Германскиот канцелар Фридрих Мерц денес изјави дека шансите за постигнување вистински мир во Украина сега се поблиски од кога било досега од почетокот на руската инвазија во 2022 година.
Тој на осмиот германско-украински бизнис форум што се одржа денес во Берлин изјави дека Соединетите Американски Држави ѝ понудиле на Украина „значајни“ безбедносни гаранции.
„Она што САД го ставија на маса во Берлин во однос на правните и материјалните гаранции е навистина значајно“, рече Мерц на заедничката прес-конференција со украинскиот претседател Володимир Зеленски, по неколкучасовни разговори со американските преговарачи.
Мерц додаде дека клучното прашање е територијалното решавање на конфликтот.
„Само украинскиот народ, американскиот претседател и украинскиот претседател, кој е тука и ја брани својата територија, можат да смислат одговор… Само Украина може да одлучи за територијални отстапки.“
Нема „ако“ или „но“, нагласи германскиот премиер, според Ројтерс.
Според него, партнерите работат на различни формати што ќе ги направат инвестициите во Украина привлечни и покрај тешките услови.
Како што изјави, во 2026 година, Германија, заедно со европските партнери, сака да го лансира европскиот водечки фонд за обнова на Украина со цел да обезбеди големи инвестиции со учество на приватни инвеститори.