Силен земјотрес ja погоди Јапонија – жариштето беше на длабочина од 10 километри

Земјотрес со јачина од 6,0 степени според Рихтеровата скала ја погоди јужната јапонска префектура Окинава, соопшти Јапонската национална метеоролошка управа.

Епицентарот се наоѓаше во близина на оддалечениот остров Јонагуни, а жариштето беше на длабочина од 10 километри.

Немаше извештаи за жртви или штети, а не беше издадено ниту предупредување за цунами.

Јапонија е меѓу земјите со најголем ризик од земјотреси во светот бидејќи се наоѓа во областа на Пацифичкиот огнен прстен, каде што се среќаваат неколку тектонски плочи.