Бугарите денес гласаат на претседателски избори. Во трката има 27 кандидати, а вршителката на должноста претседателка – Илијана Јотова (61) води на анкетите.
Нејзин најблизок ривал е поранешниот привремен премиер Андреј Ѓуров (50).
Претседателската функција е претежно церемонијална, но изборите добија на значење по серијата напади со беспилотни летала врз трговски бродови долж бугарскиот брег на Црното Море, во кои загинаа околу дваесет морнари од различни земји.
Овие напади предизвикаа низа осуди од меѓународната заедница, како и загриженост за ширењето на руско-украинската војна. Затоа, бугарската влада побара помош од сојузниците на НАТО за зајакнување на поморската безбедност.
Премиерот Румен Радев изјави дека „исходот од овие напади е во корист на Русија“, но не ја обвини директно за нивното извршување. И двајцата водечки претседателски кандидати ги осудија нападите.
Андреј Ѓуров, кој годинава беше вршител на должноста премиер, ужива поддршка од прозападните, реформистички партии. Тој е отворен поддржувач на Украина, а како премиер потпиша договор за безбедносна соработка со Киев.
„Сакам Бугарија да го има својот глас во Европа. Сакам да биде сигурен сојузник во НАТО кој ги штити своите интереси со силна дипломатија и јасен став“, рече тој на предизборен митинг во четврток.
.
Илијана Јотова беше потпретседател на земјата и е претседател од јануари, кога Румен Радев поднесе оставка за да се кандидира на парламентарните избори. Радев победи на тие избори и политичките аналитичари го сметаат за близок до Кремљ. Поранешниот претседател, сега премиер, го поддржува својот поранешен заменик; двајцата се залагаат за дипломатски крај на војната во Украина.
„Моите противници тврдат дека мора да има војна на исцрпување. Вистината е дека ние сме најисцрпени“, рече Јотова на предизборен митинг во четврток.
Доколку победи, таа ќе стане првата жена претседател на Бугарија. Анкетите ѝ даваат поддршка од 41 процент, додека Ѓуров има 28 проценти.
Доколку никој не освои супер мнозинство гласови, вториот круг ќе се одржи на 1 ноември. Гласачките места се отвораат во 7 часот наутро и ќе се затворат во 20 часот.
Избирачките списоци вклучуваат 6 милиони 590 илјади возрасни граѓани, без оние под старателство и оние кои издржуваат затворска казна.