Престрелка на фестивал во Швајцарија

Повеќе лица се повредени во престрелка што рано утрово се случила за време на техно-фестивал во швајцарскиот град Арау.

Полицијата сè уште утврдува што точно се случило, а засега не е познато дали има загинати, ниту кој пукал.

Пукотниците биле испукани околу 3 часот наутро на просторот на хиподромот Шахен, каде што се одржувал фестивалот „Арау Рејв“.

Полицијата соопштила дека во инцидентот има „повеќе жртви“, но засега не е прецизирано дали под овој термин се подразбираат и загинати лица, пренесува швајцарскиот весник „Блик“.

„Сè уште не е јасно што точно се случило“, изјавила портпаролката на кантоналната полиција на Аргау, Ванеса Румполд.

Таа потврдила дека биле испукани повеќе куршуми кон поголема група луѓе.