Рускиот претседател Владимир Путин наводно ќе му претстави на американскиот претседател Доналд Трамп историски материјали на самитот во Алјаска, со кои сака да ја прикаже Украина како вештачка држава, тврди украинскиот центар за борба против дезинформации.
Според Центарот, објавено од „Киев индепендент“, пакетот вклучува географски карти кои се обидуваат да ги оправдаат руските територијални претензии и континуираната воена агресија врз Украина.
Тврдењето доаѓа пред првата средба лице в лице меѓу Путин и Трамп од почетокот на вториот претседателски мандат на Трамп. Белата куќа ги опишува разговорите како дел од напорите на САД за ставање крај на војната во Украина.
Центарот за борба против дезинформациите предупредува дека Кремљ редовно користи искривени историски наративи за да ги оправда своите постапки, прикажувајќи ја Украина како историски зависна од Русија и доведувајќи го во прашање легитимитетот на нејзиниот суверенитет.
Путин постојано јавно користел вакви псевдоисториски аргументи, според „Киев Индепендент“. Во интервју од 2024 година со американскиот десничарски коментатор Такер Карлсон, тој одржа 30-минутен монолог за историјата на Русија и Украина.
„Историските факти, а особено псевдоисториските фантазии, не можат да бидат основа за територијални претензии или да оправдаат вооружена агресија против други земји“, соопшти Центарот за сузбивање на дезинформациите.
Трамп ги нарече разговорите во Алјаска „пробен период“ и за време на телефонскиот разговор на 13 август со украинскиот претседател Володимир Зеленски и европските лидери, вети дека прекинот на огнот ќе биде еден од приоритетите во разговорите со Путин.
Американскиот претседател, исто така, посочи дека секој мировен договор ќе бара од двете страни да „разменуваат“ територии, што предизвика загриженост во Киев и европските престолнини. Не е прецизирано што се подразбира под „размена на територии“.
Според извор од Кабинетот на украинскиот претседател, предлогот на Москва ќе бара од Киев да се повлече од делови од регионите Донецк и Луганск под украинска контрола во замена за повлекување на Русија од делови од регионите Суми и Харков.
Путин, исто така, бара Украина да се повлече од деловите од регионите Херсон и Запорожје, контролирани од Украина, и да се согласи на забрана за влез во НАТО како предуслов за мир.