Речиси 67 проценти од Украинците очекуваат претседателот Володимир Зеленски да биде заменет по завршувањето на војната, според анкетата на Меѓународниот институт за социологија од Киев (KIIS) објавена денес.
Овие податоци претставуваат значително зголемување во споредба со 23 проценти во 2023 година, а доаѓаат во време кога Зеленски влегува во седмата година од неговиот претседателски мандат, пишува Киев Индепендент.
Анкетата ја одразува пошироката јавна побарувачка за промени и во другите гранки на власта, иако повеќекратни анкети постојано покажуваат дека повеќето Украинци се противат на одржувањето избори додека не завршат непријателствата.
Испитаниците беа прашани дали веруваат дека повоена Украина треба да спроведе реконструкција и да ја замени централната влада – вклучувајќи го претседателот, владата и парламентот – со цел да ја обнови земјата. Бројот на Украинци кои очекуваат барем одредено ниво на промени во органите на централната власт се зголеми на 88 проценти, во споредба со 73 проценти во 2023 година.
Студијата покажува дека дури и меѓу оние кои целосно му веруваат на Зеленски, 33 проценти од нив очекуваат негово отстранување по војната. Тој процент се зголемува на 68 проценти меѓу оние кои генерално му веруваат и на 97 проценти меѓу оние кои воопшто не му веруваат.
Анкетата, исто така, покажа дека уделот на Украинците кои сметаат дека мешањето на претседателот во работата на парламентот и владата е оправдано, паднал на 52 проценти во споредба со ситуацијата во 2022 година. Поддршката за повоената реконструкција на парламентот се зголеми на 83 проценти од претходните 69 проценти, додека 74 проценти од испитаниците поддржуваат промени во владата, за разлика од 47 проценти забележани во 2023 година.