Премиерот на Израел, Бенјамин Нетанјаху, денеска изјави дека патот до мир со Либан е долг, „но е започнат“, бранејќи ја својата одлука да прифати 10-дневен прекин на огнот со Хезболах, претставувајќи го како стратешка можност и за дипломатија и за продолжен воен притисок.
Сепак, впечатокот дека ова е примирје наметнато врз Израел го засили американскиот претседател Доналд Трамп, кој изјави дека Израел „повеќе нема да го бомбардира Либан“.
-Забрането им е тоа од САД. Доста е – додаде тој.
И покрај тоа, Нетанјаху се обиде да му даде позитивен тон на примирјето.
-Едната рака држи оружје; другата е подадена за мир – рече Нетанјаху во видео-изјава, објаснувајќи дека, по барање на Трамп, Израел „дава шанса за напредок кон комбинирано дипломатско и воено решение со либанската влада“.
Сепак, тој јасно стави до знаење дека кампањата против Хезболах е далеку од завршена.
Според него, од 7 октомври 2023 година Израел ја елиминирал заканата од инфилтрации и противтенковски напади и уништил околу 90 отсто од ракетниот арсенал на групата.
-Искрено ќе кажам, сè уште не сме ја завршиле работата – додаде тој, предупредувајќи дека се планираат дополнителни акции против преостанатите ракети и дронови.
Демонтирањето на Хезболах, рече, ќе бара „постојан напор, трпение и внимателно движење на дипломатското поле“.