Претседателот на Европскиот совет, Антонио Кошта, по разговорот со хрватскиот премиер Андреј Пленковиќ, истакна дека Хрватска има посебна улога во процесот на проширување бидејќи е најновата членка на ЕУ која го поминала целиот процес на пристапување, што се очекува и од нејзините соседи од Западен Балкан.
Европската унија (ЕУ) мора да го продолжи процесот на проширување кон Западен Балкан, Молдавија и Украина, бидејќи нивното вклучување во Унијата е „најмоќната инвестиција“ во безбедноста и просперитетот на европскиот континент, изјави денеска во Загреб претседателот на Европскиот совет, Антонио Кошта.
Кошта, по разговорот со хрватскиот премиер Андреј Пленковиќ, истакна дека Хрватска има посебна улога во процесот на проширување бидејќи е најновата членка на ЕУ која го поминала целиот процес на пристапување, што се очекува и од нејзините соседи од Западен Балкан.
„Вклучувањето на Западен Балкан, Молдавија и Украина во Европската унија претставува најсилна инвестиција што ни е на располагање за безбедноста и просперитетот на нашиот континент. Мораме да го продолжиме тој процес, заснован на добро воспоставениот систем на заслуги, со целосно почитување на европските вредности и надоврзувајќи се на реалниот напредок што е постигнат досега“, рече тој.
Во Загреб, Кошта зборуваше и за војната во Украина, наведувајќи дека Русија мора да ја прекине војната и не смее дополнително да ја ескалира или проширува, соопшти Европскиот совет.
Тој изрази солидарност со Германија по неодамнешниот напад во Лајпциг и го оцени таквото однесување на Русија како неприфатливо.
На аеродромот Лајпциг/Хале, во источниот дел на Германија, во близина на украински товарни авиони, беше откриен дрон со експлозивна направа, а Германија соопшти дека зад тоа стои Русија.
„Русија мора да разбере дека нејзините закани и напади, без разлика дали се хибридни или од друг вид, нема да ја наведат Европската унија да го промени својот став кон оваа војна. Нашиот став се заснова на темелните вредности на меѓународното право, почитувањето на суверенитетот, територијалниот интегритет и мирот. Затоа ќе продолжиме да ја поддржуваме Украина, без оглед на тоа како Русија се обидува да ни се заканува или да нè заплашува“, рече Кошта.
Претседателот на Европскиот совет истакна дека постигнувањето договор за буџетот на ЕУ за периодот 2028-2034 година до крајот на оваа година е еден од клучните приоритети, со цел средствата да бидат достапни за граѓаните и компаниите од почетокот на 2028 година.
Тој наведе дека новиот буџет треба да одговори на променетата геополитичка ситуација и да овозможи поголеми инвестиции во одбраната и безбедноста, конкурентноста, иновациите и стратешката отпорност, но и да продолжи да ја поддржува кохезијата и земјоделската политика.
Тој исто така истакна дека новите извори на приходи на ниво на ЕУ ќе бидат важни за постигнување договор, бидејќи националните буџети не можат да поднесат неограничени придонеси.
Претседателот на Европскиот совет, Антонио Кошта, ја продолжува својата турнеја низ земјите-членки на Европската унија со посети на Луксембург, Хрватска и Унгарија, со цел подготовка на буџетот на ЕУ.