Двајца работници на аеродромот во Франкфурт починаа од маларија, а уште четворица биле заразени во ретка појава на таканаречена „аеродромска маларија“. Германските здравствени власти претпоставуваат дека инфекцијата ја пренела заразена комарка која најверојатно пристигнала со авион од подрачје каде што маларијата е распространета.
Вкупно шест лица кои работеле на или во близина на аеродромот се разболеле од маларија тропика, најопасната форма на болеста. Првиот смртен случај се случил уште во почетокот на јули, но причината за смртта била утврдена дури подоцна. Вториот работник починал во август. Останатите четворица заразени биле лекувани во болница и, според здравствените власти, се надвор од животна опасност.
Институтот „Роберт Кох“, германската институција задолжена за контрола и превенција на заразни болести, смета дека најверојатен извор е заразена комарка од видот „Анoфелес степенси“ која можела да влезе во Германија со авион. Ваквите случаи се познати како аеродромска маларија и се исклучително ретки.
На аеродромот веќе се поставени стапици за комарци, а уловените примероци се испитуваат во специјализирана лабораторија за тропска медицина во Антверпен, Белгија. Генетските анализи треба да помогнат да се утврди потеклото на комарците и дали постои врска меѓу различните случаи.
Франкфуртските здравствени власти во меѓувреме ги информирале работниците на аеродромот за симптомите на болеста и ги предупредиле лекарите да обрнат внимание на пациенти со необјаснета треска кои работат на или околу аеродромот. Причината е што маларијата е ретка во Германија, па без информација за изложеност на ризик може да дојде до доцна дијагноза.