Две лица загинаа, а две се повредени кога мал авион се урна и се запали во близина на аеродромот Бемово во Варшава, соопштија денес полските служби за итни случаи.
Противпожарната служба ја потврди смртта на две лица кои биле во леталото, а две лица кои биле во близина на местото на несреќата, исто така, побарале медицинска помош.
Пожарникарите потврдија дека луѓето во авионот немале шанси за преживување.
„Авионот бил целосно изгорен. Внатре имало две лица – тие не се живи“, изјави бригадниот генерал Лукаш Дармофалски од Покраинската команда на Државната противпожарна служба.
По гаснењето на пожарот, пожарникарите го обезбедија местото на несреќата.
Трагедијата не заврши само со смртта на луѓето во авионот. Две лица кои биле во близина контактирале со службите за итни случаи.
„Две лица контактирале со екипата за итни случаи и биле повредени“, рече Дармофалски.
Засега не е познато какви се повредите и колку се сериозни.
Според видеата објавени на социјалните мрежи, авионот паднал на теренот на Automobilklub Polski, каде што се наоѓа центарот за обука на возачи. Според извештаите, авионот паднал пред да стигне до аеродромот.
Сведоци наведуваат дека моторот на авионот работел нерамномерно и дека пилотот се обидувал да ги избегне околните згради до последен момент.
По ударот на земјата, леталото веднаш се запалило.