, пренесува Ројтерс.
Се предвидуваше дека најголемите бранови ќе ги погодат префектурите Ивате и Аомори на врвот на главниот остров Хоншу во Јапонија и северниот остров Хокаидо, соопштија властите. Во еден час по земјотресот, кој се случи во 16:52 часот (07:52 GMT), беа детектирани цунами бранови високи до 80 см, додека предупредувањата за бранови високи до 3 метри останаа.
Неколку пристанишни градови, вклучувајќи ги Отсучи и Камаиши – двата тешко погодени од силен земјотрес и цунами во 2011 година – издадоа наредби за евакуација на илјадници жители, според јавниот радиодифузен сервис NHK. Премиерката Санае Такаичи изјави дека владата формирала итна работна група и ги повика граѓаните во погодените области да се евакуираат на безбедно место.
„Сега се испитуваат можни штети и жртви“, изјави Такаичи пред новинарите во нејзините канцеларии во Токио.
Службеник од Јапонската метеоролошка агенција (JMA) изјави на посебна телевизиска прес-конференција. Бродовите испловија од пристаништето Хачинохе на Хокаидо во исчекување на брановите, покажаа снимките емитувани на NHK, додека на екранот се појави предупредување „Цунами! Евакуирајте се!“. Цунами од 3 метри може да предизвика штета на ниските подрачја, поплавувајќи згради, а секој што е изложен ќе биде зафатен од неговите струи, според JMA.
Сообраќајот на брзи возови во Аомори беше прекинат поради потресите, објави новинската агенција Кјодо. Земјотресот беше со јачина од „горни 5“ на јапонската скала за сеизмички интензитет – доволно силен за да им го отежни движењето на луѓето и да предизвика уривање на ѕидовите од неармирани бетонски блокови. Земјотресот имал епицентар во Тихиот Океан и бил длабок 10 км, соопшти JMA.