Кон крајот на следниот месец ќе биде познат наследникот на Ислам Абази, досегашниот шеф на најмоќното обвинителство во државата, Обвинителството за гонење на организиран криминал и корупција. Сите петмина кандидати за „Фокус“ споделуваат зошто сметаат дека се вистинскиот избор за прв човек на ова обвинителство, односно зошто колегите да гласаат за нив. Исто така, одговорат и на прашањето што му е потребно на ова обвинителство за да може бескомпромисно да се спротивстави на сериозниот криминал, како и тоа кои ќе бидат нивните заложби доколку бидат избрани?
Во оваа трка се обвинителите Фатон Азизи, Трајче Пеливанов, Лидија Раичевиќ, Искра Хаџи Василева и Јован Цветановски. „Фокус“, во следните денови, ќе ги објавува нивните изјави по редоследот кој е утврден со кандидатската листа која ја објави Советот на јавните обвинители.
Обвинителката од скопското обвинителство Лидија Раичевиќ е со долгогодишно искуство, позната во пошироката јавност по водење на неколку високопрофилни и комплексни судски предмети, како „Ровер“, „Еразмус“, „Спортските ваучери на АМС“… Таа во неколку наврати се кандидираше за водечките позиции во обвинителството, вклучувајќи ја и функцијата Државен јавен обвинител. Обвинителката се занимава и со научно-истражувачка дејност.
Раичевиќ вели дека нејзиното искуство ја прави идеален кандидат за оваа значајна позиција.
-Моето искуство стекнато во работата во ОЈО ГОКК, бројот на завршени предмети, севкупното искуство како јавен обвинител и принципите кои ги негувам, се мојата препорака за гласање на колегите, ни одговори обвинителката.
Таа ветува сериозна и бестрашна борба со криминалот.
-Тоа обвинителство е дел од обвинителскиот систем и има воспоставено начин на работа кој функционира, но треба да се унапреди со проактивна работа на јавните обвинители, а на обвинителството му е потребен сериозно, искусно и достоинствено лице.
Заложбите ќе се состојат во одважна сериозна и бестршна борба со криминалот. Ќе мора да се поднесуваат обвиненија со докази и правично и законито да се водат постапките за да се подигне угледот на оваа важна институција, истакнува обвинителката Раичевиќ.
Валентина ВУРМО