Мнозинството пратеници во Собранието денеска не го поддржаа предлогот на опозицијата за законски дополнувања со кои би се вовела електронска нараквица за следење на сторителите на семејно насилство и предупредување на жртвите. Ова е вторпат овој предлог-закон да не добие поддршка во законодавниот дом.
Иако предлогот предизвика дебата, самото гласање помина со слаб одзив. За законот гласаа само 27 пратеници од вкупно 94 регистрирани во салата, а при гласањето немаше пратеници кои се изјаснија „против“ или беа воздржани.
Предлогот за дополнување на Законот за спречување и заштита од насилство врз жените и семејството го образложи претседателката на ЛДП, Моника Зајкова, потсетувајќи дека идентичен текст бил предложен и одбиен пред точно една година. Таа нагласи дека целта на предлогот е исклучиво превенција од насилство кое често завршува со ненадоместливи штетни последици, а дополнувањата на законот немаат финансиски импликации врз буџетот. Според неа, можат да се искористат електронските нараквици кои веќе се предвидени за системот за пробација и се наоѓаат во депото на Министерството за правда. По гласањето, Зајкова изјави дека со одбивањето на предложените дополнувања, пратениците од мнозинството повторно избрале да бидат соучесници во насилството наместо во превенцијата.
Остро реагираше и пратеникот од СДСМ, Фатмир Битиќи, кој беше еден од потписниците на оваа иницијатива. Тој го оцени неприфаќањето на предлогот како длабока политичка, човечка и вредносна грешка. Битиќи смета дека државата отфрлила вредносна и цивилизациска обврска да застане на страната на жртвата, избирајќи да биде нем набљудувач додека опасноста се приближува. Пратеникот ја прозва власта за противречност, посочувајќи дека иако се претставува како десничарска власт на ред и поредок, не ја препознава заштитата на ранливите како прва должност на државата.