Обвинителството во САД денеска треба да започне со презентирање докази за да се обиде да го убеди судот дека постојат доволно основи да му се суди на 23-годишниот Тајлер Робинсон за убиството на американскиот патриот Чарли Кирк, кој одигра значајна улога во мобилизирањето на младите гласачи за претседателската кампања на Доналд Трамп во 2024 година.
За време на прелиминарното сослушување, кое ќе трае една недела, обвинителите ќе се обидат да докажат пред Окружниот суд во градот Прово дека постои основано сомнение дека Робинсон го испукал истрелот што го уби 31-годишниот Кирк на 10 септември 2025 година, објавува Ројтерс.
Кирк беше убиен додека учествуваше во една од универзитетските дебати на Универзитетот Јута Вали во Орем, околу 40 милји јужно од Солт Лејк Сити.
Овие настани собраа голем број студенти и придонесоа за неговото национално признавање.
Доколку судијата Тони Граф утврди дека постои основано сомнение, Робинсон ќе се изјасни за обвинението, а потоа ќе биде закажан датум за судење.
Против него беа покренати седум обвиненија, вклучувајќи обвинение за тешко убиство.
Обвинителството претходно објави дека ќе бара смртна казна за Робинсон, кој се школувал за електричар и се предал на полицијата еден ден по пукањето.
На 18-годишна возраст, во 2012 година, Кирк беше еден од основачите на организацијата Turning Point USA, која со текот на времето стана влијателна конзервативна младинска организација во Републиканската партија.
За време на сослушувањето, се очекува обвинителството да покаже видеа за кои тврди дека го прикажуваат Робинсон на Универзитетот во Јута Вали кратко пред и по пукањето.
Обвинителите планираат да презентираат други докази за кои велат дека го поврзуваат Робинсон со злосторството, вклучувајќи траги од ДНК пронајдени на пушката за која истражителите велат дека била употребена во убиството, снимена изјава од цимерот на Робинсон и рачно напишана белешка на која пишуваше: „Имав можност да го убијам Чарли Кирк и ја зедов“.
Од друга страна, одбраната веројатно ќе истакне дека балистичките тестови не дале убедливи докази дека фрагментот од куршум отстранет од телото на Кирк потекнува од пушката за која обвинителството тврди дека била оружјето за убиство.
Сопругата на Кирк, Ерика Кирк, која го презеде раководството на Turning Point USA по неговата смрт, ќе присуствува на сослушувањето во судницата во Прово заедно со неговите родители, изјави извор запознаен со случајот.
Одбраната се обиде да забрани емитување во живо на телевизија и фотографирање од рочиштето, тврдејќи дека тоа поттикнува сензационалистичко медиумско известување, додека Ерика Кирк побара да се дозволат камери за да се направи постапката транспарентна, според агенцијата, како што објави Танјуг.
Според судските документи, Робинсон се предал на полицијата откако неговите родители го препознале осомничениот на објавените видеа и се соочиле со него за тоа.