Викендов во Кавадарци ќе се одржи една од најголемите манифестации во земјава – „Тиквешки гроздобер 2026“.
Фестивалот и оваа година ќе понуди богата тридневна програма со музика, традиција, вино и забава за сите генерации.
Фестивалската програма започнува денеска. Публиката ќе се забавува со македонскиот состав „Зи Бомб“, со трап-сензацијата Де Вито и DJ Галовски.
Утре на сцената ќе се појават популарните македонски бендови „Дупер“ и „Нокаут“, додека главна ѕвезда на вечерта ќе биде легендарниот Жељко Самарџиќ.
Во недела, на големото фестивалско финале ќе настапат младата музичка ѕвезда Џејла Рамовиќ и пејачот Пеџа Јовановиќ.
Покрај концертите, програмата предвидува и бројни дневни активности посветени на лозаро-винарската традиција на Тиквешијата.
На Градскиот плоштад ќе има поставени брендирани штандови и шатори за промоција и дегустација на познатите тиквешки вина, ракија, маџун и традиционални специјалитети.
Во рамки на фестивалот ќе се реализираат и повеќе спортски и забавни настани.
„Тиквешки гроздобер 2026“ има амбиција повторно да привлече илјадници гости од земјава и регионот и уште еднаш да го потврди статусот на Кавадарци како македонска винска престолнина.