Иранскиот претседател Масуд Пезешкијан изјави дека израелските напади врз Либан се „јасно кршење“ на договорот за прекин на огнот меѓу САД и Иран и предупреди дека нивното продолжување ќе ги „направи преговорите бесмислени“.
Во објава на X, тој рече: „Обновениот напад на Израел врз Либан е јасно кршење на првичниот договор за прекин на огнот. Тоа е опасен знак на измама и недостаток на посветеност на можни договори. Продолжувањето на овие акции ќе ги направи преговорите бесмислени. Нашите прсти остануваат на чкрапалото. Иран никогаш нема да ги напушти своите либански браќа и сестри“.
САД и Израел тврдат дека двонеделното примирје не се однесува на Либан, каде што израелската армија започна еден од најжестоките бранови воздушни напади завчера. Иран и Пакистан, кои посредуваа во прекинот на огнот, тврдат дека Либан е вклучен во договорот.
Израел вчера изврши голем бран воздушни напади врз Бејрут и други делови од Либан.
Израелската армија го погоди центарот на главниот град и јужните предградија, вклучувајќи ги станбените и деловните области, а многу од нападите беа без претходно предупредување.
Најмалку 254 лица беа убиени во нападите, а околу 900 беа ранети, според прелиминарните податоци од либанското Министерство за здравство.
Либанскиот премиер Наваф Салам прогласи ден на национална жалост. Сите јавни администрации, државни институции и општини беа затворени, а знамињата беа спуштени на половина копје.