Двајца американски војници и еден цивилен преведувач денеска беа убиени во напад на Исламска држава во близина на Палмира, Сирија соопшти Пентагон.
Американски персонал беше во областа поддржувајќи ги антитерористичките операции.
Портпаролот на Пентагон, Шон Парнел, изјави дека уште три лица се ранети во нападот. Американскиот министер за одбрана, Пит Хегсет, изјави дека напаѓачот бил елиминиран од партнерските сили на терен, според Ројтерс.
Според достапните информации, во вооружен напад врз заедничка делегација во близина на Палмира, ранети се четворица војници на коалицијата предводена од САД, како и неколку членови на сириските безбедносни сили. Осомничениот напаѓач, за кој се вели дека е поранешен член на Исламска држава, наводно вработен во сириските внатрешни безбедносни сили, исто така е убиен.
Американски функционер потврди дека имало заседа врз припадници на американските сили и дека имало неколку повредени. По нападот, коалициски авиони прелетале над Палмира, а од американската база Ал-Танф било испратено засилување на местото на инцидентот.
Командантот на Сириските демократски сили (SDF), Мазлум Абди, изјави дека жали за ранувањето на припадниците на силите вклучени во операцијата.
Во исто време, ирачки медиум близок до проиранските паравоени структури објави дека коалициските авиони прелетале над областа Палмира веднаш по нападот.
Исламска држава, иако територијално поразена, сè уште периодично извршува напади во централните и источните делови на Сирија, таргетирајќи ги домашните и меѓународните сили вклучени во контратерористички операции.