Украинскиот претседател Володимир Зеленски изјави дека мировните преговарачи од Украина, Русија и САД се договориле да се сретнат на техничко ниво во првата половина на ноември во Абу Даби, додавајќи дека се надева дека ќе следи средба на лидерите на тие земји.
Зеленски рече дека разговарал со американските претставници Џаред Кушнер и Стив Виткоф по нивниот состанок со рускиот претседател Владимир Путин претходно оваа недела.
Тој посочи дека секој мировен договор бара безбедносни гаранции за Украина и десетгодишно финансирање на украинската армија.
-Планот е да се сретнеме во првата половина на ноември, што е можно порано, се разбира – изјави Зеленски пред институтот Хадсон преку видео врска.
Тој додаде дека многу зависи од Русија, потсетувајќи дека слична средба закажана за овој месец не се одржа.
Зеленски ја истакна важноста од континуираните дипломатски напори за договор за примирје и завршување на војната, која сега е во својата петта година, додавајќи дека во преговорите треба да се вклучи и Европа.
Украинскиот претседател рече дека е клучно техничките разговори да бидат проследени со средби на лидерите на земјите.
Зеленски истакна дека украинската војска продолжува да има проблеми со пристапот до комуникациските системи Starlink, и покрај американските уверувања дека ограничувањата за брзина се отстранети.
Украина, исто така, чека на претходно договорена пратка на противвоздушни пресретнувачи, рече Зеленски, посочувајќи на тешкотиите со кои се соочува Киев поради речиси секојдневните масовни руски напади со беспилотни летала и ракети.