Кривичниот суд го прифати предлогот на Обвинителството и на приведената инспекторка од Агенцијата за храна и ветеринарство и определи 30-дневен притвор. Ова е епилогот од денешното нејзино појавување пред судија на претходна постапка, по барање на Обвинителството откако таа минатата недела беше фатена за поткуп од 250 евра.
„Фокус“ веќе објави дека Основното јавно обвинителство Скопје донесе Наредба за спроведување истражна постапка против едно лице за кое постоеше основано сомнение дека сторило кривично дело – Примање поткуп според член 357 став 1 од Кривичниот законик.
Осомничената 42-годишна вработена во Агенцијата за храна и ветеринарство, како службено лице – инспектор за храна, во периодот од 17 до 25 септември, побарала и примила поткуп во износ од 250 евра од управител на правно лице за да изготви записник со кој ќе констатира дека извршила инспекциски надзор и дека нема неправилности во работата на објектот, односно дека тој ги почитува сите потребни процедури за работа.
Поради ризикот од бегство, опасноста осомничената да влијае врз оштетениот и неговиот исказ, како и можноста од позиција на службено лице- инспектор да го повтори дејствието кое не смеела да го изврши, јавниот обвинител до судијата на претходна постапка достави предлог за определување мерка притвор. Судот во целост го прифатил барањето на обвинителот.