Шест пациенти се на интензивно лекување поради западнонилска треска, додека за уште три лица се чека потврда дали се заразени со вирусот. На Клиниката за инфективни болести во моментов се хоспитализирани 21 пациент, од кои кај 18 веќе е потврдено присуството на вирусот, информираше денеска на прес-конференција министерот за здравство Сашо Клековски.
Според податоците што ги соопшти министерот, досега се евидентирани вкупно 53 пациенти кои ја прележале болеста, во моментов се лекуваат или се водат како сомнителни случаи.
– Во моментот имаме 53 пациенти што прележале, имаат или се сомнителни на западнонилска треска. Од нив, 50 се потврдени, а три се сомнителни случаи хоспитализирани на Клиниката за инфективни болести. Од овие, 52 се со нервноинвазивна форма, а еден е без нервноинвазивна форма и е излекуван и пуштен од болница – изјави Клековски.
Најголемиот дел од пациентите биле или сè уште се лекуваат на Клиниката за инфективни болести, додека еден пациент бил третиран во приватна здравствена установа.
Од пациентите кои биле примени на Инфективната клиника, 25 досега се излекувани и пуштени на домашно лекување.
Во моментов на Клиниката остануваат 21 пациент.
– Од нив, 18 се потврдени случаи, а за тројца се чекаат резултатите од тестирањата. Шест пациенти се на интензивно лекување – рече министерот.
Според овие податоци, најголемиот дел од евидентираните пациенти развиле нервноинвазивна форма на болеста, која претставува потешка форма на инфекцијата и бара болничко следење и лекување.
Надлежните здравствени институции продолжуваат да ја следат состојбата, додека за трите хоспитализирани лица кои во моментов се водат како сомнителни случаи се очекуваат резултатите од тестирањата.