Американските и иранските преговарачи постигнаа напредок во денешните разговори и се приближија кон рамковен договор за завршување на војната, изјавија двајца американски претставници, објавува американскиот портал Аксиос.
Двете сопернички страни, со посредство на Пакистан, Египет и Турција, се обидуваат да ги премостат преостанатите разлики и да постигнат договор пред да истече примирјето на 21 април. Пакистанска делегација предводена од командантот на армијата, фелдмаршал Асим Мунир, денес пристигна во Техеран на разговори со ирански претставници.
Американските претставници и извори запознаени со посредништвото предупредуваат дека договорот не е загарантиран поради големите разлики меѓу двете страни. „Да почекаме и да видиме дали можеме да постигнеме договор. Се надеваме и затоа се обидуваме да ги охрабриме двете страни“, рече еден пакистански претставник.
Преговaрачкиот тим на американскиот претседател Доналд Трамп, денес продолжи со телефонските разговори и размена на предлози со Иранците и медијаторите.
„Тие разговараа по телефон и посредуваа во разговорите со сите земји и се приближуваат кон договор“, рече еден американски функционер.
Друг потврди дека денес е постигнат напредок.
„Сакаме да постигнеме договор. И делови од нивната влада сакаат да постигнат договор. Сега трикот е да се натера целата нивна влада да се согласи со тоа“, рече трет американски функционер.
Нова рунда разговори лице в лице би можела да се одржи во наредните денови, пред да истече примирјето, но датумот сè уште не е одреден, изјавија американски претставници и извори запознаени со процесот.
Ванс, кој минатата недела одржа првични разговори во Пакистан, кои беа прекинати за време на викендот, на настанот „Turning Point USA“ во Џорџија изјави: „Мислам дека луѓето со кои преговараме сакаат да постигнат договор. Се чувствувам многу добро во врска со тоа каде сме.“
Доколку се постигне прелиминарен договор, примирјето ќе мора да се продолжи за да се утврдат деталите за сеопфатен договор, изјавија американски претставници и извор запознаен со преговорите.
„Деталите се сложени – не можат да се решат за два дена“, рече еден претставник.
„САД сè уште формално не се согласиле да го продолжат примирјето. Контактите меѓу САД и Иран продолжуваат да постигнуваат договор“, додаде друг.
Американските претставници велат дека поморската блокада на Трамп, која го прекина извозот на нафта од Иран, како и продлабочувањето на економската криза, го зголемуваат притисокот врз Техеран да се согласи со договорот.
„Иран нема пари. Тие се банкротирани. Ние го знаеме тоа. И тие знаат дека ние го знаеме тоа“, рече еден американски функционер.